చాటింగ్ చేయొద్దని మందలించిన భర్త.. పుట్టింటికి వెళ్లి ప్రియుడితో కలిసి..

నాగర్‌కర్నూల్ జిల్లాలో విషాదకర ఘటన చోటుచేసుకుంది. మాజీ ప్రియుడితో కలిసి ఓ వివాహిత ఉరేసుకుని ఆత్మహత్యకు పాల్పడింది. ఈ సంఘటన కొల్లాపూర్ మండలం ఎల్లూరు గ్రామంలో వెలుగుచూసింది. పోలీసులు తెలిపిన వివరాల ప్రకారం.. గ్రామానికి చెందిన శివ (25), రేణుక (23) గతంలో ప్రేమించుకున్నారు. అయితే వారి ప్రేమ వివాహానికి ఇరు కుటుంబాల పెద్దలు అంగీకరించకపోవడంతో ఇద్దరూ విడిపోయారు. అనంతరం రెండేళ్ల క్రితం రేణుకకు కుటుంబ సభ్యులు మరో వ్యక్తితో వివాహం జరిపించారు. ప్రస్తుతం ఆమెకు ఏడాది వయస్సున్న కుమార్తె కూడా ఉంది. అయినప్పటికీ శివతో ఆమె అప్పుడప్పుడు మాట్లాడుతున్నట్లు తెలుస్తోంది. వారం రోజుల క్రితం రేణుక మొబైల్‌లో చాటింగ్ చేస్తుండగా భర్త గమనించి మందలించినట్లు కుటుంబ సభ్యులు తెలిపారు. దీంతో ఆమె మనస్తాపానికి గురై పుట్టింటికి వెళ్లినట్లు సమాచారం.

ఈ నేపథ్యంలో శుక్రవారం అర్ధరాత్రి సమయంలో రేణుక ఇంటి నుంచి బయటకు వెళ్లిపోయింది. కొంతసేపటి తర్వాత చిన్నారి ఏడుపు వినిపించడంతో కుటుంబ సభ్యులు మేల్కొని రేణుక కనిపించకపోవడంతో షాకై, ఆమె కోసం వెతికారు. అయితే ఆమె ఆచూకీ లభించలేదు. శనివారం ఉదయం గ్రామ శివారులోని మామిడి తోటలో శివ, రేణుక ఇద్దరూ చెట్టుకు ఉరేసుకుని ఆత్మహత్య చేసుకున్నట్లు స్థానికులు గుర్తించి కుటుంబ సభ్యులకు సమాచారం అందించారు. వెంటనే సంఘటనా స్థలానికి చేరుకున్న పోలీసులు మృతదేహాలను స్వాధీనం చేసుకుని పోస్టుమార్టం నిమిత్తం ఆస్పత్రికి తరలించారు. ఘటనపై కేసు నమోదు చేసి దర్యాప్తు చేపట్టినట్లు తెలిపారు.

మరిన్ని తెలంగాణ వార్తల కోసం ఇక్కడ క్లిక్ చేయండి