Hyderabad: కూల్ న్యూస్.. వచ్చే 3 గంటల్లో ఈదురుగాలులతో వర్షాలు.. ఈ ప్రాంతాలకు అలెర్ట్.!

తెలంగాణ ప్రజలకు కూల్ న్యూస్. వరుణుడు కరుణించాడు. హైదరాబాద్‌తో పాటు రాష్ట్రంలోని పలు ప్రాంతాల్లో వర్షాలు కురుస్తున్నాయి. అలాగే రానున్న మూడు గంటల్లో రంగారెడ్డి, హైదరాబాద్, మేడ్చల్, సంగారెడ్డి, వికారాబాద్, నాగర్ కర్నూల్, మెదక్ జిల్లాల్లో తేలికపాటి నుండి మోస్తారు వర్షాలు కురుస్తాయని హైదరాబాద్ వాతావరణ కేంద్రం తెలిపింది. అటు 30 నుంచి 40 కిలోమీటర్ల వేగంతో ఈదురుగాలులు వీచే అవకాశముందని చెప్పింది.

ఇదిలా ఉంటే.. ఏప్రిల్ 22 నుంచి ఏప్రిల్ 25 వరకు తెలంగాణలోని పలు జిల్లాల్లో ఉరుములు, మెరుపులతో కూడిన వర్షాలు అక్కడక్కడ కురిసే అవకాశముందని వాతావరణశాఖ స్పష్టం చేసింది. కాగా, గురువారం రాష్ట్రంలో కొన్ని జిల్లాల్లో భారీ వర్షాలు కురిసాయి. కొమురం భీమ్ ఆసిఫాబాద్ జిల్లాలో అత్యధికంగా 16.4 మిల్లీమీటర్ల వర్షపాతం.. నిజామాబాద్ జిల్లాలోని ఆర్మూర్‌లో 9 మి.మీ వర్షపాతం నమోదైంది. అటు ఆదిలాబాద్‌, కరీంనగర్‌ జిల్లాల్లో కురిసిన వర్షానికి, ఈదురుగాలులకు మామిడికాయలు నేలమట్టమయ్యాయి. జగిత్యాల జిల్లా కోరుట్ల, మెట్‌పల్లిలో తీవ్రమైన పంట నష్టం వాటిల్లడంతో రైతులు ఆవేదన వ్యక్తం చేస్తున్నారు.