రైతులకు సాయం చేయడమే కాదు.. పొలాన్ని కాపాడే పక్షి.. ఎలానో మీరూ చూడండి

తెలుగు రాష్ట్రాల్లో ‘గిన్ని కోడి’ లేదా ‘గిన్నె కోడి’గా పిలిచే హెల్మెటెడ్ గినిఫౌల్, పౌల్ట్రీ రంగంలో ఒక ప్రత్యేకమైన గుర్తింపు పొందుతోంది. వాస్తవానికి ఆఫ్రికా ఖండానికి చెందిన ఈ పక్షులు, మన వాతావరణానికి త్వరగా అలవాటు పడతాయి. వీటి తలపై ఉండే గట్టి హెల్మెట్ వంటి భాగం వీటిని ఇతర కోళ్ల నుండి వేరు చేస్తుంది. కేవలం మాంసం, గుడ్ల కోసమే కాకుండా, వీటి ప్రవర్తన వల్ల రైతులు వీటిని పెంచడానికి మొగ్గు చూపుతున్నారు. గిన్ని కోళ్లకు ఒక వింత లక్షణం ఉంది. ఇవి ఎప్పుడూ గుంపులుగా తిరుగుతాయి.

పొలంలోకి ఏదైనా పాము వచ్చినా లేదా గుర్తు తెలియని వ్యక్తులు ప్రవేశించినా ఇవి వెంటనే గమనించి, పెద్దగా అరుస్తూ యజమానిని అప్రమత్తం చేస్తాయి. అందుకే వీటిని ‘పొలం వాచ్‌మెన్’ అని కూడా పిలుస్తుంటారు. ఈ లక్షణం వల్ల ఇంటి వద్ద లేదా ఫామ్ హౌస్‌ల దగ్గర రక్షణ కోసం వీటిని పెంచుతుంటారు. ప్రకృతి వ్యవసాయం చేసే రైతులకు గిన్ని కోళ్లు ఒక వరం. ఇవి పంటలకు హాని చేసే పురుగులు, మిడతలు, నత్తలను ఏరివేస్తాయి. దీనివల్ల పురుగు మందుల వాడకం తగ్గి, సాగు ఖర్చు ఆదా అవుతుంది.

ఇవి సాధారణ కోళ్లలాగా మట్టిని గీకవు, కాబట్టి చిన్న మొక్కలకు ఎలాంటి హాని జరగదు. వీటి నిర్వహణ చాలా సులభం. వీటికి ప్రత్యేకమైన షెడ్లు లేదా ఖరీదైన మేత అవసరం లేదు. పొలంలో దొరికే గడ్డి గింజలు, పురుగులు తిని ఇవి పెరుగుతాయి. ఇవి రోగ నిరోధక శక్తిని ఎక్కువగా కలిగి ఉంటాయి కాబట్టి వ్యాధుల ముప్పు తక్కువ. ఒక గిన్ని కోడి ఏడాదికి 60 నుంచి 100 వరకు గుడ్లు పెడుతుంది. వీటి మాంసం కూడా రుచిగా ఉండటమే కాకుండా ఆరోగ్యానికి మేలు చేస్తుందని మార్కెట్‌లో మంచి డిమాండ్ ఉంది. తక్కువ శ్రమతో అదనపు ఆదాయం కోరుకునే రైతులకు గిన్ని కోళ్ల పెంపకం ఒక తెలివైన ఆప్షన్.