మోగిన నగారా.. సూర్యపేట జిల్లాలో అమలులోకి ఎన్నికల కోడ్

మహారాష్ట్ర, హర్యానా అసెంబ్లీ ఎన్నికలకు ఈసీ షెడ్యూల్ విడుదల చేసిన విషయం తెలిసిందే. అయితే ఈ రెండు రాష్ట్రాలతో పాటుగా పలు రాష్ట్రాల్లో ఖాళీగా ఉన్న అసెంబ్లీ స్థానాలకు కూడా ఈసీ ఉప ఎన్నికలకు గ్రీన్ సిగ్నల్ ఇచ్చింది. ఈ నేపథ్యంలో మొత్తం 64 అసెంబ్లీ స్థానాలకు ఉప ఎన్నికలు జరగనున్నట్లు సీఈసీ సునీల్ అరోరా తెలిపారు. ఈ ఉప ఎన్నికల్లో తెలంగాణలోని హుజూర్‌నగర్‌ కూడా ఉంది. సుర్యపేట జిల్లాలోని ఖాళీయైన ఈ స్థానానికి అక్టోబర్‌ 21వ తేదీన ఉప ఎన్నిక జరగనుంది. అయితే హుజూర్‌నగర్‌ ఉపఎన్నికకు షెడ్యూల్‌ విడుదలైన నేపథ్యంలో సూర్యాపేట జిల్లాలో ఇవాళ్టి నుంచి ఎన్నికల కోడ్ అమలులోకి వచ్చినట్లు రాష్ట్ర ఎన్నికల ప్రధానాధికారి రజత్‌ కుమార్‌ తెలిపారు. 2019 జనవరి 1 నాటి ఓటర్ల జాబితా ప్రకారమే ఈ ఉపఎన్నిక నిర్వహించనున్నట్లు తెలిపారు. జిల్లాకు సంబంధించి ప్రభుత్వం ఏ విధానపరమైన ప్రకటనలు చేయరాదన్నారు. అంతేకాదు జిల్లాలో మంత్రులు ఎవ్వరూ అధికారిక కార్యక్రమాల్లో పాల్గొనరాదన్నారు. అదేవిధంగా జిల్లాకి సంబంధించిన ఏ ప్రభుత్వ ఉద్యోగుల బదిలీలు కూడా చేపట్టరాదన్నారు. డబ్బు, మద్యం సరఫరాపై ప్రత్యేక నిఘా పెడుతున్నట్లు రజత్ కుమార్ తెలిపారు. ఎవరైనా ఎన్నికల కోడ్‌ను ఉల్లంఘించినట్లు అనిపిస్తే.. సి-విజిల్‌ యాప్‌ ద్వారా ఫిర్యాదులు చేయవచ్చని పేర్కొన్నారు.