నాజూకైన మోడల్ తో ట్యాబ్ లవర్స్ ను కట్టిపడేస్తున్న శాంసంగ్.. డిస్ ప్లే, ఫీచర్లు అదుర్స్
ప్రీమియం ట్యాబ్లెట్ మార్కెట్లో శామ్‌సంగ్ కొత్త గాలక్సీ ట్యాబ్ S12 సిరీస్‌ను ప్రకటించింది. ఇందులో Galaxy Tab S12 Ultra, Galaxy Tab S12+ మోడళ్లు ఉన్నాయి. అప్‌డేటెడ్ హార్డ్‌వేర్, కొత్త సాఫ్ట్‌వేర్, Galaxy AI ఫీచర్లతో వచ్చిన ఈ ట్యాబ్లెట్లలో సన్నని డిజైన్ ప్రత్యేక ఆకర్షణగా నిలుస్తోంది. ముఖ్యంగా Ultra మోడల్ కేవలం 5.1 మి.మీ మందంతో ఉంది.
హెవీ టాస్క్‌లు చేసే వారికి పనితీరు మెరుగుపరిచేలా కొత్త ప్రాసెసర్‌తో పాటు వేడిని నియంత్రించే సాంకేతికతను అందించారు. 120Hz AMOLED డిస్‌ప్లే, 45W ఫాస్ట్ ఛార్జింగ్, S Pen వంటి సదుపాయాలు రెండు మోడళ్లలోనూ ఉన్నాయి. దీర్ఘకాలం ఉపయోగించుకునేలా ఏడు తరాల OS అప్‌గ్రేడ్స్, ఏడు సంవత్సరాల సెక్యూరిటీ అప్‌డేట్స్ అందించనున్నట్లు శామ్‌సంగ్ తెలిపింది.
3nm ప్రాసెసర్
Galaxy Tab S12 Ultra కేవలం 5.1 మి.మీ మందంతో శామ్‌సంగ్ తయారు చేసిన అత్యంత పలుచని Galaxy Tabగా నిలిచింది. రెండు మోడళ్లలోనూ స్లిమ్, తేలికైన డిజైన్‌తో పాటు IP68 వాటర్, డస్ట్ రెసిస్టెన్స్ ఇచ్చారు. వీడియో ఎడిటింగ్, గ్రాఫిక్ డిజైన్ వంటి పనుల్లో వేడిని నియంత్రించేందుకు కొత్త 3D వేపర్ ఛాంబర్‌ను అందించారు.
3nm ప్రాసెస్‌పై తయారైన MediaTek Dimensity 9500 చిప్‌సెట్‌ను ఉపయోగించారు. Galaxy Tab S11 Ultraతో పోలిస్తే NPU పనితీరు 61 శాతం వరకు, CPU పనితీరు 19%, GPU పనితీరు 17% మెరుగైనట్లు శామ్‌సంగ్ తెలిపింది. Ultraలో 14.6 అంగుళాల Dynamic AMOLED 2X డిస్‌ప్లే, S12+లో 12.6 అంగుళాల Dynamic AMOLED 2X స్క్రీన్ ఉన్నాయి. 120Hz అడాప్టివ్ రిఫ్రెష్ రేట్, 1,600 నిట్స్ గరిష్ఠ బ్రైట్‌నెస్, Vision Booster ఫీచర్ లభిస్తాయి.
23 గంటల బ్యాటరీ..
Galaxy Tab S12 Ultra 23 గంటల వరకు, S12+ 21 గంటల వరకు బ్యాటరీ బ్యాకప్ ఇస్తాయని కంపెనీ చెబుతోంది. రెండు మోడళ్లూ 45W ఫాస్ట్ ఛార్జింగ్‌కు సపోర్ట్ చేస్తాయి. 45W అడాప్టర్‌తో 0 నుంచి 100 శాతం వరకు ఛార్జ్ చేయడానికి సుమారు 95 నిమిషాలు పడుతుంది. రెండింటితోనూ ఎర్గోనామిక్ S Pen లభిస్తుంది. నోట్స్, డాక్యుమెంట్లపై వ్యాఖ్యలు, స్కెచ్‌ల కోసం దీన్ని ఉపయోగించవచ్చు. Pro Keyboardలో Galaxy AI Key ఇచ్చారు. Book Cover Keyboard Slimతో వేర్వేరు కోణాల్లో ట్యాబ్లెట్‌ను ఉపయోగించవచ్చు.
Android 17తో One UI 9, తాజా Galaxy AI ఫీచర్లు, మూడు యాప్స్‌ను ఒకేసారి ఉపయోగించే Multi Window సదుపాయం ఉన్నాయి. Google AI Proకు ఆరు నెలల ట్రయల్ కూడా లభిస్తుంది. అక్టోబర్ 7 నుంచి అమెరికాతో పాటు పలు దేశాల్లో గ్రే, సిల్వర్ రంగుల్లో విక్రయాలు ప్రారంభమవుతాయి. Galaxy Tab S12 Ultra ధర 1,399.99 డాలర్లు (సుమారు రూ.1,34,245), Galaxy Tab S12+ ధర 1,199.99 డాలర్లు (సుమారు రూ.1,15,065)గా ఉంది. భారత్‌లో ధర, లభ్యత వివరాలను శామ్‌సంగ్ ఇంకా ప్రకటించలేదు.