మార్కెట్లోకి రీఎంట్రీ ఇస్తున్న ఆఫ్రోడ్ కింగ్.. లుక్, ఫీచర్లతోనే మతిపోగొట్టేస్తోందిగా
Mahindra Thar 2026 .. ఆఫ్రోడ్ ప్రియులకు Mahindra Thar అంటే ప్రత్యేకమైన క్రేజ్. ఇప్పుడు ఈ పాపులర్ SUV మరోసారి కొత్త రూపంలో రాబోతుందనే వార్తలు హల్చల్ చేస్తున్నాయి. 2025లో అప్డేట్ అందుకున్న థార్కు మరోసారి మార్పులు చేసి మార్కెట్లోకి తీసుకురావాలని Mahindra సన్నాహాలు చేస్తున్నట్లు తెలుస్తోంది. కొత్త డిజైన్, ప్రీమియం ఫీచర్లు ఈసారి ప్రత్యేక ఆకర్షణగా నిలవనున్నాయి.
కొత్త కారు కొనాలనుకునే SUV ప్రియుల చూపు ప్రస్తుతం Mahindra Thar వైపు మళ్లుతోంది. కారణం ఈ ఐకానిక్ ఆఫ్రోడర్లో త్వరలో కీలక మార్పులు చోటుచేసుకోనున్నాయనే సమాచారం. టెస్టింగ్ సమయంలో కనిపించిన మోడళ్ల ఆధారంగా కొత్త గ్రిల్, LED లైట్స్, అల్లాయ్ వీల్స్తో పాటు ఇంటీరియర్లోనూ పలు అప్డేట్స్ వచ్చే అవకాశం కనిపిస్తోంది.
కొత్త లుక్తో థార్..
ప్రస్తుతం మార్కెట్లో ఉన్న Mahindra Thar డిజైన్ 2020లో లాంచ్ అయినప్పటి నుంచి పెద్దగా మారలేదు. దీంతో రాబోయే అప్డేట్లో SUV ఎక్స్టీరియర్కు రిఫ్రెష్డ్ లుక్ ఇవ్వనున్నట్లు సమాచారం. 2025లో తొలి అప్డేట్ అందుకున్న ఈ మోడల్కు మరోసారి మార్పులు చేసి 2026లో తీసుకురావచ్చనే అంచనాలు వినిపిస్తున్నాయి. అయితే Mahindra దీనిపై అధికారిక ప్రకటన చేయలేదు.
టెస్టింగ్ సమయంలో కనిపించిన మోడళ్లను బట్టి కొత్తగా డిజైన్ చేసిన ఐదు స్లాట్ల ఫ్రంట్ గ్రిల్, మోడిఫై చేసిన బంపర్లు, మార్పులు చేసిన LED హెడ్లాంప్స్ ఇందులో కనిపించే అవకాశం ఉంది. కొత్త ఐదు డబుల్ స్పోక్ అల్లాయ్ వీల్స్ కూడా SUVకు మరింత అప్స్కేల్ లుక్ను తీసుకురానున్నట్లు తెలుస్తోంది.
ఇంటీరియర్లోనూ కీలక మార్పులు ఉండనున్నాయి. కొత్త అప్హోల్స్టరీతో పాటు 10.25 అంగుళాల డిజిటల్ ఇన్స్ట్రుమెంట్ క్లస్టర్, వెంటిలేటెడ్ సీట్లు, వైర్లెస్ స్మార్ట్ఫోన్ ఛార్జర్, ప్యాసివ్ కీలెస్ ఎంట్రీ వంటి ఫీచర్లు అందించే అవకాశం ఉంది. దీంతో ప్రస్తుత థార్తో పోలిస్తే కొత్త వెర్షన్ మరింత ప్రీమియం అనుభూతిని అందించనుంది.
అదే పవర్తో ఆఫ్రోడ్ దూకుడు!
కొత్త డిజైన్, అదనపు ఫీచర్లు వచ్చినా ఇంజిన్ ఆప్షన్లలో మాత్రం పెద్ద మార్పులు ఉండకపోవచ్చని తెలుస్తోంది. ప్రస్తుత మోడల్లోని మూడు ఇంజిన్లనే కొనసాగించే అవకాశం ఉంది. ఇందులో 1.5 లీటర్ డీజిల్ ఇంజిన్ 117 హెచ్పీ పవర్, 300 ఎన్ఎమ్ టార్క్ను అందిస్తుంది. 2.2 లీటర్ డీజిల్ ఇంజిన్ 130 హెచ్పీ పవర్, 300 ఎన్ఎమ్ టార్క్ ఇస్తుంది. 2.0 లీటర్ పెట్రోల్ ఇంజిన్ 150 హెచ్పీ పవర్, 300 ఎన్ఎమ్ టార్క్ను అందిస్తుంది. ట్రాన్స్మిషన్ విషయానికి వస్తే 6-స్పీడ్ మాన్యువల్, 6-స్పీడ్ ఆటోమేటిక్ ఆప్షన్లు కొనసాగనున్నట్లు సమాచారం. ఆల్-వీల్ డ్రైవ్ (AWD) సామర్థ్యం కూడా అందుబాటులో ఉండనుంది.
ప్రస్తుతం వినిపిస్తున్న సమాచారం ప్రకారం సెప్టెంబర్ 2026 చివరి నాటికి కొత్త థార్ మార్కెట్లోకి రావచ్చనే అంచనాలు ఉన్నాయి. అయితే అధికారిక లాంచ్ తేదీ, ఫీచర్లపై Mahindra నుంచి స్పష్టమైన ప్రకటన రావాల్సి ఉంది. కొత్త లుక్, అదనపు టెక్నాలజీతో వస్తే ఈ ఆఫ్రోడర్కు ఉన్న క్రేజ్ మరింత పెరిగే అవకాశం ఉంది.