BCCI: షమీ, సిరాజ్‌లను పక్కన పెట్టడం ఏంటి? బీసీసీఐ సెలెక్షన్ తీరుపై మాజీ క్రికెటర్ ఫైర్
BCCI: న్యూజిలాండ్‌తో జరిగే టి20 సిరీస్‌కు సీనియర్ పేసర్ భువనేశ్వర్ కుమార్ తిరిగొచ్చాడు. ఈ నిర్ణయాన్ని మాజీ క్రికెటర్ వసీమ్ జాఫర్ సమర్థిస్తూ సెలెక్టర్లపై సంచలన వ్యాఖ్యలు చేశాడు. షమీ, సిరాజ్‌లను పక్కన పెట్టడంపై ప్రశ్నించాడు. 2027 వన్డే ప్రపంచకప్ కోసం బుమ్రా, షమీ, సిరాజ్‌లతో కూడిన అనుభవజ్ఞులైన ఫాస్ట్ బౌలింగ్ దళమే బెస్ట్ అని ప్రతిపాదించాడు.
Updated on: Oct 08, 2026 | 9:52 AM
BCCI: న్యూజిలాండ్‌తో అక్టోబర్ 22 నుంచి ప్రారంభం కానున్న టి20 సిరీస్ కోసం భారత సీనియర్ ఫాస్ట్ బౌలర్ భువనేశ్వర్ కుమార్ జట్టులోకి తిరిగొచ్చాడు. 2027 వన్డే వరల్డ్ కప్ నాటికి ప్రస్తుత ఫాస్ట్ బౌలింగ్ విభాగంపై సెలెక్టర్లకు నమ్మకం కుదరకపోవడంతోనే ఈ సీనియర్ బౌలర్ ను మళ్లీ సెలక్ట్ చేసినట్లు వార్తలు వినిపిస్తున్నాయి. భువీ ఫిట్‌నెస్ నిరూపించుకుంటే జస్ప్రీత్ బుమ్రాతో కలిసి మెయిన్ ఈవెంట్లలో బౌలింగ్ విభాగాన్ని నడిపించే అవకాశాలు కనిపిస్తున్నాయి. భువనేశ్వర్ కుమార్‌ను జట్టులోకి తీసుకోవడాన్ని భారత మాజీ క్రికెటర్ వసీమ్ జాఫర్ సమర్థించాడు.
భువనేశ్వర్ ఎంపికపై వసీమ్ జాఫర్ తన యూట్యూబ్ ఛానెల్లో మాట్లాడుతూ ఆసక్తికర వ్యాఖ్యలు చేశాడు. ఆలస్యంగానైనా మంచి నిర్ణయం తీసుకున్నారని, అతడిని ఎంపిక చేసి ఎవరూ దయ చూపలేదని స్పష్టం చేశాడు. ఐపీఎల్, దేశవాళీ టోర్నీల్లో ఉత్తర ప్రదేశ్ జట్టు తరఫున నిలకడగా రాణిస్తూ మంచి ఫిట్‌నెస్‌తో ఉన్న భువీని గతంలో ఎందుకు పక్కన పెట్టారో అర్థం కాలేదని విమర్శించాడు. వయస్సుతో సంబంధం లేకుండా ఒత్తిడి ఉండే పెద్ద టోర్నీల్లో అనుభవం ఉన్న ఆటగాళ్లు అవసరమని, కేవలం కుర్రాళ్లతోనే ఆడేస్తామంటే కుదరదని సూచించాడు.
షమీ, సిరాజ్‌లపై సెలెక్టర్లకు సూటి ప్రశ్న
ఇదే సమయంలో మహమ్మద్ షమీ, మహమ్మద్ సిరాజ్‌లను సరిగా ఉపయోగించుకోవడంలో సెలెక్టర్ల తీరును జాఫర్ తప్పుపట్టాడు. “మీ రెండో, మూడో మెయిన్ సీమర్లు ఎవరో నాకైతే స్పష్టత కనిపించడం లేదు. గుర్నూర్ బ్రార్, ప్రసిద్ధ్ కృష్ణ, నితీష్ రెడ్డి లాంటి యంగ్ బౌలర్లను వన్డేల్లో పరీక్షించినా మేనేజ్‌మెంట్‌కు ఇంకా వారిపై నమ్మకం కలగలేదు. సిరాజ్‌కు వరుసగా మ్యాచ్‌లు ఆడే అవకాశం ఇవ్వడం లేదు. ప్రపంచకప్ దగ్గర పడుతున్న వేళ షమీ కచ్చితంగా వన్డే, టెస్టు జట్లలో ఉండాలి” అని డెసిషన్ మేకర్స్‌ను ప్రశ్నించాడు.
బుమ్రా, షమీ, సిరాజ్ సరైన ఆప్షన్
వన్డే ప్రపంచకప్ వరకు నా మొదటి ఛాయిస్ బౌలర్లుగా బుమ్రా, షమీ, సిరాజ్ మాత్రమే ఉంటారని, ప్రపంచకప్ ముగిశాక కొత్త జట్టును నిర్మించుకోవడం గురించి ఆలోచించాలని జాఫర్ స్పష్టం చేశాడు. ముఖ్యంగా లాంగ్ ఫార్మాట్ అయిన టెస్టుల్లోకి షమీ రీఎంట్రీ కోసం తాను ఎంతో కాలంగా ఎదురుచూస్తున్నట్లు చెప్పాడు. జట్టు ప్రకటన సమయంలో షమీతో పాటు ఆకిబ్ నబీ లాంటి బౌలర్లపైనే తన దృష్టి ఉంటుందని, ఇప్పుడు కూడా షమీని పక్కన పెడితే అతడికి జాతీయ జట్టు తలుపులు మూసుకుపోయినట్లేనని అభిప్రాయపడ్డాడు.
అనుభవానికి ప్రాధాన్యం ఇవ్వడమే మంచిది
రాబోయే ప్రధాన టోర్నీలను దృష్టిలో ఉంచుకుని బీసీసీఐ సెలెక్టర్లు ప్రయోగాలకు స్వస్తి చెప్పి అనుభవానికి ప్రాధాన్యం ఇవ్వడం అవసరంగా కనిపిస్తోంది. భువనేశ్వర్ రీఎంట్రీతో పాటు షమీ, సిరాజ్ వంటి స్టార్ సీమర్లను నిలకడగా ఆడించడమే భారత జట్టు బౌలింగ్ విభాగంలో స్థిరత్వాన్ని తెస్తుందని నిపుణులు భావిస్తున్నారు.
మరిన్ని క్రీడా వార్తల కోసం ఇక్కడ క్లిక్ చేయండి..
