Shubman Gill : సెలబ్రిటీ గర్ల్ ఫ్రెండ్, కోట్ల కొద్దీ సంపాదన.. బాగానే కూడబెట్టావయ్యా గిల్.. ఇంతేనా ఇంకేమైనా ఆస్తులున్నాయా ?

Shubman Gill : టీమిండియా టెస్ట్ జట్టు కెప్టెన్, భవిష్యత్ వన్డే కెప్టెన్‌గా అందరూ భావిస్తున్న శుభ్‌మన్ గిల్ సంపాదన ఎంతో తెలిస్తే అందరూ ఆశ్చర్యపోవాల్సిందే. ఈ 25 ఏళ్ల యువ కెప్టెన్‌కు లగ్జరీ కార్ల కలెక్షన్ ఉంది. బీసీసీఐ నుంచి కోట్లలో జీతం, ఐపీఎల్, బ్రాండ్ డీల్స్ ద్వారా గిల్ భారీగా సంపాదిస్తున్నాడు. అతని గురించి, అతని ఆస్తుల గురించి పూర్తి వివరాలు ఇప్పుడు తెలుసుకుందాం. శుభ్‌మన్ గిల్ 2019లో అంతర్జాతీయ క్రికెట్‌లో అరంగేట్రం చేశాడు. ఇప్పుడు మూడు ఫార్మాట్లలోనూ భారత జట్టులో కీలక ఆటగాడిగా ఉన్నాడు. టెస్ట్ జట్టుకు కొత్త కెప్టెన్‌గా బాధ్యతలు తీసుకున్నాడు. ఇప్పటివరకు అతను 37 టెస్టులు, 55 వన్డేలు, 21 టీ20లు ఆడి, వాటిలో వరుసగా 2647, 2775, 578 పరుగులు చేశాడు.

శుభ్‌మన్ గిల్ బీసీసీఐ వార్షిక కాంట్రాక్ట్ 2024-2025లో గ్రేడ్ A జాబితాలో ఉన్నాడు. ఈ కేటగిరీలో కేవలం ఆరుగురు భారత ఆటగాళ్లు మాత్రమే ఉన్నారు. ఈ గ్రేడ్ Aలో ఉండటం వల్ల గిల్‌కు బీసీసీఐ నుంచి ఏడాదికి రూ.5 కోట్లు జీతం లభిస్తుంది. అంతేకాకుండా, మ్యాచ్ ఫీజు కూడా ఫార్మాట్‌ను బట్టి వేరువేరుగా ఉంటుంది. ఒక టెస్ట్ మ్యాచ్‌కి రూ.15 లక్షలు, ఒక వన్డే మ్యాచ్‌కి రూ.6 లక్షలు, ఒక టీ20 మ్యాచ్‌కి రూ.3 లక్షలు, ఐపీఎల్ జీతం రూ.16.5 కోట్లు లభిస్తుంది.

శుభ్‌మన్ గిల్ ప్రస్తుతం గుజరాత్ టైటాన్స్ జట్టుకు కెప్టెన్‌గా ఉన్నాడు. ఐపీఎల్ 2025లో అతనికి రూ.16.5 కోట్లు రెమ్యునరేషన్ లభించింది. 2018లో కేకేఆర్ తరపున ఐపీఎల్‌లో అరంగేట్రం చేసినప్పుడు అతని జీతం రూ.1.8 కోట్లు. ఐపీఎల్‌లో అతని జీతం ఎలా పెరిగిందో చూద్దాం.

శుభ్‌మన్ గిల్ ఐపీఎల్ కెరీర్ కేకేఆర్ జట్టుతో మొదలైంది. 2018 నుంచి 2021 వరకు, అతను కోల్‌కతా నైట్ రైడర్స్ తరపున ఆడాడు, ప్రతి సీజన్‌కు రూ.1.8 కోట్లు జీతం అందుకున్నాడు. ఆ తర్వాత 2022లో గుజరాత్ టైటాన్స్ జట్టులోకి మారాడు. 2022 నుంచి 2024 వరకు గుజరాత్ తరపున ఆడినందుకు ప్రతి సీజన్‌కు రూ.8 కోట్లు చొప్పున జీతం పొందాడు. ప్రస్తుతం, 2025 సీజన్‌కు గుజరాత్ టైటాన్స్ కెప్టెన్‌గా ఉన్న శుభ్‌మన్ గిల్ జీతం రూ.16.5 కోట్లుగా ఉంది.

OneCricket నివేదిక ప్రకారం, 2025 నాటికి శుభ్‌మన్ గిల్ మొత్తం ఆస్తుల విలువ రూ.32 నుంచి రూ.34 కోట్లు మధ్య ఉంటుంది. గిల్ సంపాదన ప్రధానంగా బీసీసీఐ, ఐపీఎల్ జీతం, బ్రాండ్ ఎండార్స్‌మెంట్స్ నుంచి వస్తుంది. గిల్‌కు చాలా ఆస్తులు ఉన్నాయి. అతని పంజాబ్‌లోని ఫిరోజ్‌పూర్ జిల్లా జలాలాబాద్ తహసీల్‌లోని జైమల్ సింగ్ వాలా గ్రామంలో ఒక లగ్జరీ ఇల్లు ఉంది.

గిల్‌కు రేంజ్ రోవర్ ఎస్‌యూవీ ఉంది. దీని ధర సుమారు రూ.90 లక్షలు. అంతేకాకుండా, అతని వద్ద మెర్సిడెస్ బెంజ్ E350 కూడా ఉంది. దీని ధర కూడా దాదాపు రూ.90 లక్షలు. అలాగే, మహీంద్రా కంపెనీ నుంచి ఆనంద్ మహీంద్రా బహుమతిగా ఇచ్చిన మహీంద్రా థార్ కూడా అతని కార్ల కలెక్షన్‌లో ఉంది. దీని ధర సుమారు రూ.15 లక్షలు.

ప్రస్తుతం, శుభ్‌మన్ గిల్ టీమిండియాలో అత్యంత పాపులర్ ఆటగాళ్లలో ఒకడు. అతని ఫ్యాన్ ఫాలోయింగ్ చాలా ఎక్కువ. కెప్టెన్‌గా అతని బ్రాండ్ విలువ మరింత పెరిగింది. గిల్ ప్రస్తుతం 14 బ్రాండ్లతో కలిసి పనిచేస్తున్నాడు. వాటి ద్వారా అతని వార్షిక ఆదాయం సుమారు రూ.4 కోట్లు. ఈ బ్రాండ్లలో క్యాసియో, టాటా క్యాపిటల్, ఎకో, జిల్లెట్, భారత్‌పే, బజాజ్ అలియంజ్ వంటి పెద్ద కంపెనీలు ఉన్నాయి. టెస్ట్ కెప్టెన్ అయ్యాక, అతని బ్రాండ్ విలువ ఇంకా పెరుగుతుందని భావిస్తున్నారు.

మరిన్ని క్రికెట్ వార్తల కోసం ఇక్కడ క్లిక్ చేయండి..