తొలుత అహంకారోడంటూ దూరం.. కట్‌చేస్తే.. బబుల్ ప్రపోజల్‌తో ఫిదా.. వీళ్ల సీక్రెట్ మ్యారేజ్ వెనుక ఇంత స్టోరీ ఉందా..!

Jasprit Bumrah Sanjana Ganesan Love Story

Jasprit Bumrah Sanjana Ganesan Love Story: భారత స్టార్ పేసర్ జస్ప్రీత్ బుమ్రా మైదానంలో బ్యాటర్లను తన యార్కర్లతో వణికించడంలో దిట్ట. అయితే, తన వ్యక్తిగత జీవితంలో మాత్రం ఆయన చాలా సిగ్గరి. ఇటీవల హర్భజన్ సింగ్, గీతా బస్ర హోస్ట్ చేసిన “హూ ఈజ్ ది బాస్?” (Who’s The Boss?) షోలో బుమ్రా తన భార్య సంజనా గణేశన్‌తో కలిసి సందడి చేశారు. వీరిద్దరి ప్రేమకథ, వివాహం, ఇంట్లో ఎవరు ‘బాస్’ అనే విషయాలపై ఆసక్తికర ముచ్చట్లు పంచుకున్నారు.

‘గర్విష్ఠి’ అనుకున్నా.. కానీ!

తొలిసారిగా వీరిద్దరూ 2019 ప్రపంచకప్ సమయంలో కలిశారు. ఆ సమయంలో బుమ్రాను చూసి సంజనా చాలా గర్విష్ఠి అనుకుందట. దీనిపై బుమ్రా స్పందిస్తూ.. “నేను కొత్త వారితో త్వరగా కలవలేను, అందుకే ఆమెకు హాయ్ చెప్పలేదు. దాంతో నాకు పెళ్లయిపోయిందని, భార్య ఎక్కడో కూర్చొని గమనిస్తోందని అందుకే నాతో మాట్లాడట్లేదని సంజనా భావించింది” అని నవ్వుతూ చెప్పుకొచ్చారు.

కానీ, ట్రెంట్ బ్రిడ్జ్‌లో వర్షం పడినప్పుడు జరిగిన ఒక సంభాషణ వీరి మధ్య స్నేహానికి పునాది వేసింది. బుమ్రానే స్వయంగా చొరవ తీసుకుని సంజనాతో మాట్లాడటం ప్రారంభించాడు.

సీక్రెట్ పెళ్లి వెనుక అసలు రహస్యం..

బుమ్రా వివాహం జరిగే వరకు ఎవరికీ తెలియకుండా ఉండటంపై హర్భజన్ ఆశ్చర్యం వ్యక్తం చేశాడు. “పెళ్లికి రెండు రోజుల ముందు వరకు కూడా నాకు తెలియదు” అని భజ్జీ అనగా, దానికి బుమ్రా బదులిస్తూ.. “మేము దాచాలని అనుకోలేదు, కేవలం సోషల్ మీడియాలో పెట్టలేదు. బయట కలిసినా ఆమె స్పోర్ట్స్ యాంకర్ కాబట్టి అందరూ ఇంటర్వ్యూ కోసమే కలిశాము అనుకునేవారు” అని సరదాగా చెప్పారు.

బబుల్ టూ బబుల్ ప్రపోజల్!

కరోనా సమయంలో వీరి ప్రపోజల్ చాలా విభిన్నంగా జరిగింది. ఐపీఎల్ సమయంలో అబుదాబిలో ఇద్దరూ వేర్వేరు బబుల్స్‌లో ఉన్నప్పుడు, బుమ్రా ఒక రింగ్ తీసుకువెళ్లి హోటల్ గది బాల్కనీలో క్యాండిల్ లైట్ సెటప్ చేసి సంజనాకు ప్రపోజ్ చేశాడట.

ఇంట్లో అసలు బాస్ ఎవరు?

ఇంట్లో ఎవరు బాస్ అనే ప్రశ్నకు ఇద్దరూ ఏకగ్రీవంగా తమ కుమారుడు ‘అంగద్’ పేరే చెప్పారు. “ప్రస్తుతానికి మా ఇంట్లో అంగద్ చెప్పిందే వేదం. వాడు పడుకోమంటే పడుకుంటాం, లేవమంటే లేస్తాం” అని బుమ్రా సరదాగా వ్యాఖ్యానించారు. ఆర్థిక విషయాలు లేదా ముఖ్యమైన నిర్ణయాల దగ్గర ఒకరికొకరు తోడుగా ఉంటూ పనులు పంచుకుంటామని వారు తెలిపారు.

బుమ్రాలో మార్పు తెచ్చిన సంజనా..

పెళ్లి తర్వాత బుమ్రా జీవితంలో చాలా మార్పులు వచ్చాయి. ముఖ్యంగా అంతకుముందు కేవలం హోటల్ గది, గ్రౌండ్‌కే పరిమితమైన బుమ్రా.. ఇప్పుడు సంజనా పుణ్యమా అని ప్రపంచాన్ని చుట్టేస్తున్నారట. సంజనాకు ఉన్న రీసెర్చ్ నాలెడ్జ్ వల్ల కొత్త ప్రదేశాలు చూడటం, విభిన్న ఆహారాలను రుచి చూడటం అలవాటు చేసుకున్నట్లు బుమ్రా తెలిపారు.

“జీవితాన్ని సీరియస్‌గా తీసుకోకుండా సంతోషంగా గడపడమే మా లక్ష్యం” అని ఈ జంట తమ అభిమానులకు సందేశమిచ్చారు. మైదానంలో దూకుడుగా ఉండే బుమ్రా, బయట ఎంత సరదాగా ఉంటారో ఈ ఇంటర్వ్యూ ద్వారా మరోసారి స్పష్టమైంది.