Match Fixing: మ్యాచ్ ఫిక్సింగ్‌లో ఇద్దరు భారతీయులు.. దేశం విడిచి వెళ్లకుండా నిషేధం.. 10 ఏళ్ల జైలు శిక్ష?

Legends Cricket Trophy

Legends Cricket Trophy: క్రికెట్‌లో మళ్లీ మ్యాచ్ ఫిక్సింగ్ ఛాయలు మొదలయ్యాయి. భారత జట్టు యజమాని పేరు ప్రకంపనలు సృష్టించింది. అనధికారిక లెజెండ్స్ క్రికెట్ లీగ్‌లో ఒక జట్టు యజమాని, భారతదేశానికి చెందిన యోని పటేల్, స్వదేశీయుడు పి ఆకాష్‌తో కలిసి మ్యాచ్ ఫిక్సింగ్‌కు పాల్పడ్డారని కొలంబో మేజిస్ట్రేట్ కోర్టు అధికారి ఒకరు తెలియజేశారు. అధికారి ప్రకారం, గత శుక్రవారం కోర్టు పటేల్ బెయిల్ దరఖాస్తును తిరస్కరించింది. అంతే కాదు వారిద్దరిపై విధించిన ట్రావెల్ బ్యాన్‌ను మరో నెల పాటు పొడిగించింది. ఇద్దరూ ఇప్పుడు ఎక్కడికీ వెళ్లలేరు.

మార్చి 8, 19 మధ్య క్యాండీలోని పల్లెకెలె స్టేడియంలో జరిగిన లెజెండ్స్ క్రికెట్ ట్రోఫీలో మ్యాచ్‌ను ఫిక్స్ చేయడానికి ప్రయత్నించినట్లు భారతీయులిద్దరూ ఆరోపణలు ఎదుర్కొంటున్నారు. ఈ లీగ్ ఫైనల్లో రాజస్థాన్ కింగ్స్ న్యూయార్క్ సూపర్ స్ట్రైకర్స్‌ను ఓడించింది. ఈ లీగ్‌లో క్యాండీ స్వాంప్ ఆర్మీ జట్టుకు పటేల్ యజమాని. అధికారులు ప్రకారం, కేసు పురోగతితో, పంజాబ్ రాయల్స్ మేనేజర్ ఆకాష్‌పై కూడా అభియోగాలు నమోదయ్యాయి.

దేశం విడిచి వెళ్లకుండా నిషేధం..

శ్రీలంక మాజీ వన్డే కెప్టెన్, ప్రస్తుత జాతీయ సెలెక్టర్ చైర్మన్ ఉపుల్ తరంగ, న్యూజిలాండ్ మాజీ ఆటగాడు నీల్ బ్రూమ్‌లు మ్యాచ్‌లను ఫిక్స్ చేయడానికి ఇద్దరు భారతీయుల చేసిన ప్రయత్నాలపై క్రీడా మంత్రిత్వ శాఖ ప్రత్యేక దర్యాప్తు విభాగానికి ఫిర్యాదు చేశారు. దీంతో విచారణ పూర్తయ్యే వరకు పటేల్, ఆకాష్‌లు దేశం విడిచి వెళ్లకుండా కోర్టు నిషేధం విధించింది.

10 ఏళ్ల జైలు శిక్ష విధించవచ్చు..

శ్రీలంక 2019లో మ్యాచ్ ఫిక్సింగ్‌కు వ్యతిరేకంగా చట్టాన్ని ఆమోదించింది. క్రీడలలో మ్యాచ్ ఫిక్సింగ్, అవినీతిని నేరంగా పరిగణించిన మొదటి దక్షిణాసియా దేశంగా అవతరించింది. మ్యాచ్ ఫిక్సింగ్‌కు పాల్పడిన వ్యక్తికి 10 సంవత్సరాల వరకు జైలు శిక్ష, జరిమానా కూడా చెల్లించాల్సి ఉంటుంది. ఇటువంటి పరిస్థితిలో ఈ భారతీయులిద్దరూ జైలుకు వెళ్లే ప్రమాదం ఉంది.

మరిన్ని క్రీడా వార్తల కోసం ఇక్కడ క్లిక్ చేయండి..