ICC Rankings : ఐసీసీ ర్యాంకింగ్స్‌లో భారతీయుల సత్తా.. సిరాజ్, జడేజా భారీ జంప్..58 మందిని దాటేసిన కివీస్ బ్యాట్స్‌మెన్

ICC Rankings : వెస్టిండీస్‌తో జరిగిన టెస్ట్ సిరీస్‌లో ఇన్నింగ్స్,140 పరుగుల తేడాతో ఘన విజయం సాధించిన తర్వాత భారత ఆటగాళ్లు ఐసీసీ ర్యాంకింగ్స్‌లో తమ స్థానాలను మెరుగుపరుచుకున్నారు. ముఖ్యంగా ఫాస్ట్ బౌలర్ మహ్మద్ సిరాజ్, ఆల్‌రౌండర్ రవీంద్ర జడేజా ర్యాంకింగ్స్‌లో పెద్ద ఎత్తున దూసుకెళ్లారు. మరోవైపు, న్యూజిలాండ్‌కు చెందిన యువ బ్యాట్స్‌మెన్ టిమ్ రాబిన్సన్ ఆస్ట్రేలియాపై అద్భుత ప్రదర్శన చేసి ఏకంగా 58 మంది ఆటగాళ్లను దాటేశాడు.

మహ్మద్ సిరాజ్ వెస్టిండీస్‌తో జరిగిన మొదటి టెస్ట్ మ్యాచ్‌లో మొత్తం 7 వికెట్లు పడగొట్టి, తన బౌలింగ్ ర్యాంకింగ్‌లో పెద్ద జంప్ కొట్టాడు. అతను ముగ్గురు బౌలర్లను వెనక్కి నెట్టి ఏకంగా 12వ స్థానానికి చేరుకున్నాడు. సిరాజ్ తన కెరీర్‌లోనే అత్యధిక రేటింగ్ పాయింట్లు సాధించాడు. ఇక వరల్డ్ నంబర్ 1 టెస్ట్ ఆల్‌రౌండర్ అయిన రవీంద్ర జడేజా కూడా బ్యాటింగ్‌లో తన ర్యాంక్‌ను మెరుగుపరుచుకున్నాడు. జడేజా టెస్ట్ బ్యాటింగ్ ర్యాంకింగ్స్‌లో 25వ స్థానానికి చేరుకున్నాడు. దీంతో అతను కేఎల్ రాహుల్ (ప్రస్తుతం 35వ స్థానం) బెన్ స్టోక్స్ వంటి స్టార్ ఆటగాళ్లను దాటేశాడు.

న్యూజిలాండ్‌కు చెందిన యువ టాప్ ఆర్డర్ బ్యాట్స్‌మెన్ టిమ్ రాబిన్సన్ ఐసీసీ ర్యాంకింగ్స్‌లో అద్భుతం చేశాడు. అతను ఆస్ట్రేలియాపై జరిగిన టీ20 సిరీస్‌లో 119 సగటుతో 119 పరుగులు చేశాడు. అతని స్ట్రైక్ రేట్ 156 కంటే ఎక్కువగా ఉంది. ఈ మెరుపు ప్రదర్శనకు రివార్డుగా, రాబిన్సన్ ఏకంగా 58 మంది బ్యాట్స్‌మెన్‌లను వెనక్కి నెట్టి 22వ స్థానానికి చేరుకున్నాడు.

టాప్‌లో కొనసాగుతున్న ఆటగాళ్లు

ఐసీసీ ర్యాంకింగ్స్‌లో ఇతర ఫార్మాట్‌లలో టాప్‌లో ఉన్న ఆటగాళ్ల వివరాలు ఇలా ఉన్నాయి

* టెస్ట్ బ్యాట్స్‌మెన్: ఇంగ్లాండ్‌కు చెందిన జో రూట్ అగ్రస్థానంలో కొనసాగుతున్నాడు.

* టెస్ట్ బౌలర్: టీమ్ ఇండియా పేసర్ జస్‌ప్రీత్ బుమ్రా నంబర్ 1 స్థానంలో ఉన్నాడు.

* టెస్ట్ ఆల్‌రౌండర్: భారత ఆల్‌రౌండర్ రవీంద్ర జడేజా అగ్రస్థానాన్ని పదిలం చేసుకున్నాడు.

* వన్డే బ్యాట్స్‌మెన్: భారత యువ ఓపెనర్ శుభ్‌మన్ గిల్ టాప్ ర్యాంక్‌లో నిలిచాడు.

* టీ20 బ్యాట్స్‌మెన్: టీ20 ర్యాంకింగ్స్‌లో అభిషేక్ శర్మ అగ్రస్థానంలో ఉన్నాడు.

* టీ20 బౌలర్: వరుణ్ చక్రవర్తి నంబర్ 1 స్థానంలో ఉన్నాడు.

* టీ20 ఆల్‌రౌండర్: పాకిస్తాన్‌కు చెందిన శాం అయ్యుబ్ అగ్రస్థానంలో కొనసాగుతున్నాడు.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి..