తిరుమల నడకదారిలో ఈ ఏడుగురు అమ్మవార్లు ఎవరో తెలుసా? శ్రీవారికి అక్కగార్లుగా ఎందుకు పూజిస్తారంటే..
Tirumala Sapta Matrikas: తిరుమల నడకదారిలో భక్తులకు కనిపించే సప్తమాతృకల ఆలయానికి ప్రత్యేకమైన ఆధ్యాత్మిక ప్రాధాన్యత ఉంది. ఈ ఏడుగురు అమ్మవార్లను శ్రీవేంకటేశ్వరస్వామివారి అక్కగార్లుగా భక్తులు విశ్వసిస్తారు. వీరికి సంబంధించిన పురాణ విశ్వాసాలు, తిరుమల రక్షణతో ఉన్న అనుబంధం, దర్శించుకుంటే కలిగే శుభఫలాల గురించి తెలుసుకుందాం.
Tirumala Sapta Matrikas: తిరుమల శ్రీవారి దర్శనం కోసం నడకదారిలో వెళ్లే భక్తులకు అడుగడుగునా ఎన్నో ఆధ్యాత్మిక విశేషాలు, పురాణ గాథలు దర్శనమిస్తాయి. అలాంటి విశిష్ట ప్రదేశాల్లో సప్తమాతృకల ఆలయం కూడా ఒకటి. తిరుమల నడకదారిలో రహదారికి ఎడమవైపున ఉన్న ఈ చిన్న ఆలయంలో ఏడు రాతి విగ్రహాలు భక్తుల పూజలు అందుకుంటుంటాయి. వీరినే సప్తమాతృకలు లేదా శ్రీవేంకటేశ్వరస్వామివారి అక్కగార్లుగా భక్తులు విశ్వసిస్తారు.
ఈ ఆలయానికి సంబంధించిన స్థానిక విశ్వాసం కూడా ఎంతో ఆసక్తికరంగా ఉంటుంది. గతంలో తిరుమలకు రహదారి నిర్మించే సమయంలో పలుమార్లు దుర్ఘటనలు సంభవించాయని చెబుతారు. ఎంత ప్రయత్నించినా రహదారి నిర్మాణం పూర్తికాకపోవడంతో, కీకారణ్యంలో చెట్టుకింద ఉన్న ఈ ఏడుగురు అమ్మవార్లను ప్రస్తుత ప్రదేశానికి తీసుకొచ్చి పూజలు నిర్వహించారని స్థానిక కథనం. అనంతరం రహదారి నిర్మాణ పనులు ఎలాంటి ఆటంకాలు లేకుండా సజావుగా పూర్తయ్యాయని భక్తులు చెబుతారు.
సప్తమాతృకల గురించి మరో విశ్వాసం కూడా ఉంది. ఈ ఏడుగురు అమ్మవార్లు బ్రహ్మచారిణులని, ఆకాశరాజు తన కుమార్తె అలమేలుమంగమ్మవారిని, అల్లుడు శ్రీవేంకటేశ్వరస్వామివారిని రక్షించేందుకు ఈ ఏడుగురు యువతులను ఆమె వెంట పంపించారని భక్తులు నమ్ముతారు. పగటిపూట ఆలయంలో కొలువై ఉండే ఈ అమ్మవార్లు, రాత్రివేళల్లో సూక్ష్మరూపంలోకి మారి సప్తగిరులను కాపాడుతారని స్థానిక భక్తుల విశ్వాసం.
అందుకే వీరిని శ్రీవారికి అక్కగార్లుగా భావిస్తూ భక్తులు ప్రత్యేకంగా పూజిస్తారు. తమ ముద్దుల తమ్ముడైన శ్రీవేంకటేశ్వరుడిని ఈ అమ్మవార్లు నిరంతరం కంటికి రెప్పలా కాపాడుతుంటారని భక్తుల నమ్మకం. నడకమార్గంలో సప్తమాతృకలను దర్శించుకుని ముందుకు సాగితే, అమ్మవార్ల అనుగ్రహంతో శ్రీవారి దర్శనం సజావుగా జరుగుతుందని భక్తులు విశ్వసిస్తారు.
తిరుపతి పట్టణానికి గ్రామదేవతగా కొలువైన గంగమ్మతల్లిని కూడా శ్రీవారికి మరో అక్కగా భావించే సంప్రదాయం ఉంది. ఈ కారణంగానే ప్రతి సంవత్సరం శ్రీవారి ఆలయం నుంచి గంగమ్మతల్లికి సకల లాంఛనాలతో పుట్టింటి కానుకలను పంపించే ఆచారం కొనసాగుతోందని చెబుతారు.
సప్తమాతృకలను దర్శించుకున్న అనంతరం భక్తులు ‘అవ్వాచారి కోన’ ప్రకృతి అందాలను ఆస్వాదిస్తూ ముందుకు సాగుతారు. దాదాపు రెండు కిలోమీటర్లు నడిచిన తర్వాత ఎడమవైపున మోకాలిమిట్ట గోపురం దర్శనమిస్తుంది. ఇలా తిరుమల నడకదారి కేవలం శ్రీవారి ఆలయానికి చేరుకునే మార్గమే కాదు.. ఎన్నో పురాణ విశ్వాసాలు, ఆధ్యాత్మిక సంప్రదాయాలు, భక్తి కథలకు నిలయంగా నిలుస్తోంది.
(Disclaimer: ఈ కథనంలోని సప్తమాతృకల గురించి వివరాలు స్థానిక భక్తుల విశ్వాసాలు, సంప్రదాయ కథనాల ఆధారంగా అందించబడ్డాయి.)