ప్రదోష వ్రతం ఎప్పుడు?.. శివుడి అనుగ్రహం కోసం ఈ మంత్రాలు జపించండి!
October 2026 Pradosh Vrat: అక్టోబర్ 23, 2026న ప్రదోష వ్రతాన్ని ఆచరించనున్నారు. పరమశివుడికి అంకితం చేసిన ఈ పవిత్ర వ్రతం రోజున పూజా విధానం, ప్రదోష కాలం, అభిషేకం విశిష్టత, మహామృత్యుంజయ మంత్రం సహా శివుడి అనుగ్రహం కోసం జపించాల్సిన ముఖ్యమైన మంత్రాల గురించి తెలుసుకుందాం.
Updated on: Oct 22, 2026 | 12:27 PM
Pradosh Vrat Telugu: హిందూ సంప్రదాయంలో ప్రదోష వ్రతానికి ఎంతో ఆధ్యాత్మిక ప్రాముఖ్యత ఉంది. ఈ వ్రతాన్ని పరమశివుడికి అంకితం చేస్తారు. ప్రతి నెలలో త్రయోదశి తిథి రోజున ప్రదోష వ్రతాన్ని ఆచరిస్తారు. ఈ రోజున భక్తిశ్రద్ధలతో శివుడిని పూజించడం, అభిషేకం చేయడం వల్ల ఆయన అనుగ్రహం లభిస్తుందని భక్తులు విశ్వసిస్తారు. ముఖ్యంగా ప్రదోష కాలంలో మహాదేవుడిని ఆరాధించడం వల్ల జీవితంలో సుఖశాంతులు, ఐశ్వర్యం, సౌభాగ్యం కలుగుతాయని మతపరమైన నమ్మకం. అలాగే, మంచి జీవిత భాగస్వామి లభించాలని కోరుకునే అవివాహిత యువతులు కూడా ఈ వ్రతాన్ని ఆచరిస్తుంటారు. ఈ నేపథ్యంలో అక్టోబర్ నెలలో ప్రదోష వ్రతం ఎప్పుడు వచ్చింది? పూజకు అనుకూలమైన సమయం ఏది? ఈ రోజున జపించాల్సిన శివ మంత్రాల గురించి తెలుసుకుందాం.
ప్రదోష వ్రతం ఎప్పుడు?
పంచాంగ వివరాల ప్రకారం, ఆశ్వయుజ మాసం శుక్లపక్ష త్రయోదశి తిథి 2026 అక్టోబర్ 23, శుక్రవారం మధ్యాహ్నం 2:36 గంటలకు ప్రారంభమై, అక్టోబర్ 24, శనివారం మధ్యాహ్నం 1:37 గంటలకు ముగుస్తుంది. ప్రదోష కాలానికి ప్రాధాన్యత ఇవ్వడం వల్ల అక్టోబర్ 23వ తేదీన ఈ వ్రతాన్ని ఆచరిస్తారు.
ప్రదోష పూజ సమయం: అక్టోబర్ 23న సాయంత్రం 5:43 గంటల నుంచి రాత్రి 8:16 గంటల వరకు ప్రదోష కాలంగా పేర్కొన్నారు. ఈ సమయంలో శివుడిని పూజించడం శుభప్రదంగా భావిస్తారు.
ప్రదోష వ్రతం రోజున పూజా విధానం
ప్రదోష వ్రతం ఆచరించాలనుకునే భక్తులు ఉదయాన్నే నిద్రలేచి స్నానం చేసి, ఇంటిని శుభ్రం చేసుకోవాలి. అనంతరం శివుడిని మనస్ఫూర్తిగా స్మరించి వ్రత సంకల్పం చేసుకోవాలి. ఉపవాసం ఉండే భక్తులు తమ ఆరోగ్య పరిస్థితికి అనుగుణంగా ఆచరించవచ్చు. సాయంత్రం ప్రదోష కాలంలో శివలింగానికి నీటితో అభిషేకం చేయాలి. వీలైతే పాలు, పెరుగు, తేనె వంటి పదార్థాలతో అభిషేకం చేయవచ్చు. శివుడికి బిల్వపత్రాలు, పుష్పాలు సమర్పించి దీపం వెలిగించాలి. అనంతరం శివ చాలీసా, శివ స్తోత్రాలు పఠించడంతో పాటు శివ మంత్రాలను జపించాలి. చివరగా మహాదేవుడికి హారతి ఇచ్చి కుటుంబ సుఖశాంతుల కోసం ప్రార్థించాలి.
ప్రదోష వ్రతం రోజున జపించాల్సిన శివ మంత్రాలు
1. మహామృత్యుంజయ మంత్రం
ఓం త్రయంబకం యజామహే సుగంధిం పుష్టివర్ధనం | ఉర్వారుకమివ బంధనాన్ మృత్యోర్ముక్షీయ మామృతాత్ ||
ఈ మంత్రాన్ని శివుడి అనుగ్రహం కోసం భక్తిశ్రద్ధలతో జపిస్తారు.
2. శివ పంచాక్షరీ మంత్రం
ఓం నమః శివాయ!
ఇది పరమశివుడిని ఆరాధించడానికి అత్యంత ప్రసిద్ధి చెందిన మంత్రం. ప్రశాంతమైన మనసుతో ఈ మంత్రాన్ని జపించడం ఆధ్యాత్మిక సాధనలో భాగంగా భావిస్తారు.
3. శివుడి పంచబ్రహ్మ మంత్రాలు
- ఓం సద్యోజాతాయ నమః
- ఓం వామదేవాయ నమః
- ఓం అఘోరాయ నమః
- ఓం తత్పురుషాయ నమః
- ఓం ఈశానాయ నమః
- ఈ మంత్రాలను శివారాధన సమయంలో పఠించవచ్చు.
ప్రదోష వ్రతం రోజున భక్తిశ్రద్ధలతో శివుడిని ఆరాధించడం ద్వారా మానసిక ప్రశాంతత, ఆధ్యాత్మిక తృప్తి లభిస్తాయని భక్తులు విశ్వసిస్తారు. సంప్రదాయాల ప్రకారం వ్రతాన్ని ఆచరిస్తూ, మంచి ఆలోచనలు, దయ, సేవాభావాన్ని అలవర్చుకోవడం కూడా ముఖ్యమే.
(Discliamer: ప్రదోష వ్రతం నాడు శివ పూజా సమయాలు, తిథులు ప్రాంతాన్ని బట్టి మారవచ్చు. వ్రతం ఆచరించేవారు స్థానిక పంచాంగాన్ని పరిశీలించడం మంచిది.)
మరిన్ని ఆసక్తికర ఆధ్యాత్మిక వార్తల కోసం ఇక్కడ క్లిక్ చేయండి.
