Onam: ఆగస్టు 26న తిరువోణం.. మహాబలి కోసం కేరళలో ఇంత ఘనంగా ఓనం ఎందుకు జరుపుతారంటే!
Thiruvonam 2026 Special Telugu: 2026లో ఓనం పండుగ ఆగస్టు 16న ప్రారంభమై, అత్యంత ముఖ్యమైన తిరువోణం ఆగస్టు 26న జరుపుకుంటారు. మహాబలి కథ, పూకలం, ఓనం సద్య, వల్లం కళి వంటి ప్రత్యేకతల గురించి ఇప్పుడు మనం వివరంగా తెలుసుకుందాం.
Updated on: Aug 25, 2026 | 10:25 AM
Thiruvonam 2026 Special Telugu: ఓనం కేరళలో అత్యంత ప్రముఖమైన, ప్రజాదరణ పొందిన పండుగల్లో ఒకటి. ఇది కేవలం మత విశ్వాసాలకు మాత్రమే పరిమితం కాకుండా.. కేరళ సంస్కృతి, సంప్రదాయాలు, వ్యవసాయ జీవనం, కుటుంబ బంధాలు, సామూహిక వేడుకలకు ప్రతీకగా నిలుస్తుంది. పంట, శ్రేయస్సు, ఆనందం, ఐక్యత, నూతన ఆరంభాలకు సంకేతంగా ఓనం పండుగను ఘనంగా జరుపుకుంటారు. 2026లో 10 రోజుల ఓనం వేడుకలు ఆగస్టు 16న ప్రారంభమయ్యాయి. ఈ పండుగలో అత్యంత ముఖ్యమైన రోజైన తిరువోణం ఆగస్టు 26, 2026 బుధవారం నాడు జరుపుకుంటారు. తిరువోణం సందర్భంగా కేరళలోని ఇళ్లు, దేవాలయాలు, మార్కెట్లు, వీధులు పూల అలంకరణలు, సంప్రదాయ వంటకాలు, సాంస్కృతిక కార్యక్రమాలతో సందడిగా మారుతాయి.
తిరువోణం అంటే ఏమిటి?
ఓనం పండుగలో తిరువోణం అత్యంత ముఖ్యమైన రోజుగా భావిస్తారు. మలయాళ క్యాలెండర్ ప్రకారం చింగం మాసంలోని తిరువోణం నక్షత్రం రోజున ఈ వేడుకలు జరుగుతాయి. ఈ రోజున కేరళ ప్రజల ఆరాధ్య రాజు మహాబలి (బలి చక్రవర్తి) తన ప్రజలను కలుసుకోవడానికి భూలోకానికి తిరిగి వస్తాడని సంప్రదాయ విశ్వాసం. అందుకే ప్రజలు తమ ఇళ్లను శుభ్రం చేసి, పూలతో పూకలం ఏర్పాటు చేసి, ప్రత్యేకమైన సాంప్రదాయ వంటకాలను సిద్ధం చేసి మహాబలి రాజుకు ఘనంగా స్వాగతం పలుకుతారు.
ఓనం పండుగకు మహాబలి కథే ప్రధాన ఆధారం
ఓనం పండుగకు సంబంధించిన ప్రసిద్ధ గాథ మహారాజు మహాబలితో ముడిపడి ఉంది. పురాణ కథనాల ప్రకారం మహాబలి ఎంతో న్యాయపరుడు, దయగల రాజు. ఆయన పాలనలో ప్రజలు సుఖసంతోషాలతో జీవించేవారని, రాజ్యంలో ఎలాంటి వివక్ష లేకుండా అందరికీ సమాన గౌరవం ఉండేదని చెబుతారు. మహాబలి కీర్తి, ప్రజాదరణ పెరుగుతుండటంతో దేవతలు ఆందోళన చెందారని పురాణాలు చెబుతున్నాయి. వారందరు వేడుకోవడంతో విష్ణుమూర్తి.. వామన అవతారంలో మహాబలి వద్దకు వచ్చి మూడు అడుగుల భూమిని దానంగా కోరారు. మహాబలి ఆ కోరికను అంగీకరించడంతో వామనుడు విశ్వరూపాన్ని ధరించాడు. మొదటి అడుగుతో భూమిని, రెండో అడుగుతో ఆకాశాన్ని కొలిచాడు. మూడో అడుగు వేయడానికి స్థలం లేకపోవడంతో మహాబలి తన శిరస్సును సమర్పించాడు. మహాబలి భక్తి, దానగుణం, త్యాగానికి సంతోషించిన విష్ణుమూర్తి.. సంవత్సరానికి ఒకసారి తన ప్రజలను కలుసుకునేందుకు అతనికి అనుమతి ఇచ్చాడని విశ్వసిస్తారు. అందుకే ఓనం సందర్భంగా మహాబలి రాజును స్వాగతించే సంప్రదాయం కొనసాగుతోంది.
పూకలం.. ఓనం వేడుకల్లో ప్రత్యేక ఆకర్షణ
ఓనం వేడుకల్లో అందరినీ ఆకట్టుకునే సంప్రదాయాల్లో పూకలం ఒకటి. ఇంటి ముందు ప్రదేశంలో వివిధ రకాల రంగురంగుల పూలను ఉపయోగించి అందమైన ఆకృతులు, డిజైన్లను రూపొందిస్తారు. ఓనం పది రోజుల పాటు కొనసాగుతున్న కొద్దీ పూకలం పరిమాణం, అలంకరణ మరింత విస్తరిస్తుంది. తిరువోణం రోజున పూకలాన్ని ప్రత్యేకంగా అలంకరిస్తారు. మహాబలి రాజుకు స్వాగతం పలికేందుకు ఇంటి ముందు ఈ పూల అలంకరణను ఏర్పాటు చేస్తారని సంప్రదాయంగా నమ్ముతారు.
ఓనం సద్య.. పండుగలో మరో ప్రత్యేకత
తిరువోణం రోజున తయారు చేసే సాంప్రదాయ భోజనం ఓనం సద్య ఈ పండుగకు మరో ప్రధాన ఆకర్షణ. అరటి ఆకులో వడ్డించే ఈ విందులో అనేక రకాల సాంప్రదాయ శాకాహార వంటకాలు ఉంటాయి. సద్యలో సాధారణంగా అన్నంతో పాటు సాంబార్, అవియల్, తోరన్, ఓలన్, కూటు కూర, పచ్చడి, కిచడి, ఊరగాయ, పాపడ్ వంటి వంటకాలు ఉంటాయి. వీటితో పాటు వివిధ రకాల పాయసం, ఇతర స్వీట్లను కూడా వడ్డిస్తారు. కుటుంబ సభ్యులు, బంధువులు కలిసి ఈ ప్రత్యేక విందును ఆస్వాదించడం ఓనం వేడుకల్లో ముఖ్యమైన భాగంగా ఉంటుంది.
కేరళ సంస్కృతి, సంప్రదాయాలకు అద్దం పట్టే పండుగ
ఓనం సందర్భంగా కేరళ వ్యాప్తంగా అనేక సాంస్కృతిక కార్యక్రమాలు నిర్వహిస్తారు. సాంప్రదాయ నృత్యాలు, సంగీతం, జానపద కళారూపాలు ప్రజలను ఆకట్టుకుంటాయి. మహిళలు సంప్రదాయ దుస్తుల్లో పాల్గొనే కార్యక్రమాలు కూడా పండుగ వాతావరణాన్ని మరింత ప్రత్యేకంగా మారుస్తాయి. ఓనం సందర్భంగా నిర్వహించే వల్లం కళి లేదా సాంప్రదాయ పడవ పందేలు కూడా ప్రపంచవ్యాప్తంగా ప్రసిద్ధి చెందాయి. పొడవైన అలంకరించిన పడవల్లో పెద్ద సంఖ్యలో ప్రజలు కలిసి పాల్గొనే ఈ పోటీలు కేరళ సంస్కృతిలో ప్రత్యేక స్థానాన్ని కలిగి ఉన్నాయి.
శ్రేయస్సు, ఆనందం, నూతన ఆరంభాలకు ఓనం ప్రతీక
ఓనం ప్రధానంగా పంటకోత, శ్రేయస్సు, ప్రకృతి, సామూహిక ఆనందంతో ముడిపడి ఉంటుంది. రైతులకు తమ కష్టానికి లభించిన కొత్త పంటను, ఫలితాలను ఆనందంగా స్వాగతించే సందర్భం ఇది. అందుకే ఓనం వేడుకల్లో ప్రకృతి, వ్యవసాయం, కుటుంబం, సమాజానికి ప్రత్యేక ప్రాధాన్యత కనిపిస్తుంది. తిరువోణం రోజున ప్రజలు తమ ఇళ్లలో శాంతి, సంతోషం, ఆరోగ్యం, శ్రేయస్సు వెల్లివిరియాలని కోరుకుంటారు.
ఆగస్టు 26న తిరువోణం
2026లో ఓనం వేడుకలు ఆగస్టు 16న ప్రారంభమై, పది రోజుల పాటు కొనసాగుతాయి. ఈ వేడుకల్లో అత్యంత ముఖ్యమైన తిరువోణం ఆగస్టు 26, బుధవారం నాడు జరుపుకుంటారు. ఈ సందర్భంగా కేరళలోని ఇళ్లు పూకలాలతో కళకళలాడుతాయి. సంప్రదాయ దుస్తులు, ఓనం సద్య, సాంస్కృతిక కార్యక్రమాలు, పడవ పందేలు, కుటుంబ సమ్మేళనాలతో పండుగ వాతావరణం నెలకొంటుంది. మహాబలి రాజును స్వాగతించే పురాణ విశ్వాసంతో పాటు.. ప్రజల మధ్య ప్రేమ, ఐక్యత, ఆనందం, ప్రకృతితో అనుబంధాన్ని చాటిచెప్పే పండుగగా ఓనం ప్రత్యేకతను సంతరించుకుంది. అందుకే ఇది కేరళ సంస్కృతి, సంప్రదాయం, గుర్తింపులో ఒక ముఖ్యమైన భాగంగా కొనసాగుతోంది.
(Disclaimer: ఈ కథనంలోని ఓనం పండుగకు సంబంధించిన కథలు, ఆచారాలు, విశ్వాసాలు సంప్రదాయాలు, పురాణాల ఆధారంగా అందించబడ్డాయి. వీటిని విశ్వాసాలుగానే పరిగణించాలి.)
