EPFO: పీఎఫ్ ఖాతాదారులకు పండుగలాంటి వార్త.. త్వరలో బ్యాంక్ అకౌంట్లోకి డబ్బులు.. కేంద్రం డెసిషన్
ఈపీఎఫ్వో ఖాతాలపై ఎంప్లాయిస్ ప్రావిడెంట్ ఫండ్ ఆర్గనైజేషన్ కీలక నిర్ణయం తీసుకుంది. పీఎఫ్ అకౌంట్లలోని డబ్బులను ఆటో సెటిల్మెంట్ చేయనుంది. ఇనాక్టివ్ ఖాతాలకు మాత్రమే ఈ రూల్ వర్తించనుంది. త్వరలోనే వారి ఖాతాల్లో ఇవి జమ కానున్నాయి. క్లెయిమ్ చేయని ఖాతాల్లోని నిల్వలను క్లియర్ చేసేందుకు ఈ కొత్త విధానం తీసుకొచ్చింది.
ఈపీఎఫ్వో ఖాతాదారులకు కేంద్ర ప్రభుత్వం భారీ ఊరటనిచ్చింది. పీఎఫ్ అకౌంట్ ఇనాక్టివ్ అయి ఉండి డబ్బులు క్లెయిమ్ చేయనివారికి ఆటోమేటిక్గా నిధులను బదిలీ చేయనుంది. పీఎఫ్ ఖాతాల్లో మిగిలిపోయిన సొమ్మును నేరుగా లబ్దిదారుడి బ్యాంక్ అకౌంట్లో జమ చేయనుంది. ఇటీవల కేంద్ర ప్రభుత్వం ఈ నిర్ణయం తీసుకుంది.
ఇప్పటివరకు పీఎఫ్ క్లెయిమ్ చేయాలంటే ముందుగా దరఖాస్తు చేసుకోవాల్సి ఉంటుంది. ఇందుకు అవసరమైన డాక్యుమెంట్లను సమర్పించాల్సి ఉంటుంది. అనంతరం అధికారులు పరిశీలించి క్లెయిమ్ ప్రాసెస్ చేస్తారు. కానీ క్లెయిమ్ కోసం దరఖాస్తు చేసుకోకపోయినా ఇనాక్టివ్ ఖాతాల్లోని నగదును ఆటోమేషన్ విధానంలో సెటిల్ చేయనుంది.
ఆధార్తో లింక్ అయిన బ్యాంక్ అకౌంట్లో క్లెయిమ్ చేయని సొమ్ము ఆటోమేటిక్గా జమ అవుతుంది. రూ.వెయ్యిలోపు బ్యాలెన్స్ ఉన్న ఖాతాలకు పైలట్ ప్రాజెక్టుగా నిధులను ఆటోసెటిల్మెంట్ చేయనుంది. ఆ తర్వాత మిగతా ఖాతాదారులకు కూడా జమ చేయనుంది. తొలి దశలో 8 లక్షల ఇనాక్టివ్ ఖాతాలను గుర్తించారు.
8 లక్షల పీఎఫ్ ఖాతాల్లో రూ.5,200 కోట్ల నిధులు ఉన్నాయి. వీటిల్లో 14 వేల ఖాతాల్లో రూ.5 లక్షలకుపైగా క్లెయిమ్ చేయని నగదు ఉంది. ఇక 31 లక్షల ఖాతాల్లో రూ.10,181 కోట్ల బ్యాలెన్స్ నిరుపయోగం ఉంది. దీంతో వీటిని ఆటోమేషన్ పద్దతిలో బ్యాంక్ అకౌంట్కు నేరుగా జమ చేయనుంది. త్వరలో ఈ కొత్త వ్యవస్థ ప్రవేశపెట్టనున్నారు.
కాగా అకౌంట్ మూడేళ్లపాటు ఎలాంటి కాంట్రిబ్యూషన్ జమ కాకపోయినా, క్లెయిమ్ చేయకపోయినా ఇనాక్టివ్ అవుతుంది. ఇక 55 ఏళ్ల వయస్సులో రిటైర్మెంట్ అయితే.. మూడేళ్ల పాటు ఎలాంటి కాంట్రిబ్యూషన్ జమ కాకపోయినా ఇనాక్టివ్ అవుతుంది. వీటికి కేంద్రం నుంచి వడ్డీ జమ కాదు.