దేశవ్యాప్తంగా గాంధీ, లాల్ బహదూర్ శాస్త్రి జయంతి వేడుకలు.. రాజ్‌ఘాట్‌లో మోదీ నివాళులు

దేశవ్యాప్తంగా జాతిపిత మహాత్మ గాంధీ, మాజీ ప్రధాని లాల్ బహదూర్ శాస్త్రి జయంతి వేడుకలు ఘనంగా జరుగుతున్నాయి. అక్టోబర్ 2న గాంధీ జయంతితో పాటు లాల్ బహదూర్ శాస్త్రి జయంతిని కూడా దేశ ప్రజలు నిర్వహిస్తున్నారు. ఢిల్లీలోని రాజ్‌ఘాట్‌కు చేరుకున్న ప్రధానమంత్రి నరేంద్ర మోదీ మహాత్మ గాంధీ సమాధి వద్ద పుష్పాంజలి ఘటించి నివాళులర్పించారు.

ఈ సందర్భంగా గాంధీజీ సేవలను ప్రధాని స్మరించుకున్నారు. సత్యం, అహింస, శాంతి, స్వచ్ఛత వంటి ఆయన విలువలు దేశానికి ఎప్పటికీ మార్గదర్శకంగా నిలుస్తాయని పేర్కొన్నారు. బాపూజీ అందించిన కాలాతీత సందేశం ప్రతి ఒక్కరినీ మెరుగైన సమాజ నిర్మాణం వైపు, వికసిత భారత్ లక్ష్యం వైపు నడిపించాలని ఆకాంక్షించారు.

May Bapu’s timeless message keep guiding us towards a better society and a Viksit Bharat.

#GandhiJayanti https://t.co/nEISzsM37X

— Narendra Modi (@narendramodi) October 2, 2026

అనంతరం మాజీ ప్రధాని లాల్ బహదూర్ శాస్త్రి జయంతి సందర్భంగా విజయ్‌ఘాట్‌లో ఆయనకు ప్రధాని మోదీ నివాళులర్పించారు. నిరాడంబరత, నిజాయితీ, దేశభక్తికి శాస్త్రిజీ జీవితం గొప్ప ఉదాహరణగా నిలిచిందని గుర్తు చేసుకున్నారు. దేశ సేవ పట్ల ఆయన చూపిన అంకితభావం తరతరాలకు స్ఫూర్తినిస్తుందని పేర్కొన్నారు.

Homage to Lal Bahadur Shastri Ji, whose simplicity and dedication to the nation remain deeply inspiring. https://t.co/edMiRdsf0v

— Narendra Modi (@narendramodi) October 2, 2026

గాంధీ, శాస్త్రి జయంతి సందర్భంగా దేశవ్యాప్తంగా పలు కార్యక్రమాలు నిర్వహిస్తున్నారు. ప్రభుత్వ కార్యాలయాలు, విద్యాసంస్థలు, స్వచ్ఛంద సంస్థల ఆధ్వర్యంలో ప్రత్యేక కార్యక్రమాలు, స్వచ్ఛత కార్యక్రమాలు చేపడుతున్నారు. మహాత్మ గాంధీ, లాల్ బహదూర్ శాస్త్రి ఆశయాలను స్మరించుకుంటూ దేశ ప్రజలు వారికి ఘన నివాళులు అర్పిస్తున్నారు.

మరిన్ని జాతీయ వార్తల కోసం ఇక్కడ క్లిక్ చేయండి..