అభినందన్ వర్థమాన్ కు అత్యున్నత “వీరచక్ర”

ఇండియన్ ఎయిర్ ఫోర్స్ వింగ్ కమాండర్ అభినందన్ వర్ధమాన్..ఇతడో నిలువెత్తు పరాక్రమానికి, ధైర్యసాహసాలకు నిదర్శనం. ఇప్పుడు ఆ వీరుడికి అత్యున్నత పురస్కారం దక్కనుంది. భారత ప్రభుత్వం ఉన్నత మిలటరీ పురస్కారంతో అభినందన్ ను సత్కరించనున్నట్లు తెలుస్తోంది. బాలకోట్ లోని ఉగ్రవాద శిబిరాలపై వైమానిక దాడుల అనంతరం గగనతలంలో జరిగిన పోరులో పాక్ ఎఫ్ -16  విమానాన్ని అభినందన్ తన  మిగ్ -21 బైసన్ యుద్ధ విమానంతో కూల్చేశారు.  అనంతరం అనుకోకుండా పాకిస్థాన్ కు చిక్కాడు. దాయాది చేతిలో చిత్రహింసలు అనుభవించాడు. చివరకు భారత ప్రభుత్వం తెచ్చిన ఒత్తిడికి తలొగ్గి రెండు రోజుల తర్వాత అతడిని మన దేశానికి అప్పగించింది పాక్ ప్రభుత్వం. ఇందుకుగానూ కేంద్రం ఆయనకు వీరచక్ర పురస్కారం అందించనున్నట్లు సమాచారం. పరమవీర చక్ర, మహావీర చక్ర పురస్కారాల తర్వాత అత్యున్నత మిలటరీ పురస్కారం వీరచక్ర. వర్థమాన్ తో పాటుగా బాలాకోట్ లోని జైషే మహమ్మద్ ఉగ్రవాద శిబిరాలపై బాంబులు జారవిడిచిన మరో ఐదుగురు మిరాజ్ 2000 ఫైటర్ పైలట్లను కూడా కేంద్రం సత్కరించనున్నట్లు తెలుస్తోంది. వారి సాహసానికి గుర్తింపుగా వాయుసేన మెడల్స్ ను కూడా బహుకరించనుంది.