వాలంటరీ రిటైర్మెంట్ తీసుకున్న వీరచక్ర అభినందన్ వర్ధమాన్.. ఎందుకంటే..?

భారత వాయుసేనలో తన అసమాన ధైర్యసాహసాలతో దేశ ప్రజల హృదయాల్లో చిరస్థాయిగా నిలిచిపోయిన వీరచక్ర గ్రహీత గ్రూప్ కెప్టెన్ అభినందన్ వర్ధమాన్, తన కెరీర్‌లో కీలక మలుపు తీసుకున్నారు. భారత వాయుసేన నుంచి ముందస్తు పదవీ విరమణ పొంది, కమర్షియల్ పైలట్‌గా కొత్త జీవితాన్ని ప్రారంభించారు. ఆయన కొత్త ప్రయాణం పట్ల దేశం మొత్తం ఆసక్తిగా ఎదురుచూస్తోంది. అభినందన్ వర్ధమాన్ గోవాకు చెందిన రీజనల్ ఎయిర్ లైన్స్ సంస్థ ఫ్లై 91లో కమర్షియల్ పైలట్‌గా చేరారు. ఈ సంస్థ ప్రస్తుతం హైదరాబాద్ నుంచి గోవాకు విమాన సర్వీసులను నడుపుతోంది. దేశ రక్షణ రంగంలో ఎనలేని సేవలు అందించిన తర్వాత, ఆయన ఇప్పుడు పౌర విమానయాన రంగంలో తన నైపుణ్యాలను ఉపయోగించుకుంటూ పౌరులకు సేవలు అందించనున్నారు. ఇది భారత వాయుసేన నుంచి ఎంతో మంది సైనికులు తమ రిటైర్మెంట్ తర్వాత కొత్త కెరీర్‌లను ఎంచుకునే ట్రెండ్‌కు నిదర్శనంగా నిలుస్తోంది. అభినందన్ వర్ధమాన్ పేరు వినగానే 2019 ఫిబ్రవరి 27న జరిగిన సంఘటన ఎవరికైనా గుర్తుకు వస్తుంది. 2019 ఫిబ్రవరి 14న పుల్వామాలో జరిగిన ఉగ్రదాడి తర్వాత, ఫిబ్రవరి 26న భారత వాయుసేన పాకిస్థాన్‌లోని బాలాకోట్‌లో ఉగ్రవాద శిబిరాలపై మెరుపుదాడి (ఎయిర్ స్ట్రైక్స్) చేసింది. దీనికి ప్రతీకారంగా పాకిస్థాన్ ఫిబ్రవరి 27న తమ యుద్ధ విమానాలతో భారత గగనతలంలోకి చొరబడింది. అప్పుడు అభినందన్ వర్ధమాన్ మిగ్ 21 ఫైటర్ జెట్‌తో పాకిస్తానీ యుద్ధ విమానాలను వెంబడించారు. ఆ సమయంలో అసాధారణ ధైర్యసాహసాలు ప్రదర్శించి, అధునాతనమైన పాకిస్థానీ ఎఫ్-16 యుద్ధ విమానాన్ని కూల్చివేశారు. ఈ పోరాటంలో ప్రమాదవశాత్తు ఆయన విమానం కూడా కూలిపోయింది.

విమానం కూలిపోవడంతో, అభినందన్ పారాచూట్ సహాయంతో బయటపడి పాకిస్థాన్ భూభాగంలో పడిపోయారు. ఆయన్ను పాకిస్థాన్ రేంజర్లు అదుపులోకి తీసుకున్నారు. శత్రువుల చెరలో ఉన్నప్పటికీ, రహస్యాలను చెప్పాలంటూ హింసించినా, అభినందన్ ఏమాత్రం బెదరలేదు, నోరు మెదపలేదు. ఆయన దృఢ సంకల్పం, దేశభక్తి యావత్ ప్రపంచాన్ని ఆశ్చర్యపరిచింది. దాదాపు మూడు రోజుల పాటు శత్రువుల బందీగా ఉన్న అభినందన్‌ను విడుదల చేయాలంటూ భారత్ అంతర్జాతీయ స్థాయిలో పాకిస్థాన్‌పై తీవ్ర ఒత్తిడి తెచ్చింది. ఫలితంగా, పాకిస్థాన్ ఆయనను భారత్‌కు అప్పగించక తప్పలేదు. ఈ సాహసానికి గుర్తింపుగా అభినందన్ వర్ధమాన్‌కు కేంద్ర ప్రభుత్వం భారతదేశపు ప్రతిష్టాత్మక సైనిక పురస్కారం వీరచక్రను ప్రదానం చేసింది. కాలక్రమేణా ఆయన గ్రూప్ కెప్టెన్ స్థాయికి పదోన్నతి పొందారు. దేశ రక్షణలో కీలక పాత్ర పోషించిన ఈ రియల్ హీరో ఇప్పుడు కొత్త రంగంలో తన సేవలను కొనసాగించనున్నారు. ఆయన ఈ కొత్త ప్రయాణంలో కూడా విజయవంతం కావాలని దేశ ప్రజలు ఆకాంక్షిస్తున్నారు.