పాపం పసివాడు.. నాన్న జైల్లో.. అమ్మ ఎక్కడో తెలియదు.. పుట్పాత్పై కుక్కతో పడుకుంటున్న..
తల్లిదండ్రులు లేని పిల్లల జీవితాలు వర్ణనాతీతం. ఆలనా పాలనా చూసుకునే వ్యక్తులు లేక ఒంటరిగా కుమిలిపోతుంటారు.
Updated on: Dec 18, 2020 | 5:50 AM
తల్లిదండ్రులు లేని పిల్లల జీవితాలు వర్ణనాతీతం. ఆలనా పాలనా చూసుకునే వ్యక్తులు లేక ఒంటరిగా కుమిలిపోతుంటారు. తినడానికి తిండిలేక కట్టుకోవడానికి దుస్తులు లేక పడుకోవడానికి ఇళ్లులేక బాధపడుతుంటారు. చేతికి దొరికన పని చేసుకొని ఆ రోజు గడిస్తే సరిపోతుందనుకుంటారు. అలాంటి అభాగ్యులు దేశంలోని ప్రధాన నగరాల్లో నిత్యం తారసపడుతుంటారు. తాజాగా ఉత్తరప్రదేశ్లో పుట్పాత్పై కుక్కతో పాటు పడుకున్న పిల్లాడి ఫొటో ఇప్పుడు సోషల్మీడియాలో వైరల్గా మారింది. వివరాల్లోకి వెళితే..
ఉత్తరప్రదేశ్లోని ముజఫర్నగర్లో పుట్పాత్పై ఓ బాలుడు కుక్కతో పడుకొని నిద్రిస్తున్నాడు. అడిగితే అతడి పేరు అంకిత్ అని చెబుతున్నాడు. తల్లి, తండ్రి ఎక్కడ, ఏ ఊరు అని వివరాలు అడిగితే ఇలా చెబుతున్నాడు. తండ్రి జైలుకు వెళ్లాడని, తల్లి విడిచిపెట్టి వెళ్లిపోయిందని అంటున్నాడు. తోడుగా ఉన్న డానీ అనే కుక్కతో రోజు పుట్పాత్ పైనే పడుకొంటానని తెలిపాడు. అంకిత్ స్థానికంగా బెలూన్లు అమ్ముతూ, టీ స్టాళ్లలో పనిచేస్తూ పొట్టనింపుకుంటున్నాడు. అయితే ఎముకలు కొరికే చలిలో పుట్పాత్పై కుక్కతో పడుకున్న అంకిత్ ఫొటో ఇప్పుడు సోషల్ మీడియాలో వైరల్గా మారింది. నెటిజన్ల హృదయాలను ద్రవింపజేసింది. ఎవరైనా అంకిత్కు సాయం చేయాలని పోస్ట్లు వెల్లువెత్తుతున్నాయి. అంకిత్ లాంటి పరిస్థితి మరెవరికీ రాకూడదని కోరుకుంటున్నారు.
