కళ్ల నుంచి తరచూ నీరు కారుతోందా? లైట్ తీసుకోకండి..
కళ్ల నుంచి నీరు కారడం చాలా మందిలో కనిపించే సాధారణ సమస్య. దుమ్ము, పొగ, గాలి, ప్రకాశవంతమైన కాంతి లేదా చిన్నపాటి ధూళి కణాలు కంటిలోకి వెళ్లినప్పుడు కళ్లకు చికాకు కలిగి అధికంగా కన్నీళ్లు రావచ్చు. కళ్లలో ఏదైనా అసౌకర్యం ఏర్పడినప్పుడు వాటిని రక్షించుకునేందుకు శరీరం సహజంగా ఎక్కువ కన్నీళ్లను ఉత్పత్తి చేస్తుంది..
కళ్ల నుంచి తరచుగా లేదా నిరంతరం నీరు కారుతుంటే దాన్ని నిర్లక్ష్యం చేయకూడదు. పొడి కళ్ల సమస్య, అలర్జీలు, ఇన్ఫెక్షన్లు, కన్నీటి నాళాలు మూసుకుపోవడం వంటి అనేక కారణాల వల్ల ఈ సమస్య తలెత్తవచ్చు.
కళ్ల నుంచి తరచూ నీరు కారడానికి కారణాలేంటి?
పొడి కళ్ల సమస్య
కళ్లలో తగినంత తేమ లేకపోవడం వల్ల డ్రై ఐ సిండ్రోమ్ ఏర్పడవచ్చు. దీంతో కళ్లలో మంట, దురద, చికాకు లేదా ఇసుక ఉన్నట్టుగా అనిపించవచ్చు. దీనికి ప్రతిస్పందనగా కళ్లలో అధికంగా కన్నీళ్లు ఉత్పత్తి కావచ్చు.
అలర్జీలు, కంటి ఇన్ఫెక్షన్లు
దుమ్ము, పుప్పొడి, పెంపుడు జంతువుల వెంట్రుకలు వంటి అలెర్జీ కారకాల వల్ల కళ్లలో అలర్జీ ఏర్పడవచ్చు. దీంతో కళ్ల నుంచి నీరు కారడంతో పాటు దురద, ఎరుపు వంటి లక్షణాలు కనిపించవచ్చు. కంటి ఇన్ఫెక్షన్లు కూడా అధికంగా కన్నీళ్లు రావడానికి కారణం కావచ్చు.
కన్నీటి నాళాలు మూసుకుపోవడం
కళ్లలో ఉత్పత్తి అయ్యే కన్నీళ్లు సాధారణంగా కన్నీటి నాళాల ద్వారా బయటకు వెళ్లిపోతాయి. అయితే ఈ నాళాలు పాక్షికంగా లేదా పూర్తిగా మూసుకుపోతే కన్నీళ్లు సరిగ్గా బయటకు వెళ్లకుండా కళ్ల నుంచి కారిపోతుంటాయి.
గాలి, దుమ్ము, పొగ
బలమైన గాలి, చల్లని గాలి, పొగ, దుమ్ము, అధిక ప్రకాశం వంటి వాటి వల్ల కళ్లకు చికాకు కలగవచ్చు. ఈ పరిస్థితుల్లో కళ్లను రక్షించుకోవడానికి సహజంగానే ఎక్కువ కన్నీళ్లు ఉత్పత్తి అవుతాయి.
కంటి గాయం లేదా మందుల ప్రభావం
కంటికి గాయం అయిన తర్వాత కూడా అధికంగా కన్నీళ్లు రావచ్చు. అలాగే కొన్ని మందులు లేదా వైద్య చికిత్సల వల్ల కన్నీళ్ల ఉత్పత్తిలో మార్పులు చోటుచేసుకునే అవకాశం ఉంది.
ఎప్పుడు కంటి వైద్యుడిని సంప్రదించాలి?
ఒకటి లేదా రెండుసార్లు కళ్ల నుంచి నీరు కారడం సాధారణమే కావచ్చు. అయితే ఈ సమస్య తరచూ వస్తుంటే లేదా కొన్ని రోజుల పాటు కొనసాగుతుంటే కారణాన్ని తెలుసుకోవడానికి కంటి వైద్య నిపుణుడిని సంప్రదించడం మంచిది.
ముఖ్యంగా కింది లక్షణాలు కనిపిస్తే నిర్లక్ష్యం చేయకండి:
- కంటిలో తీవ్రమైన నొప్పి
- కంటి ఎరుపు లేదా వాపు
- చూపు మసకబారడం
- కాంతిని చూడటంలో ఇబ్బంది
- కంటికి గాయం అయిన తర్వాత కూడా నిరంతరం నీరు కారడం
- కళ్ల నుంచి అధికంగా జిగట స్రావం రావడం
- కళ్లను తెరవడంలో ఇబ్బంది