ట్రావెల్ అలర్ట్..! ఈ దేశాలకు టూర్ ప్లాన్ చేస్తున్నారా..? ముందు ఈ వార్నింగ్ తెలుసుకోండి!

ప్రపంచవ్యాప్తంగా పర్యాటక రంగం వేగంగా కోలుకుంటున్నప్పటికీ, కొన్ని దేశాలు మాత్రం ఇప్పటికీ ప్రయాణికులకు అత్యంత ప్రమాదకరమైన గమ్యస్థానాలుగానే మిగిలిపోయాయి. ప్రకృతి అందాలు, చారిత్రక వారసత్వం, సాంస్కృతిక సంపద ఉన్నప్పటికీ యుద్ధాలు, అంతర్యుద్ధాలు, ఉగ్రవాదం, రాజకీయ అస్థిరత, కిడ్నాప్‌లు, బలహీనమైన చట్టవ్యవస్థ వంటి కారణాలతో ఈ దేశాలకు వెళ్లొద్దని ప్రపంచ దేశాలు తమ పౌరులకు హెచ్చరికలు జారీ చేస్తున్నాయి.

టూరిజం రివ్యూ (Tourism Review) విడుదల చేసిన “2026లో ప్రయాణానికి అత్యంత అనుకూలత లేని 10 దేశాలు” అనే నివేదికలో అంతర్జాతీయంగా గుర్తింపు పొందిన భద్రతా సూచికలు, ప్రయాణ హెచ్చరికలు, రాజకీయ పరిస్థితులు, మానవతా సంక్షోభాలు, ఉగ్రవాద ముప్పు వంటి అంశాలను ఆధారంగా తీసుకుని ఈ జాబితాను రూపొందించారు. ఈ జాబితాలో ఆఫ్ఘనిస్థాన్ మొదటి స్థానంలో ఉండటం విశేషం.

1. ఆఫ్ఘనిస్తాన్ః ఈ జాబితాలో తొలి స్థానంలో ఆఫ్ఘనిస్తాన్ నిలిచింది. దశాబ్దాలుగా కొనసాగుతున్న యుద్ధాలు, తాలిబాన్ పాలన, ఉగ్రవాద దాడులు, రాజకీయ అనిశ్చితి కారణంగా విదేశీ పర్యాటకులకు ఇది అత్యంత ప్రమాదకరమైన దేశంగా పరిగణించబడుతోంది. అనేక దేశాలు తమ పౌరులకు ప్రయాణించవద్దు అనే అత్యున్నత స్థాయి హెచ్చరికలు జారీ చేశాయి.
2. యెమెన్ః అంతర్యుద్ధం, ఆకలి, మానవతా సంక్షోభం, ఉగ్రవాద సంస్థల కార్యకలాపాలు, కిడ్నాప్‌లు, ల్యాండ్‌మైన్‌ దాడులు యెమెన్‌ను ప్రపంచంలోనే అత్యంత ప్రమాదకరమైన దేశాల్లో ఒకటిగా మార్చాయి. వైద్య సేవలు కూడా తీవ్రంగా దెబ్బతిన్నాయి.
3. సిరియాః పురాతన నాగరికతలకు నిలయమైన సిరియా ఇప్పటికీ అంతర్యుద్ధం ప్రభావం నుంచి పూర్తిగా కోలుకోలేదు. డమాస్కస్, పాల్మైరా వంటి చారిత్రక ప్రాంతాలు ఉన్నప్పటికీ భద్రతా పరిస్థితులు ఆందోళనకరంగానే ఉన్నాయి.
4. ఇరాక్ః ఇటీవలి సంవత్సరాల్లో కొంత స్థిరత్వం వచ్చినప్పటికీ, తీవ్రవాద ముప్పు, మతపరమైన ఉద్రిక్తతలు, రాజకీయ అస్థిరత ఇంకా కొనసాగుతూనే ఉన్నాయి. కొన్ని ప్రాంతాలు సురక్షితంగా ఉన్నా, దేశవ్యాప్తంగా ప్రయాణానికి జాగ్రత్తలు అవసరమని నిపుణులు సూచిస్తున్నారు.
5. ఉత్తర కొరియాః ప్రపంచంలో అత్యంత నియంత్రిత దేశాల్లో ఉత్తర కొరియా ఒకటి. విదేశీయులు స్వేచ్ఛగా తిరగలేరు. ప్రభుత్వ అనుమతితోనే పర్యటనలు నిర్వహించాలి. చిన్నపాటి నిబంధన ఉల్లంఘన కూడా తీవ్రమైన చట్టపరమైన చర్యలకు దారితీసే అవకాశం ఉంది.
6. లిబియాః 2011లో జరిగిన అంతర్యుద్ధం తర్వాత లిబియాలో రాజకీయ స్థిరత్వం పూర్తిగా నెలకొనలేదు. సాయుధ మిలీషియాలు, కిడ్నాప్‌లు, అంతర్గత ఘర్షణలు కొనసాగుతుండటంతో పర్యాటకం దాదాపు నిలిచిపోయింది.
7. సెంట్రల్ ఆఫ్రికన్ రిపబ్లిక్ః అపారమైన సహజ వనరులు, వన్యప్రాణులు ఉన్నప్పటికీ, తరచూ జరిగే హింసాత్మక ఘటనలు, సాయుధ మిలీషియాల కార్యకలాపాలు, బలహీనమైన భద్రతా వ్యవస్థ కారణంగా ఈ దేశం ప్రమాదకర జాబితాలో నిలిచింది.
8. మాలిః ప్రపంచ వారసత్వ ప్రదేశమైన టింబక్టుకు ప్రసిద్ధి చెందిన మాలిలో జిహాదీ దాడులు, ఉగ్రవాదం, కిడ్నాప్‌లు, రాజకీయ అస్థిరత కారణంగా విదేశీ పర్యాటకులు గణనీయంగా తగ్గిపోయారు.
9. ఎరిట్రియాః స్థానిక ప్రజల ఆతిథ్యం ఉన్నప్పటికీ, కఠినమైన వీసా నిబంధనలు, ప్రయాణ ఆంక్షలు, ప్రభుత్వ నియంత్రణలు, రాజకీయ పరిమితులు ఈ దేశాన్ని పర్యాటకులకు క్లిష్టమైన గమ్యస్థానంగా మార్చాయి.
10. సోమాలియాః ఈ జాబితాలో పదో స్థానంలో ఉన్న సోమాలియా ఇప్పటికీ ఉగ్రవాద దాడులు, సముద్రపు దొంగతనం, కిడ్నాప్‌లు, వ్యవస్థీకృత నేరాల కారణంగా అత్యంత ప్రమాదకరమైన దేశాల్లో ఒకటిగా కొనసాగుతోంది. ప్రపంచంలోని అనేక దేశాలు ఇక్కడికి ప్రయాణించవద్దని తమ పౌరులకు హెచ్చరిస్తున్నాయి.

ఈ ర్యాంకింగ్ ఎలా రూపొందించారు?

నివేదిక ప్రకారం, దేశాల భద్రతా పరిస్థితులు, రాజకీయ స్థిరత్వం, ఉగ్రవాద ముప్పు, అంతర్జాతీయ ప్రయాణ హెచ్చరికలు, మానవ హక్కుల పరిస్థితులు, ఆరోగ్య సేవలు, అత్యవసర సహాయ వ్యవస్థలు వంటి పలు ప్రమాణాలను పరిగణనలోకి తీసుకుని ఈ జాబితాను రూపొందించారు. అంతర్జాతీయంగా గుర్తింపు పొందిన భద్రతా సూచికలు, ప్రభుత్వ ట్రావెల్ అడ్వైజరీలు, గ్లోబల్ రిస్క్ అంచనాలను విశ్లేషించి ఈ నివేదిక సిద్ధం చేసినట్లు పేర్కొన్నారు.

ప్రయాణికులు ఏమి గుర్తుంచుకోవాలి?

విదేశీ పర్యటనకు వెళ్లే ముందు ఆయా దేశాల తాజా భద్రతా పరిస్థితులు, ప్రభుత్వ ప్రయాణ హెచ్చరికలు, వీసా నిబంధనలు, అత్యవసర సంప్రదింపు వివరాలను తప్పనిసరిగా పరిశీలించాలని నిపుణులు సూచిస్తున్నారు. ఒక దేశంలో చారిత్రక ప్రదేశాలు లేదా ప్రకృతి అందాలు ఉన్నప్పటికీ, భద్రతే ప్రయాణంలో అత్యంత ముఖ్యమైన అంశమని ఈ నివేదిక మరోసారి స్పష్టం చేస్తోంది.

గమనిక: ఈ జాబితా ఒక ప్రైవేట్ ట్రావెల్ నివేదిక ఆధారంగా రూపొందించినది. ఏ దేశానికి ప్రయాణించాలన్నా, ఆయా ప్రభుత్వాల తాజా అధికారిక ట్రావెల్ అడ్వైజరీలను పరిశీలించడం మంచిది.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..