చిన్న సీక్రెట్ మేడమ్.. ఇదొక్కటి చేస్తే.. కాగడ మల్లెలు గుత్తులు గుత్తులుగా పూస్తాయ్..

కాగడమల్లె.. దీనిని కొన్నిచోట్ల కాగడాలు అని, గుత్తులు గుత్తులుగా పూసే లక్షణం వలన స్టార్ జాస్మిన్ లేదా గుత్తి కాగడమల్లె అని కూడా పిలుస్తారు. ఇది మల్లె, విరజాజి కుటుంబానికి చెందిన మొక్క. ఈ జాతిలో బుషీ, తీగ రకాలు అందుబాటులో ఉన్నాయి. టెర్రస్ గార్డెన్‌లలో కుండీలలో పెంచడానికి బుషీ రకాలు అనుకూలం. నేలపైన పెంచినప్పుడు ఇవి బాగా విస్తరించి బుషీగా పెరుగుతాయి. మల్లె పూలు ఎండాకాలంలో విపరీతంగా వస్తాయి. కాగడమల్లె పూలు ఏడాది మొత్తం పూస్తాయి.. మొక్క ఆరోగ్యంగా పెరగాలంటే సరిపడా డ్రైనేజీ ఉండే పెద్ద కంటైనర్లను ఎంచుకోవాలి. సుమారు 100 రూపాయల టబ్‌లు లేదా పెద్ద పెయింట్ బకెట్‌లు దీనికి అనుకూలంగా ఉంటాయి. వీటి అడుగున, ప్రక్కన కూడా సరైన డ్రైనేజ్ రంధ్రాలు ఉండేలా చూసుకోవాలి.

మట్టి మిశ్రమం తయారీకి 30% సేంద్రియ కంపోస్టు (మాగిన పశువుల ఎరువు, వర్మీ కంపోస్ట్ లేదా కిచెన్ వేస్ట్), 30% ఎర్రమట్టి, 30% ఇసుక లేదా వడ్ల పొట్టు (యూనివర్సల్ సాయిల్ నిష్పత్తి) కలపాలి. మట్టిలో నెమటోడ్స్ వంటి పురుగులు రాకుండా వేపపిండిని తప్పనిసరిగా కలపాలి. ఈ మిశ్రమాన్ని ముందుగానే సిద్ధం చేసుకుని నిల్వ చేసుకోవచ్చు.

మొక్కకు ఆరు నుండి ఎనిమిది గంటల సూర్యరశ్మి అవసరం. కాగడమల్లెలో తెలుపు రకంతో పాటు, పైన ఎరుపు, కింద తెలుపు రంగు కలయికతో కూడిన ఎరుపు కాగడమల్లె రకం కూడా ఉంటుంది. నేలపైన నాటిన మొక్కలకు పెద్దగా సంరక్షణ అవసరం లేకున్నా, కుండీలలోని మొక్కలకు ప్రతి 15 రోజులకు ఒకసారి లిక్విడ్ ఫర్టిలైజర్‌లు ఇవ్వాలి. నైట్రోజన్ సమృద్ధిగా ఉండే ఎరువులు మొక్కల ఆరోగ్యకరమైన పెరుగుదలకు తోడ్పడతాయి. అరటి తొక్కలు, బియ్యం కడిగిన నీటిలో నైట్రోజన్ అధికంగా ఉంటుంది. ఈ ద్రావణాలను ఫర్మెంటైజ్ చేసి (రెండు రోజులు పులియబెట్టి), 1:10 నిష్పత్తిలో నీటితో కలిపి మొక్కలకు ఇవ్వాలి. పులియబెట్టే ప్రక్రియను వేగవంతం చేయడానికి కొద్దిగా బెల్లం కలపవచ్చు. ఈ లిక్విడ్ ఫర్టిలైజర్‌లను మొక్కలపై స్ప్రే చేయడం ద్వారా కూడా అవి మరింత తాజాగా మారతాయి.

మల్లె – విరజాజి మొక్కలు కేవలం వేసవిలో పూస్తే, కాగడమల్లె మాత్రం ఏడాది పొడవునా పూస్తుంది. ముఖ్యంగా చలికాలంలో. పూలు రాలిన తర్వాత ఎండు కొమ్మలను కత్తిరించడం (పించింగ్/ప్రూనింగ్) ముఖ్యం. ఇది కొత్త మొగ్గలు ఏర్పడటానికి సహాయపడుతుంది, తద్వారా ఏడాది పొడవునా పూలు లభిస్తాయి. ఈ మొక్కకు తెగుళ్ల బెడద తక్కువగా ఉంటుంది. అయినప్పటికీ, ప్రతి 15 రోజులకు ఒకసారి నీమ్ ఆయిల్‌ను స్ప్రే చేయడం మంచిది. కిచెన్ వేస్ట్ కంపోస్ట్, పశువుల ఎరువు, లేదా వర్మీ కంపోస్ట్ వంటివి 15-20 రోజులకు ఒకసారి కొద్దిగా ఇస్తే సరిపోతుంది. సరైన జాగ్రత్తలు తీసుకుంటే కాగడమల్లెను సులభంగా పెంచవచ్చు. వర్షాలు తగ్గిన తర్వాత, పూలు ఎండిపోయిన కొమ్మలను సగానికి కత్తిరించడం ద్వారా కూడా మరింత అధికంగా పూలు పొందవచ్చు. సారవంతమైన నేల, రెగ్యులర్ ఎరువులు మొక్కను బుషీగా పెరిగేలా చేస్తాయి. ఇలా కాగడమల్లె చెట్టును పెంచుకుని.. విపరీతంగా పూలను పొందండి.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..