ఇంట్లోనే ఈజీగా 100శాతం స్వచ్ఛమైన రోజ్‌వాటర్‌ తయారు చేసుకోండిలా.. అందం, ఆరోగ్యం కోసం..

Pure Rose Water

అందమైన, కాంతివంతమైన చర్మం కోసం మనం రకరకాల క్రీమ్‌లు, టోనర్‌లను ఉపయోగిస్తుంటాం. వీటిలో రోజ్‌ వాటర్‌ ఎప్పుడూ ముందుంటుంది. చర్మానికి తాజాదనాన్ని అందించడంలో, ముఖంపై నిఖార్సైన మెరుపును తేవడంలో గులాబీ నీరు అద్భుతంగా పనిచేస్తుంది. అయితే మార్కెట్లో లభించే రెడీమేడ్ గులాబీ నీటిలో రసాయనాలు కలిసే అవకాశం ఉంటుంది. కాబట్టి, ఎలాంటి కెమికల్స్ లేని, 100శాతం స్వచ్ఛమైన సహజ గులాబీ నీటిని ఇంట్లోనే ఎలా తయారు చేసుకోవాలో ఇక్కడ తెలుసుకుందాం.

కావలసిన పదార్థాలు:

ఇంట్లో గులాబీ నీరు తయారు చేయడానికి పెద్దగా ఖర్చు పెట్టాల్సిన అవసరం లేదు. దీనికోసం కొన్ని తాజా గులాబీ పువ్వులు, తగినంత శుభ్రమైన నీరు, కొన్ని ఐస్ క్యూబ్స్, ఒక లోతైన వెడల్పాటి గిన్నె, ఆ గిన్నె మధ్యలో ఉంచడానికి ఒక చిన్న గిన్నె, మూత ఉంటే సరిపోతుంది.

తయారీ విధానం:

ముందుగా తాజా గులాబీ పువ్వులను నీటితో శుభ్రంగా కడగాలి. ఆ తర్వాత వాటి రేకలను కాడల నుంచి వేరు చేయాలి. ఇప్పుడు ఒక పెద్ద లోతైన గిన్నెను తీసుకుని, దాని మధ్యలో ఒక చిన్న గిన్నెను ఉంచాలి.
ఆ పెద్ద గిన్నెలో గులాబీ రేకలను వేసి, రేకలు మునిగేలా శుభ్రమైన నీటిని పోయాలి. అయితే గుర్తుంచుకోండి, నీరు చిన్న గిన్నె లోపలికి వెళ్లకూడదు. కేవలం పెద్ద గిన్నెలోనే ఉండాలి.

ఇప్పుడు ఆ పెద్ద గిన్నెను స్టవ్ మీద పెట్టి, సరిపోయే మూతతో గట్టిగా కప్పాలి. మూత పెట్టిన తర్వాత, ఆ మూత పైన కొన్ని ఐస్ క్యూబ్స్‌ను ఉంచాలి. ఇలా చేయడం వల్ల లోపల వేడెక్కిన ఆవిరి, ఐస్ తాకిడికి చల్లబడి నీటి బిందువులుగా మారుతుంది. ఆ నీరు నేరుగా మధ్యలో ఉన్న చిన్న గిన్నెలో పడి నిల్వ అవుతుంది. ఈ ప్రక్రియను సుమారు 20 నుంచి 25 నిమిషాల పాటు చిన్న మంటపై జరగనివ్వాలి. ఆ తర్వాత స్టవ్ ఆఫ్ చేసి గిన్నెను చల్లారనివ్వాలి. ఇప్పుడు మూత తీసి చూస్తే, మధ్యలోని చిన్న గిన్నెలో స్వచ్ఛమైన, సహజమైన రోజ్‌ వాటర్‌ రెడీ అవుతుంది.

నిల్వ చేసే విధానం:

ఇలా ఇంట్లో తయారు చేసుకున్న గులాబీ నీరు పూర్తిగా చల్లారిన తర్వాత ఒక శుభ్రమైన, పొడి ఎయిర్‌టైట్ బాటిల్‌లో పోసి ఫ్రిజ్‌లో నిల్వ చేసుకోవాలి. ఇందులో ఎలాంటి ప్రిజర్వేటివ్స్ కలపకపోవడం వల్ల ఫ్రిజ్‌లో ఉంచితే సుమారు 6 నెలల పాటు తాజాగా ఉంటుంది. ఒకవేళ దాని రంగు లేదా వాసన మారితే మాత్రం ఉపయోగించకపోవడమే మంచిది.

మరిన్ని లైఫ్ స్టైల్ న్యూస్ కోసం క్లిక్ చేయండి..