పట్టుచీర అసలైనదా.. నకిలీదా తెలుసుకోవాలా? ఈ 5 చిట్కాలతో నిమిషాల్లో కనిపెట్టేయచ్చు

పట్టుచీరలకు ఉన్న విపరీతమైన డిమాండ్‌ను ఆసరాగా చేసుకుని, మార్కెట్‌లో ప్రస్తుతం అసలు పట్టులాగే కనిపించే నకిలీ చీరలు వెల్లువెత్తుతున్నాయి. మీరు కష్టపడి సంపాదించిన వేల రూపాయలను వెచ్చించి పట్టుచీర కొనేటప్పుడు, అది అసలైనదో కాదో తెలుసుకోవడం చాలా ముఖ్యం. అసలు పట్టును, నకిలీ పట్టును నిమిషాల్లో గుర్తించే కొన్ని సులభమైన మార్గాలను తెలుసుకుందాం.

ఇలా కనిపెట్టేయండి..

అసలు పట్టును గుర్తించడానికి అత్యంత నమ్మదగిన మార్గం ‘బర్నింగ్ టెస్ట్’. చీర కొంగు భాగం నుండి ఒక చిన్న దారాన్ని తీసి కాల్చి చూడాలి. ఆ దారం కాలుతున్నప్పుడు జుట్టు కాలిపోయిన వాసన వస్తే అది 100 శాతం స్వచ్ఛమైన పట్టు అని అర్థం. అంతేకాకుండా, ఆ కాలిన దారం బూడిదను వేళ్లతో నలిపితే అది మెత్తటి పొడిలా అయిపోతుంది. ఒకవేళ ఆ దారం ప్లాస్టిక్‌లా కరిగినా లేదా కాగితం కాలిన వాసన వచ్చినా అది కృత్రిమమైన నకిలీ పట్టు అని గుర్తుంచుకోవాలి.

మరో సులభమైన పద్ధతి ‘టచ్ టెస్ట్’. స్వచ్ఛమైన పట్టును అరచేతితో వేగంగా రుద్దినప్పుడు ఆ ప్రదేశం కొద్దిగా వెచ్చగా అనిపిస్తుంది. అసలు పట్టు చాలా మృదువుగా ఉంటుంది. అదే నకిలీ పట్టు అయితే రుద్దినప్పుడు చల్లగా అనిపించడమే కాకుండా, కాస్త గరుకుగా లేదా మరీ నున్నగా కృత్రిమంగా అనిపిస్తుంది. అలాగే పట్టుచీర మెరుపును కూడా గమనించాలి. అసలు పట్టుపై కాంతి పడినప్పుడు, మీరు చూసే కోణాన్ని బట్టి రంగు మారుతున్నట్లు కనిపిస్తుంది. కానీ నకిలీ చీర ఏ కోణం నుండి చూసినా ఒకేలా తెల్లగా మెరుస్తూ ఉంటుంది.

స్వచ్ఛమైన పట్టు..

ధర, నేత పనితనం కూడా అసలు పట్టును గుర్తిస్తాయి. స్వచ్ఛమైన పట్టు తయారీకి ఎక్కువ ఖర్చవుతుంది కాబట్టి దాని ధర ఎప్పుడూ ఎక్కువే ఉంటుంది. ఎవరైనా అతి తక్కువ ధరకే పట్టుచీర అని ఇస్తుంటే అది నకిలీ అయ్యే అవకాశం ఉంది. చేనేత పట్టుచీర వెనుక భాగంలో నేత కొంచెం అసమానంగా ఉంటుంది, అదే యంత్రంపై తయారయ్యే నకిలీ చీరలు వెనుక కూడా చాలా పర్ఫెక్ట్‌గా ఒకేలా ఉంటాయి. అన్నింటికంటే ముఖ్యంగా, చీర కొనేటప్పుడు దానిపై భారత ప్రభుత్వం ఇచ్చే ‘సిల్క్ మార్క్’ ట్యాగ్ ఉందో లేదో తనిఖీ చేయాలి. ఈ ట్యాగ్ ఉంటే అది నాణ్యమైన పట్టు అని మీరు నిశ్చింతగా నమ్మవచ్చు. ఈ చిన్నపాటి జాగ్రత్తలు పాటిస్తే మీ డబ్బు వృథా కాకుండా అసలైన పట్టుచీరను సొంతం చేసుకోవచ్చు.