వర్షాకాలంలో మీ దాబా ఫ్లోరింగ్ నాచు పట్టిందా? ఈ సింపుల్ ట్రిక్స్తో నిమిషాల్లో శుభ్రం చేయండి!
వర్షాకాలం రాగానే ఇళ్ల దాబాలు, మెట్లు, సిమెంట్ నేలపై పచ్చటి పాచి పేరుకుపోవడం సాధారణంగా చూస్తుంటాం. నేల నిరంతరం తేమగా ఉండటం వల్ల ఏర్పడే ఈ పాచి వల్ల కాళ్లు జారి కిందపడి తీవ్రంగా గాయపడే ప్రమాదం ఉంది. ముఖ్యంగా ఇంట్లో చిన్నపిల్లలు, పెద్దవారు ఉన్నప్పుడు ఇది మరింత ప్రమాదకరం. సోడా లేదా సబ్బు నీటితో ఎంత కడిగినా ఈ పాచి సులభంగా వదలదు. అయితే, ఇంట్లో దొరికే కొన్ని సాధారణ వస్తువులతో సిమెంట్ నేలపై ఉన్న పాచిని శ్రమ లేకుండా ఎలా తొలగించవచ్చో ఇక్కడ తెలుసుకుందాం.
Updated on: Sep 12, 2026 | 8:47 PM
వర్షాకాలంలో దాబా లేదా సిమెంట్ నేలపై పాచి పేరుకుపోయి నేల జారేలా మారడం వల్ల ప్రమాదాలు జరిగే అవకాశం ఉంది. ఈ పాచిని సులభంగా తొలగించడానికి కొన్ని ప్రభావవంతమైన గృహ చిట్కాలు ఎంతగానో ఉపయోగపడతాయి. ఈ సింపుల్ ట్రిక్స్ ద్వారా ఇంటి దాబాను సురక్షితంగా, శుభ్రంగా ఉంచుకోవచ్చు.
బ్లీచింగ్ పౌడర్ ట్రిక్:
పాచిని తొలగించడంలో బ్లీచింగ్ పౌడర్ అత్యంత వేగంగా, ప్రభావవంతంగా పనిచేస్తుంది. ముందుగా పాచి ఉన్న ప్రదేశంలో కొద్దిగా నీటిని చల్లాలి. ఆ తర్వాత బ్లీచింగ్ పౌడర్ను పాచిపై సమానంగా చల్లి, సుమారు 20 నుండి 30 నిమిషాల పాటు అలాగే వదిలేయాలి. అనంతరం గట్టి బ్రష్ లేదా వైపర్ సహాయంతో రుద్ది, మంచి నీటితో కడిగేస్తే పాచి మచ్చలతో సహా పూర్తిగా మాయమవుతుంది.
తెల్ల వెనిగర్, బేకింగ్ సోడా:
రసాయనాలు వాడటం ఇష్టం లేనివారు సహజసిద్ధమైన ఈ పద్ధతిని ఎంచుకోవచ్చు. సమపాళ్లలో నీరు, తెల్ల వెనిగర్ కలిపి, అందులో రెండు చెంచాల బేకింగ్ సోడా వేయాలి. ఈ మిశ్రమాన్ని పాచి పట్టిన ప్రాంతంలో పోసి 15 నిమిషాలు ఉంచాలి. వెనిగర్లోని యాసిడ్ గుణాలు పాచి మూలాలను దెబ్బతీస్తాయి. ఆపై బ్రష్తో రుద్ది నీళ్లతో శుభ్రం చేస్తే నేల కొత్తదానిలా మెరుస్తుంది.
కల్లుప్పు, వేడినీరు:
ఇది అత్యంత చౌకైన, పురాతనమైన చిట్కా. పాచి పట్టిన నేలపై దట్టంగా కల్లుప్పు చల్లి, దానిపై బాగా కాగబెట్టిన వేడినీటిని పోయాలి. ఉప్పు మరియు వేడినీటి తీవ్రతకు పాచి చనిపోయి నేల నుండి ఊడి వస్తుంది. 10 నిమిషాల తర్వాత గట్టి బ్రష్తో ఊడ్చేస్తే సరిపోతుంది.
పాచి శుభ్రం చేసేటప్పుడు కాళ్లకు రబ్బరు చెప్పులు లేదా గ్రిప్ ఉన్న చెప్పులు ధరించాలి. అలాగే బ్లీచింగ్ పౌడర్ వాడేటప్పుడు చేతులకు గ్లౌజులు వేసుకోవడం మంచిది. దాబాపై నీరు నిల్వ ఉండకుండా డ్రైనేజీ రంధ్రాలు సరిగ్గా ఉన్నాయో లేదో చూసుకోవడం ద్వారా పాచి పట్టకుండా నిరోధించవచ్చు.
