Egg Paratha Recipe: జిమ్‌కు వెళ్తున్నారా? ఉడికించిన గుడ్లు పక్కన పెట్టి ఈ ప్రోటీన్ పరాఠా ట్రై చేయండి!

గుడ్డు ఆరోగ్యానికి సిరి.. కానీ దాన్ని వినూత్నంగా ఎలా వండాలో మీకు తెలుసా? సాదా పరాఠా బోర్ కొట్టినప్పుడు, అందులో గుడ్డు మిశ్రమాన్ని చేర్చి చేసే ‘ఎగ్ పరాఠా’ పిల్లల నుండి పెద్దల వరకు అందరినీ ఆకట్టుకుంటుంది. ఉదయం జిమ్‌కు వెళ్లి వచ్చిన తర్వాత లేదా ఆఫీసు హడావుడిలో కడుపు నిండా భోజనం చేయాలనుకున్నప్పుడు ఈ పరాఠా బెస్ట్ ఆప్షన్. దీని తయారీ విధానం కావలసిన పదార్థాల వివరాలు ఇక్కడ ఉన్నాయి.

కావలసిన పదార్థాలు:

గోధుమ పిండి: 1 కప్పు

గుడ్లు: 2

ఉల్లిపాయ: 1 (చిన్న ముక్కలు)

పచ్చి మిరపకాయ: 1

కొత్తిమీర: కొద్దిగా

మసాలాలు: ఉప్పు, కారం (1/4 స్పూన్), మిరియాల పొడి (1/4 స్పూన్)

నూనె లేదా నెయ్యి: కాల్చడానికి

తయారీ విధానం: ముందుగా ఒక గిన్నెలో గోధుమ పిండి, కొద్దిగా ఉప్పు, నీరు కలిపి మెత్తటి ముద్దలా చేసుకోవాలి. దీన్ని ఒక 10 నిమిషాల పాటు పక్కన ఉంచాలి.

ఒక గిన్నెలో రెండు గుడ్లను పగలగొట్టి, అందులో ఉల్లిపాయ ముక్కలు, పచ్చిమిర్చి, కొత్తిమీర, ఉప్పు, కారం మరియు మిరియాల పొడి వేసి బాగా కలపాలి.

పరాఠా చేయడానికి నానిన పిండిని చిన్న ఉండలుగా చేసి, మీడియం సైజు చపాతీల్లా ఒత్తుకోవాలి.

వేడి చేసిన పెనం మీద చపాతీని వేసి రెండు వైపులా లైట్‌గా కాల్చాలి. చపాతీ కొద్దిగా వేగాక, పైన సిద్ధం చేసుకున్న గుడ్డు మిశ్రమాన్ని అంతటా సమానంగా పరచాలి.

ఫినిషింగ్: కొద్దిగా సెట్ అయిన తర్వాత, చపాతీని తిప్పి గుడ్డు వైపు కూడా బాగా ఉడికించాలి. చివరగా కొంచెం నూనె లేదా నెయ్యి రాసి రెండు వైపులా క్రిస్పీగా అయ్యే వరకు కాల్చి తీసేయాలి.