Dragon Chicken: డ్రాగన్ చికెన్.. స్టార్టర్ ప్రియుల కోసం స్పెషల్ వంటకం.. ఇలా చేస్తే ముక్క కరకరలాడుతుంది!

చికెన్ ప్రియుల కోసం ఒక అదిరిపోయే రెసిపీ! సాధారణ చికెన్ వేపుళ్ల కంటే భిన్నంగా, చైనీస్ సాస్‌లు మరియు కరకరలాడే కాజు (జీడిపప్పు) కాంబినేషన్‌లో తయారయ్యే ‘డ్రాగన్ చికెన్’ పిల్లల నుంచి పెద్దల వరకు అందరికీ నచ్చుతుంది. రెస్టారెంట్ స్టైల్ రుచిని మీ కిచెన్‌లోకి తీసుకురావడానికి కావలసిన చిట్కాలు మరియు తయారీ విధానం మీకోసం.

డ్రాగన్ చికెన్ ప్రత్యేకత దాని రంగు అందులో వాడే ‘రెడ్ చిల్లీ పేస్ట్’. ఈ వంటకం తయారీలో రెండు ముఖ్యమైన దశలు ఉన్నాయి: ఒకటి చికెన్ వేయించడం, రెండు డ్రాగన్ సాస్ తయారు చేయడం.

కావలసిన పదార్థాలు:

చికెన్: 250 గ్రాములు (సన్నని పొడవైన ముక్కలుగా కోయాలి)

మారినేషన్ కోసం: అల్లం వెల్లుల్లి పేస్ట్, సోయా సాస్, వెనిగర్, రెడ్ చిల్లీ పేస్ట్, ఎగ్ వైట్, మైదా, కార్న్ ఫ్లోర్.

డ్రాగన్ సాస్ కోసం: ఎండు మిర్చి పేస్ట్, టమోటా కెచప్, సోయా సాస్, వెనిగర్, చక్కెర.

గార్నిష్ కోసం: వేయించిన జీడిపప్పు, ఉల్లికాడలు, క్యాప్సికమ్.

తయారీ విధానం:

మారినేషన్: చికెన్ ముక్కలకు అల్లం వెల్లుల్లి పేస్ట్, సోయా సాస్, వెనిగర్ మరియు కొద్దిగా చిల్లీ పేస్ట్ పట్టించి 20 నిమిషాలు నానబెట్టాలి. వేయించే ముందు ఎగ్ వైట్, మైదా, కార్న్ ఫ్లోర్ వేసి బాగా కలపాలి.

నూనె వేడి చేసి చికెన్ ముక్కలను విడివిడిగా వేస్తూ బంగారు రంగు వచ్చే వరకు కరకరలాడేలా వేయించి పక్కన పెట్టుకోవాలి.

సాస్ తయారీ: ఒక బాణలిలో నూనె వేసి అల్లం, వెల్లుల్లి, ఎండుమిర్చి, ఉల్లిపాయలు, క్యాప్సికమ్ ముక్కలను హై ఫ్లేమ్ మీద వేయించాలి. ఆ తర్వాత సిద్ధం చేసుకున్న రెడ్ చిల్లీ పేస్ట్, టమోటా సాస్, సోయా సాస్, వెనిగర్ మరియు కొద్దిగా చక్కెర వేసి ఉడికించాలి.

ఫినిషింగ్: సాస్ చిక్కబడిన తర్వాత వేయించిన చికెన్ ముక్కలు, వేయించిన జీడిపప్పు వేసి సాస్ అంతా ముక్కలకు పట్టేలా టాస్ చేయాలి. చివరగా ఉల్లికాడలతో గార్నిష్ చేస్తే డ్రాగన్ చికెన్ సిద్ధం!

ముఖ్యమైన చిట్కాలు:

చికెన్ ముక్కలను సన్నని స్ట్రిప్స్‌లా కోస్తేనే అది ‘డ్రాగన్’ లుక్ వస్తుంది.

సాస్ తయారు చేసేటప్పుడు మంట ఎక్కువగా ఉంచితే చైనీస్ వంటకాలకు వచ్చే ఆ ప్రత్యేకమైన రుచి వస్తుంది.

సాస్ మరీ డ్రైగా అనిపిస్తే కొద్దిగా నీళ్లలో కార్న్ ఫ్లోర్ కలిపి పోయవచ్చు.