సినిమా చిత్రీకరణ కంటే గ్రాఫిక్స్‌కే ఎక్కువ ఖర్చు చేస్తోన్న జక్కన్న.. మరో విజువల్ వండర్‌గా ఆర్.ఆర్.ఆర్

Rajamouli spends more budget for vfx: రాజమౌళి సినిమా అంటేనే అద్భుత ‌దృశ్య కావ్యం గుర్తొస్తుంది. జక్కన్న ఇప్పటి వరకు తీసిన సినిమాల్లో గ్రాఫిక్స్, విఎఫ్ఎక్స్‌కు ఎక్కువ ప్రాధాన్యం ఇస్తుంటాడు. మరీ ముఖ్యంగా ఈగ, బాహుబలి చిత్రాల్లో రాజమౌళి గ్రాఫిక్స్‌తో మాయ చేశాడు. ఈ చిత్రాలు తెలుగు సినిమా స్థాయిని అమాంతం పెంచేశాయి. ఇక ఈ స్టార్ డైరెక్టర్ ప్రస్తుతం ఎన్టీఆర్, రామ్ చరణ్ హీరోలుగా ‘ఆర్.ఆర్.ఆర్’ సినిమా తెరకెక్కిస్తోన్న విషయం తెలిసిందే. తాజాగా ఈ చిత్రానికి సంబంధించిన ఓ వార్త ఆసక్తిని రేకెత్తిస్తోంది. సినిమాల్లో విజువల్ ఎఫెక్ట్స్‌కు అధిక ప్రాధాన్యత ఇచ్చే జక్కన్న ఆర్.ఆర్.ఆర్‌లోనూ గ్రాఫిక్స్ ఎక్కువగా ఉండేలా చూసుకుంటున్నాడట. ఇందులో భాగంగా విఎఫ్ఎక్స్ కోసం ప్రత్యేకంగా బడ్జెట్‌ను కూడా కేటాయించారని సమాచారం. ఇక ఈ సినిమా చిత్రీకరణ కంటే.. గ్రాఫిక్స్‌కు అయ్యే ఖర్చే ఎక్కువనే ప్రచారం జరుగుతోంది. గ్రాఫిక్స్ కోసం ఈ స్థాయిలో ఖర్చు చేస్తోన్న తొలి తెలుగు చిత్రం ఇదే అనడంలో ఎలాంటి సందేహం లేదు. ఈ సినిమా కోసం జక్కన్న హాలీవుడ్‌కు చెందిన సాంకేతిక నిపుణుల సహాయం తీసుకుంటున్నాడని టాక్. ఇక పాన్ ఇండియా నేపథ్యంలో తెరకెక్కుతోన్న ఈ సినిమాపై ఇప్పటి నుంచే భారీ అంచనాలున్నాయి. అలియా భట్, ఒలీవియా మోరిస్, అజయ్ దేవగన్, శ్రియా, సముద్ర ఖని వంటి భారీ తారాగణంతో తెరకెక్కుతోన్న ఈ చిత్రం ఇండియన్ సిల్వర్ స్క్రీన్‌పై ఎలాంటి సంచలనాలకు తెరతీస్తుందో చూడాలి.