Man Vs Wild: ‘పిసినారి’ డిస్కవరీ.. చెల్లింపు.. ప్చ్

ప్రముఖ డిస్కవరీ ఛానెల్ వ్యాఖ్యాత బీర్ గ్రిల్స్‌తో కలిసి భారత ప్రధాని నరేంద్ర మోదీ చేసిన సాహసాలను మ్యాన్ వర్సెస్ వైల్డ్‌‌లో సోమవారం రాత్రి ప్రజలు విస్తృతంగా వీక్షించారు. ఇక ఈ షోలో తన చిన్నప్పటి అనుభవాలు, కష్టాలతో పాటు భారత దేశ ఔన్నత్యం, తదితరాలపై బీర్ గ్రిల్స్‌తో పంచుకున్నారు మోదీ. కాగా ఈ షోతో మోదీ క్రేజ్‌ను క్యాష్‌ చేసుకున్న డిస్కవరీ ఛానెల్ వారు మంచి టీఆర్పీలనే ఆర్జించారు. అయితే ఈ ఎపిసోడ్ కోసం పార్క్ నిర్వాహకులకు ముట్టిన అమౌంట్ తెలిస్తే మాత్రం షాక్ అవ్వాల్సిందే.

ఈ ఎపిసోడ్ మొత్తాన్ని డిస్కవరీ ఛానెల్ వారు ఉత్తర ఉత్తరాఖండ్‌లోని జిమ్ కార్బెట్ జాతీయ పార్క్‌లో చిత్రీకరించారు. కాగా అక్కడ షూటింగ్ జరుపుకోవడం కోసం డిస్కవరీ ఛానెల్ వాళ్లు పార్క్ నిర్వాహకులకు కేవలం రూ1.26లక్షలు చెల్లించారట. ఈ ఎపిసోడ్‌ను చేయడం కోసం కొన్ని నెలల క్రితమే ఛానెల్ నిర్వాహకులు తమకు వినతి పత్రాన్ని ఇచ్చారని.. ఎంట్రీ ఫీజుతో పాటు ఇక్కడ ఉండేందుకు వారు డబ్బులు చెల్లించారని పార్క్ డైరక్టర్ ఓ ప్రకటనలో తెలిపారు. ఇదిలా ఉంటే పార్క్‌లోని కాలాఘర్, దికాలా, సాంబార్ రోడ్, గేటియా, ఖిననౌలి తదితర ప్రదేశాల్లో ఈ షూటింగ్ మొత్తం జరిగినట్లు పార్క్ నిర్వాహకులు వెల్లడించారు.