చెప్పకూడదంటూనే.. గుట్టు విప్పేసిన కాజల్!

భారతీయుడు-2 సినిమాలో తన పాత్ర ఏంటనేది కాజల్ అగర్వాల్ బయట పెట్టేసింది. ఈ చిత్రానికి సంబంధించి ఏ విషయాన్ని డైరెక్టర్ శంకర్ బయట పెట్టోద్దనే కండీషన్ పెట్టారని చెబుతూనే.. దానికి సంబంధించి అన్ని విషయాలూ చెప్పేసింది ఓ ఇంటర్వ్యూలో. ఆమెకి ఇచ్చిన పాత్ర గురించి మేకప్ వేసుకోవడం చాలా కష్టంతో కూడుకున్నదని.. దానికి చాలా సమయం పడుతుందని చెప్పుకొచ్చింది ఈ ముద్దుగుమ్మ. మొదట ఈ పాత్ర గురించి విని తను న్యాయం చేయగలనా అని అనుకుందట. ఎందుకంటే అది ఓ పవర్ ఫుల్ రోల్ అట. దానికి కారణం ఏంటంటే.. ఈ సినిమాలో కాజల్‌ది 85 ఏళ్ల బామ్మ పాత్రట.

అయితే కమల్‌కు సరసన కాజల్ నటించనుందని.. ఇదివరకు టాక్ నడిచింది. కానీ నిజానికి ఆమె విలన్ రోల్‌లో కనిపించనుందట. అయితే దీనిపై ఇప్పటివరకూ క్లారిటీ రాలేదు. కాగా.. దాదాపు రెండు దశాబ్దాల తర్వాత ‘భారతీయుడు’ చిత్రానికి సీక్వెల్‌గా ఇప్పుడు ఇండియన్ – 2 సినిమా వస్తోంది. అప్పట్లో భారతీయుడు సినిమా ఓ చరిత్ర సృష్టించింది. దీంతో మళ్లీ కమల్ హాసన్‌‌తోనే డైరెక్టర్ శంకర్ ఈ సినిమాని రూపొందిస్తున్నారు. కాగా రకుల్ ప్రీత్ సింగ్, ఐశ్వర్య రాజేష్, సిద్ధార్థ తదితర నటీనటులు ఇందులో కనిపించనున్నారు.