నీరవ్ మోదీకి బిగ్ షాక్.. రూ. 44.41 కోట్లు జప్తు

పంజాబ్ నేషనల్ బ్యాంక్ కుంభకోణంలో ప్రధాన నిందితుడు నీరవ్ మోదీకి సింగపూర్ హైకోర్టు షాకిచ్చింది. పీఎన్‌బీ మోసం చేసిన కేసులో ఇప్పటికే అరెస్టైన ఆయన కుటుంబసభ్యులకు.. విదేశాల్లో వారికి చెందిన బ్యాంకు ఖాతాలను జప్తు చేయాలంటూ ఈడీకి సింగపూర్ హైకోర్టు ఆదేశాలు జారీ చేసింది. హైకోర్టు ఆదేశాల మేరకు నీరవ్ మోదీ సోదరి పుర్వి మోదీ, బావ మయాంక్ మోహతాల ఖాతాలను అక్కడి బ్యాంకులు జప్తు చేస్తున్నట్లు ఈడీ వెల్లడించింది. ఈ అకౌంట్స్‌లో సుమారు 6.122 మిలియన్‌ డాలర్లు అంటే దాదాపు రూ. 44.41 కోట్లు ఉన్నట్లు పేర్కొంది.

బ్యాంకులను మోసం చేయడం ద్వారా వచ్చిన సొత్తులో ఇది కూడా భాగమేనని, దీన్ని నిందితులు విత్‌డ్రా చేసుకోకుండా చర్యలు తీసుకోవాలని విజ్ఞప్తి చేయడంతో న్యాయస్థానం ఈ మేరకు ఆదేశాలిచ్చినట్లు ఈడీ వెల్లడించింది. ఇప్పటికే నీరవ్‌ మోదీకి స్విస్‌ బ్యాంకుల్లో ఉన్న నాలుగు ఖాతాలను అక్కడి బ్యాంకులు జప్తు చేశాయి. వీటిలో దాదాపు రూ. 283 కోట్ల డిపాజిట్లు ఉన్నాయి. ప్రస్తుతం ఈ కేసును ఈడీ, సీబీఐ తదితర ఏజెన్సీలు విచారణ జరుపుతున్నాయి. గతేడాది జనవరిలో దొంగచాటున విదేశాలకు పారిపోయిన నీరవ్‌ని ఇటీవల లండన్‌లో అక్కడి పోలీసులు అరెస్ట్‌ చేశారు. ప్రస్తుతం ఆయన జైలులో శిక్ష అనుభవిస్తున్నారు.