Post Office Monthly Scheme: ఇన్వెస్ట్‌మెంట్‌కు తగిన రాబడినిచ్చే పోస్టాఫీస్‌లో మంత్లీ ఇన్‌కమ్ స్కీమ్..

Post Office Monthly Scheme:ప్రస్తుతం ప్రభుత్వ ఉద్యోగాలు చేసేవారికంటే ప్రైవేట్ రంగంలో ఉద్యోగం చేసేవారే ఎక్కువ. దీంతో ఉద్యోగం నుంచి రిటైర్మెంట్ తర్వాత జీవితానికి భద్రత కావాలని ప్రతి ఒక్కరూ భావిస్తారు. దీంతో చేతిలో డబ్బులున్నప్పుడు వాటిని ఎక్కడైనా పెట్టుబడిగా పెట్టాలని ఆలోచిస్తారు. తమ ఇన్వెస్ట్‌మెంట్‌కు తగిన రాబడి రావాలని కోరుకుంటారు. అలాంటి వారికోసమే పోస్టాఫీస్‌లో ఒక మంచి ఆప్షన్ అందుబాటులో ఉంది. ఇక్కడ డబ్బులు పెట్టినా ఎటువంటి రిస్క్ లేకుండా రాబడి పొందొచ్చు. పోస్టాఫీస్ పలు రకాల స్కీమ్స్ అందిస్తోంది. వీటిల్లో మంత్లీ ఇన్‌కమ్ స్కీమ్ కూడా ఒకటి ఉంది. ఈ స్కీమ్ గురించి వివరాలను తెలుసుకుందాం..!

పోస్టాఫీస్ మంత్లీ స్కీమ్‌లో చేరితే ప్రతి నెలా డబ్బులు వస్తాయి. సింగిల్ లేదా జాయింట్ అకౌంట్ తెరవొచ్చు. ఈ పధకంలో కనీసం రూ.1,000 నుంచి ఇన్వెస్ట్ చేయొచ్చు. అయితే వెయ్యి రూపాయలు పెట్టడం వల్ల పెద్దగా లాభం ఉండదు. కానీ ఒక్కసారిగా మనం పెట్టిన మొత్తాన్ని తీసుకోవచ్చు. అయితే ఈ స్కీమ్‌లో ఎవరైనా గరిష్టంగా రూ.4.50,000 వరకు ఇన్వెస్ట్ చేయొచ్చు. జాయింట్ అకౌంట్ అయితే రూ. 9,00,000 కూడా డిపాజిట్ చేసే వీలుంది. ఒకేసారి డబ్బులు పెట్టాలి. తర్వాత ప్రతి నెలా రాబడి పొందొచ్చు. రిటైర్ అయిన ఉద్యోగులకు, సీనియర్ సిటిజన్స్‌కు ఈ స్కీమ్ మంచి అనువుగా ఉంటుంది. ఎవరైనా, ఎ వయసు వారైనా దగ్గరలోని పోస్టాఫీస్‌కు వెళ్లి మంత్లీ ఇన్‌కమ్ స్కీమ్‌లో చేరొచ్చు.

ఈ స్కీమ్ లో చేరడానికి పెద్దగా కష్టపడాల్సిన అవసరం కూడా లేదు. జస్ట్ ఐడీ ప్రూఫ్, అడ్రస్ ప్రూఫ్, రెండు పాస్‌పోర్ట్ సైజ్ ఫోటోలు వెంట తీసుకెళ్తే చాలు. పోస్టాఫీస్‌లో ఫామ్ నింపి ఈ డాక్యుమెంట్లు అందించి మంత్లీ ఇన్‌కమ్ అకౌంట్ తీసుకోవచ్చు. ఈ స్కీమ్ లో పెట్టిన డబ్బును ఐదేళ్ల తర్వాత వెనక్కి తీసుకోవచ్చు. అంతవరకు ఆ పెట్టుబడికి నెలనెలా వడ్డీ వస్తుంది. ఈ పధకంలో డబ్బు పెట్టిన వారికి ప్రస్తుతం 6.6 శాతం వడ్డీ ఇస్తున్నారు. ఉదాహరణకు ఎవరైనా మంత్లీ స్కీమ్‌లో జాయింట్ అకౌంట్ తెరవాలని భావించి అందులో తొమ్మిది లక్షల రూపాయలను డిపాజిట్ చేస్తే.. ఆ పెట్టుబడికి వడ్డీగా ఏడాదికి రూ. 59,400 వస్తుంది. అంటే నెలకు వడ్డీగా సుమారు రూ. 5, 000 వస్తాయన్నమాట. సో పోస్టాఫీస్‌లో ఈ స్కీమ్‌లో ఇన్వెస్ట్ చేస్తే మన డబ్బు క్షేమం.. నెలనెలా ఆదాయానికి ఆదాయం లభిస్తుందన్న మాట.

Also Read: భానుడికి చిహ్నంగా భావించే ఈ రేగు పండులో ఎన్ని ఔషధ గుణాలున్నాయో తెలుసా..!