టీడీపీ అధినేత చంద్రబాబుకు మంత్రుల కౌంటర్..హైటెన్షన్‌ డైలాగ్‌లతో హీటెక్కిన ఏపీ పాలిటిక్స్

హైటెన్షన్‌ డైలాగ్‌లు వదులుతూ చెడుగుడు నాని స్వ్కేర్‌ ఆడుకున్నారు. రాయపూడి జనభేరి సభలో చంద్రబాబు చేసిన ప్రతి విమర్శకు కౌంటర్లు ఇచ్చారు. ఒకరిని మించి మరొకరు అటాక్‌ చేశారు. చంద్రబాబు చౌదరి అంటూ మంత్రి పేర్ని నాని సెటైర్లు వేస్తే… ఫేక్‌ జాతీయ పార్టీ నేత అంటూ తనదైన శైలిలో మాట్లాడారు మరో మినిస్టర్‌ కొడాలి నాని.

టీడీపీ అధినేత చంద్రబాబుపై మంత్రి పేర్ని నాని విమర్శలు గుప్పించారు. చంద్రబాబు వయసుకు తగ్గట్టు మాట్లాడటం లేదని ఆక్షేపించారు. చంద్రబాబు పోరాటమంతా ఆయన తనయుడు లోకేష్ కోసమేనని చెప్పారు. రాష్ట్రానికి మంచి చేసేలా చంద్రబాబు వ్యవహరించాలని పేర్ని నాని సూచించారు. చంద్రబాబు ఇచ్చే దొంగ సర్టిఫికెట్ తమకు అక్కర్లేదని చెప్పారు. భవిష్యత్‌లో టీడీపీ మట్టి కొట్టుకుపోవడం ఖాయమని జోస్యం చెప్పారు. రాజధానిలోని వారు భూమి వద్దు.. ప్లాట్లు కావాలని కోరుతున్నారని తెలిపారు. భూమి వద్దు.. ప్లాట్లు కావాలనే వారు రైతులెందుకు అవుతారు? అని పేర్ని నాని ప్రశ్నించారు.

ఇక టీడీపీపై మంత్రి కొడాలి నాని తీవ్ర విమర్శలు గుప్పించారు. టీడీపీ జాతీయ పార్టీ అని నిరూపిస్తే రాజకీయాల నుంచి తప్పుకుంటానని కొడాలి నాని విమర్శించారు. టీడీపీ అధినేత చంద్రబాబు రాజకీయంగా బతకడు… బీజేపీని బతకనివ్వడని ధ్వజమెత్తారు. చంద్రబాబు రాజకీయాల్లో ఉంటేనే జగన్‌కు 175 సీట్లు వస్తాయని ఆయన ధీమా వ్యక్తం చేశారు. 23 సీట్లు మాత్రమే ఇచ్చినా ఇంకా ఏం చేస్తారంటూ తనదైన తరహాలో విమర్శలు గుప్పించాడు. చంద్రబాబును కుప్పంలో ఓడించి రాజకీయంగా ఇంటికి పంపుతామని మండిపడ్డారు. చంద్రబాబు ఒకే రాజధాని కోరుకుంటే పదవికి రాజీనామా చేయాలని ఆయన హితవు పలికారు. అమరావతి రైతులపై ప్రేమ ఉంటే టీడీపీ ఎమ్మెల్యేలతో రాజీనామా చేయించాలని కొడాలి నాని డిమాండ్ చేశారు.