ఒకే ఒక్క గ్రాముతో వందల కేజీల బంగారం కొనొచ్చు.. ప్రపంచంలోనే అత్యంత ఖరీదైన లోహం ఇదే..

ప్రస్తుతం మార్కెట్‌లో బంగారం, వెండి ధరలు ఆకాశాన్ని తాకుతున్నాయి. సామాన్యులకు ఇవి అందని ద్రాక్షలా మారుతున్నాయి. అయితే ప్రపంచంలో బంగారం కంటే కొన్ని లక్షల రెట్లు ఖరీదైన లోహం ఒకటి ఉందని మీకు తెలుసా? దాని పేరు కాలిఫోర్నియం. దీని ధర వింటే కళ్లు బైర్లు కమ్మడం ఖాయం. ఒక గ్రాము కాలిఫోర్నియం కొనాలంటే ఏకంగా 200 కిలోల బంగారం అమ్మాల్సిందే. అవును..కాలిఫోర్నియం అనేది బంగారం లేదా వెండి లాగా భూమిలో సహజంగా దొరికే లోహం కాదు. ఇది ఒక సింథటిక్ మూలకం. 1950లో అమెరికాలోని బర్కిలీలో ఉన్న కాలిఫోర్నియా విశ్వవిద్యాలయ శాస్త్రవేత్తలు దీనిని ల్యాబ్‌లో సృష్టించారు. అందుకే దీనికి ఆ రాష్ట్రం పేరు మీదగా కాలిఫోర్నియం అని పేరు పెట్టారు.

ధర ఎందుకు అంత ఎక్కువగా ఉంది?

ఒక గ్రాము కాలిఫోర్నియం ధర సుమారు 27 మిలియన్ డాలర్లు అంటే భారత కరెన్సీలో దాదాపు రూ. 239 కోట్లు. దీనిని అణు రియాక్టర్లలో ఇతర మూలకాలను న్యూట్రాన్లతో సుదీర్ఘ కాలం ఢీకొట్టించడం ద్వారా తయారు చేస్తారు. ప్రపంచంలో కేవలం కొన్ని దేశాల్లో, కొన్ని ల్యాబ్‌లలో మాత్రమే దీనిని తయారు చేసే సాంకేతికత ఉంది. ఇది అత్యంత శక్తివంతమైన రేడియోధార్మిక మూలకం. దీనిని నిల్వ చేయడం, రవాణా చేయడం అత్యంత క్లిష్టమైన, ఖరీదైన ప్రక్రియ.

దీని వల్ల ఉపయోగాలు ఏంటి?

ఇంత ఖరీదైన లోహాన్ని ఆభరణాల తయారీలో అస్సలు వాడరు. దీని వల్ల అద్భుతమైన ప్రయోజనాలు ఉన్నాయి..

క్యాన్సర్ చికిత్స: ఇతర చికిత్సలు పని చేయని సమయంలో క్యాన్సర్ కణాలను నాశనం చేసే న్యూట్రాన్ థెరపీలో కాలిఫోర్నియం-252ను ఉపయోగిస్తారు.

అణు పరిశ్రమ: అణు రియాక్టర్లను ప్రారంభించడానికి ఇది స్టార్టర్‌గా పనిచేస్తుంది.

అంతరిక్ష పరిశోధన: అంతరిక్ష నౌకల్లోని పరికరాల పరీక్షల్లో దీనిని వాడతారు.

భద్రత: గనుల్లో బంగారం, వెండి నిల్వలను గుర్తించడానికి, చమురు బావుల అన్వేషణలో దీని పాత్ర కీలకం.