Heal: వైద్యం మాత్రమే కాదు.. మనిషిని స్వస్థపరచడం

ఆధునిక వైద్యం గత కొన్ని దశాబ్దాల్లో అద్భుతమైన పురోగతిని సాధించింది. ఒకప్పుడు నయం చేయలేనివిగా భావించిన ఎన్నో వ్యాధులకు నేడు సమర్థవంతమైన చికిత్సలు అందుబాటులో ఉన్నాయి. అత్యాధునిక పరీక్షలు, మందులు, శస్త్రచికిత్సలు, సాంకేతిక పరిజ్ఞానం వైద్యరంగాన్ని పూర్తిగా మార్చేశాయి. అయినప్పటికీ, రోగులు, వైద్యులు, ఆసుపత్రులు.. ఎవరూ పూర్తిగా సంతృప్తిగా లేని పరిస్థితి ఎందుకు ఏర్పడింది? డాక్టర్ ప్రసాద్ మల్లిపూడి రచించిన Heal ఈ ప్రశ్నకు సమాధానం వెతికే ప్రయత్నం చేస్తుంది.

నాలుగు దశాబ్దాలకు పైగా వైద్యరంగంలో విద్యార్థిగా, వైద్యుడిగా, సర్జన్‌గా, ఉపాధ్యాయుడిగా, మెంటర్‌గా, రోగిగా, సంరక్షకుడిగా పొందిన అనుభవాల ఆధారంగా రచయిత ఆధునిక ఆరోగ్యవ్యవస్థను పరిశీలించారు. రోగి–వైద్య సంబంధంలో వచ్చిన మార్పులు, పెరుగుతున్న వైద్య ఖర్చులు, వాణిజ్యీకరణ, భయం, అపోహలు, అధిక అంచనాలు వంటి అంశాలను ఆయన ఈ పుస్తకంలో చర్చించారు.

ఈ పుస్తకంలోని ప్రధాన భావనల్లో ఒకటి ‘ఎక్స్‌పెక్టేషన్–రియాలిటీ (E-R) ఇండెక్స్’. అంటే మనం వైద్యం నుంచి ఆశించేది, వాస్తవంగా లభించేది .. ఈ రెండింటి మధ్య ఉన్న అంతరం. ఒకప్పుడు ఆధునిక వైద్యం ప్రజల అంచనాలకు మించి అద్భుతమైన ఫలితాలను ఇచ్చింది. దీంతో వైద్యంపై నమ్మకం పెరిగింది. అయితే వైద్యం అభివృద్ధి చెందుతున్న కొద్దీ అంచనాలు కూడా పెరిగాయి. ప్రతి వ్యాధికి అద్భుతమైన ఫలితం రావాలని, ప్రతి రోగి పూర్తిగా కోలుకోవాలని ఆశించడం మొదలైంది. కానీ వైద్యం ఎంత అభివృద్ధి చెందినా ప్రతి వ్యాధిని, ప్రతి రోగిని, ప్రతి సందర్భంలోనూ నయం చేయడం సాధ్యం కాదు.

ఈ అంచనాల సమస్య వైద్యులకూ వర్తిస్తుందని రచయిత చెబుతారు. వైద్య విద్య మరింత సుదీర్ఘమైంది, ప్రత్యేక వైద్య విభాగాలు పెరిగాయి, బాధ్యతలు పెరిగాయి. ఒక వ్యాధిని నయం చేయలేకపోవడం కూడా కొన్నిసార్లు వైద్యుడి వైఫల్యంగా భావించబడుతోంది. ఫలితంగా రోగులు మాత్రమే కాకుండా వైద్యులు కూడా ఒత్తిడి, భయం, అసంతృప్తిని ఎదుర్కొంటున్నారు.

ప్రస్తుత ఆరోగ్యవ్యవస్థలోని అనేక సమస్యలకు రచయిత మూడు ప్రధాన కారణాలను గుర్తిస్తారు. తగినంత జ్ఞానం లేకపోవడం, పెరిగిన అంచనాలు, భయం. వ్యాధి గురించి సరైన అవగాహన లేకపోవడం, సామాజిక మాధ్యమాలు, ఇతర వనరుల ద్వారా వ్యాపించే అపోహలు భయాన్ని మరింత పెంచుతున్నాయని ఆయన అభిప్రాయపడుతున్నారు. వైద్యులపై నమ్మకం తగ్గడం కూడా ఈ సమస్యను తీవ్రతరం చేస్తోంది.

అయితే Heal కేవలం సమస్యలను ఎత్తిచూపే పుస్తకం కాదు. పరిష్కారానికి కూడా దిశానిర్దేశం చేస్తుంది. రోగులు సరైన జ్ఞానాన్ని సంపాదించాలి, వైద్యులు–రోగులు ఒకరి దృక్కోణాన్ని మరొకరు అర్థం చేసుకోవాలి, అంచనాలు వాస్తవికంగా ఉండాలి, అనవసరమైన భయాన్ని తగ్గించాలి. ఆరోగ్యవ్యవస్థ మరింత పారదర్శకంగా, రోగి-కేంద్రితంగా మారాల్సిన అవసరాన్ని రచయిత నొక్కిచెబుతారు.

అంతిమంగా, Heal చెప్పే ముఖ్యమైన సందేశం ఏమిటంటే.. వైద్యం అంటే కేవలం వ్యాధిని నయం చేయడం కాదు; బాధలో ఉన్న మనిషికి ధైర్యం, గౌరవం, నమ్మకం, సానుభూతి అందించడం కూడా వైద్యంలో అంతర్భాగమే. ఒక ఆరోగ్యకరమైన వైద్యవ్యవస్థను నిర్మించాలంటే వైద్యసాంకేతికతతో పాటు మానవత్వం కూడా అవసరం. అదే నిజమైన ‘హీలింగ్’.