డిఫరెన్స్ ఉంది..’అర్జున్ రెడ్డి’ మూవీపై వెబ్‌సైట్‌కు ‘ఓ బేబీ’ క్లాస్

‘అర్జున్ రెడ్డి’ సినిమా టాలీవుడ్‌లో ఎటువంటి సెన్సేషన్ క్రియేట్ చేసిందో స్పెషల్‌గా చెప్పాల్సిన పనిలేదు. అందుకే, తెలుగులో సూపర్ డూపర్ హిట్ అయిన ఈ సినిమాను హిందీలోనూ రీమేక్ చేశారు. తెలుగులో తెరకెక్కించిన దర్శకుడు సందీప్ రెడ్డి వంగానే షాహిద్ కపూర్ హీరోగా ‘కబీర్ సింగ్’ టైటిల్‌తో తెరకెక్కించాడు.

అయితే, ఈ సినిమాలోన హీరో, హీరోయిన్‌ని చెంప దెబ్బలు కొట్టడంపై ఓ రివ్యూ రైటర్ ఘాటుగా విమర్శలు చేశారు. వీటిపై దర్శకుడు సందీప్ రెడ్డి ఓ ఇంటర్వ్యూలో స్పందిస్తూ.. ‘ఒకరిని ఒకరు చెంపపై కొట్టుకునే స్వేచ్ఛ లేకపోతే వారి మధ్య ప్రేమ ఉంటుందని నేను అనుకోను’ అని  అన్నారు.

సందీప్ రెడ్డి చేసిన కామెంట్లపై సమంత అసహనం వ్యక్తం చేసింది. ఆ కామెంట్లపై ఆమె ఇన్‌స్టాగ్రామ్‌లో ‘డీప్లీ డిస్టర్బింగ్’ అని ఫోస్ట్ చేసింది.

సమంత చేసిన ఈ కామెంట్‌ను పట్టుకుని ఓ వెబ్‌సైట్ సమంతవి ‘డబుల్ స్టాండర్డ్స్’ అంటూ ట్వీట్ చేసింది. ‘అర్జున్ రెడ్డి’ సినిమా వచ్చినప్పుడు మూవీ తనకు నచ్చిందంటూ సమంత చేసిన ట్వీట్ ను, ప్రస్తుతం ఇన్‌స్టాగ్రామ్ స్టోరీ ఇమేజ్‌ను కలిపి ట్వీట్ చేసింది.

అయితే, ఈ ట్వీట్‌పై సమంత సదరు వెబ్‌సైట్‌కు కాస్త గట్టిగానే క్లాస్ పీకింది… ‘సినిమాను ఇష్టపడటం, ఒకరి కామెంట్‌తో ఏకీభవించకపోవడం రెండు వేర్వేరు విషయాలు. ‘అర్జున్ రెడ్డి’ కథ నాకు నచ్చింది. కానీ ప్రేమ అంటే చుట్టుపక్కల ఉన్నవాళ్ల చెంపలు పగలగొట్టే స్వేచ్ఛ అని చెప్పడం నాకు నచ్చలేదు’ అని  ట్వీట్ చేసింది. ప్రస్తుతం ఈ టాపిక్‌పై భారీగా చర్చ నడుస్తోంది. దర్శకుడు సందీప్ రెడ్డిని సపోర్ట్ చేస్తూ కొన్ని వెబ్‌సైట్లు, సమంతకు మద్దతుగా మరికొన్ని వెబ్‌సైట్లు..సోషల్ మీడియా వేదికగా వార్‌కు తెరతీశాయి.