Krishna Vamsi: ఆ సాంగ్ కోసం కొట్టుకునేంత పనైంది.. షూట్ పూర్తయ్యాక RGV‌కి చూపించగా..

టాలీవుడ్ దర్శకుడు కృష్ణవంశీ, తన కెరీర్‌లో రామ్ గోపాల్ వర్మతో జరిగిన ఒక ఆసక్తికర సంఘటనను ఇటీవల ఓ ఇంటర్వ్యూలో పంచుకున్నారు. ఈ సంఘటన గులాబీ చిత్రంలోని “బీట్ ఇన్ మై హార్ట్” పాట చిత్రీకరణ సమయంలో చోటు చేసుకుంది. సినిమాలోని మొత్తం పాటను కేవలం బైక్‌పైనే చిత్రీకరించాలని వర్మ ప్రతిపాదించగా, కృష్ణవంశీ ఈ ఆలోచనను తీవ్రంగా వ్యతిరేకించారు. ఈ విధమైన చిత్రీకరణ ప్రేక్షకులకు విసుగు తెప్పిస్తుందని వాదించారు. షోలే, ఆరాధన లాంటి చిత్రాల్లో బైక్ సన్నివేశాలు ఉన్నప్పటికీ, పూర్తి పాటను బైక్‌పై చిత్రీకరించడం సరికాదని అభిప్రాయపడ్డారు.

ఈ విషయమై దాదాపు మూడు గంటల పాటు తీవ్ర చర్చ జరిగింది. వర్మ తన వాదనను గట్టిగా వినిపించారు. కృష్ణవంశీ కూడా తన ఆలోచనపై గట్టిగా ఉన్నారు. బడ్జెట్ గురించి ఆలోచించవద్దని, అదనంగా 10 నుంచి 20 లక్షలు ఖర్చు చేసి అండమాన్‌ వెళ్లి రెండు పాటలు చిత్రీకరించమని వర్మ సూచించారు. అయితే, కృష్ణవంశీ అరకులోనే ఒక పాటను పూర్తి చేయడానికి మొగ్గు చూపారు. ఈ చర్చ చివరికి వాదనగా మారి, వర్మ అసంతృప్తితో “సావు పో నువ్వు” అంటూ ముగించినట్లు కృష్ణవంశీ గుర్తుచేసుకున్నారు.

తరువాత రోజు సాయంత్రం, కృష్ణవంశీ వైజాగ్ వెళ్లి పాటను చిత్రీకరించి, ఎడిట్ చేశారు. ఆ సమయంలో రామ్ గోపాల్ వర్మ తన రంగీలా సినిమాకు అమెరికన్ డబ్బింగ్ ఆర్టిస్ట్‌తో ప్రసాద్ డబ్బింగ్ థియేటర్‌లో డబ్బింగ్ పనులు చేయిస్తున్నారు. ఈ సమయంలో, వర్మ కృష్ణవంశీని పిలిచి అన్నపూర్ణ ప్రివ్యూ థియేటర్‌లో పాటను చూడమని చెప్పారు. పాట చూసిన వర్మ మొదట మౌనంగా ఉండిపోయారు. కృష్ణవంశీ వర్మ స్పందన కోసం చూస్తుండగా, వర్మ పాటను మళ్లీ ప్లే చేయమని కోరారు. రెండవసారి చూసిన తర్వాత, వర్మ ఉత్సాహంగా లేచి, పాటలో కొన్ని మార్పులను సూచించారు.

ఆ తర్వాత రామ్ గోపాల్ వర్మ కృష్ణవంశీ వద్దకు వచ్చి, “ఐ యామ్ సారీ ఎం.సి. ఈ విజన్ నేను చూడలేకపోయాను” అని అన్నారు. ఇది కృష్ణవంశీని ఆశ్చర్యపరిచింది. తరువాత, వర్మ కృష్ణవంశీని అర్జున్ వర్మతో కలిసి ప్రతాప్ డబ్బింగ్ థియేటర్‌కు తీసుకెళ్లారు. అక్కడ అమెరికన్ డబ్బింగ్ పనులను ఆపి, అమీర్ ఖాన్‌కు “యూ షుడ్ సీ దిస్” అని చెప్పి, పాటను ప్రదర్శించారు. తమ మధ్య జరిగిన వాదనను వివరిస్తూ, “ఐ వాస్ డెడ్ ఎగైనెస్ట్ హిమ్. సీ వాట్ దిస్ బాయ్ డిడ్” అని అమీర్ ఖాన్‌తో అన్నారు. అమీర్ ఖాన్ ఆ పాటను మూడు సార్లు చూసి, “ఫెంటాస్టిక్” అని ప్రశంసించారు.