Tollywood : నువ్వు నేను సినిమాకు రాసిన పాటను జయం మూవీలో పెట్టారు.. దెబ్బకు బాక్సాఫీస్ షేక్.. అది ఏ సాంగ్ అంటే..

సంగీత దర్శకుడు ఆర్పీ పట్నాయక్ తన కెరీర్‌లో గుర్తుండిపోయే సినిమా నువ్వు నేను. తన సినీ ప్రయాణంలో ఎన్నో సూపర్ హిట్ పాటలను అందించారు. తాజాగా నువ్వు నేను , జయం చిత్రాల పాటల గురించి, అలాగే ఇతర ఆసక్తికర సంఘటనల గురించి వివరించారు. నువ్వు నేను పాటలు అప్పట్లో ఎంతగా వైరల్ అయ్యాయంటే, సోషల్ మీడియా ఉన్నట్లయితే పట్నాయక్ పేరు ప్రపంచమంతా వినిపించేదని ఆయన అన్నారు. తేజ దర్శకత్వంలో పని చేసేటప్పుడు, తేజ ఒక సిచువేషన్‌ను వివరిస్తే, దానికి తక్షణమే ట్యూన్ కట్టి రికార్డింగ్ దశకు వెళ్లేవారని పట్నాయక్ వెల్లడించారు. ఒకానొక సందర్భంలో, ఒక సిచువేషన్‌కు రెండు పాటలు పుట్టాయని పట్నాయక్ గుర్తుచేసుకున్నారు. అబ్బాయి, అమ్మాయి ఒక పార్టీలో పాట పాడుకునే సిచువేషన్‌కు ట్యూన్ చేయమని తనకు, లిరిక్ రాయమని కులశేఖర్‌కు తేజ సూచించారు. ఇద్దరికీ తెలియకుండానే పట్నాయక్ ఒక ట్యూన్ సిద్ధం చేయగా, కులశేఖర్ లిరిక్ రాశారు. ఆ తర్వాత పట్నాయక్ ట్యూన్‌కు కులశేఖర్ లిరిక్స్, కులశేఖర్ లిరిక్స్‌కు పట్నాయక్ ట్యూన్ చేశారు. ఫైనల్‌గా, చిత్రీకరణ సమయంలో ప్లే చేసినప్పుడు తన ట్యూన్‌కు ఓట్లు వేయడంతో అదే పాటను ఫైనల్ చేశామని తెలిపారు. అయితే, కులశేఖర్ రాసిన పాట కూడా బాగుండటంతో ఆడియోలో చేర్చారు. కానీ అదే ట్యూన్‌ను, లిరిక్స్‌ను మార్చి “ఎవరిని ఏమన్నా మారదు ఈ ప్రేమ” అనే పాటగా జయం క్లైమాక్స్ సిచువేషన్‌కు అనుగుణంగా మళ్లీ ఉపయోగించారని పట్నాయక్ వెల్లడించారు. అసలు నువ్వు నేను కోసం ఈ ట్యూన్ “గున్నమామి కొమ్మ మీద గారాల గోరింక” అనే లిరిక్స్‌తో రూపొందింది.

కాలేజీ నేపథ్యం ఉన్న పాటలకు ఫోక్ టచ్ ఇవ్వడంపై మాట్లాడుతూ.. పట్నాయక్ తన రియలిస్టిక్ అప్రోచ్‌ను వివరించారు. తన 17 సంవత్సరాల చదువులో, బైక్‌లు వేసుకొని, గ్లౌజులు ధరించి, వెస్ట్రన్ సాంగ్స్ పాడుకుంటూ తిరిగే కాలేజీ వాతావరణాన్ని తాను ఎప్పుడూ చూడలేదని, కేవలం క్లాసులో కూర్చుని దరువు వేసి ఫోక్ సాంగ్స్ పాడుకున్న అనుభవమే తనకు ఉందని తెలిపారు. ఈ విషయాన్ని తేజకి చెప్పినప్పుడు, ఆయన కూడా అంగీకరించడంతో మామ, గాజువాక పిల్ల వంటి ఫోక్ టచ్ ఉన్న పాటలు వచ్చాయని పట్నాయక్ వివరించారు.

గాజువాక పిల్ల పాట తనకు గర్వాన్ని, గౌరవాన్ని, ధైర్యాన్ని ఇచ్చిందని పట్నాయక్ అన్నారు. అయితే ఈ పాటకు సంబంధించి ఒక నెగటివ్ సంఘటనను కూడా ఆయన పంచుకున్నారు. ఒక పెళ్లి పార్టీలో, ఒక యువకుడు గాజువాక పిల్ల పాటను రిపీట్ మోడ్‌లో పాడించమని కోరి, డాన్స్ చేస్తూ అలసిపోయి మరణించాడని పట్నాయక్ తెలిపారు. ఒక పాట ఎంత సానుకూల ప్రభావం చూపుతుందో, అతి చేస్తే అంతే ప్రతికూల ప్రభావం చూపుతుందని దీని ద్వారా అర్థమవుతుందని ఆయన పేర్కొన్నారు.

అలాగే, విక్రమ్ నటించిన తొమ్మిది నెలలు సినిమాకు బ్యాక్‌గ్రౌండ్ స్కోర్ చేసిన అనుభవాన్ని పంచుకున్నారు. అప్పట్లో క్రాంతి కుమార్ చివరి దశలో ఉండగా, తక్కువ బడ్జెట్‌లో ఆ సినిమా చేశానని, అది తన రెమునరేషన్ కోసం కాదని, అలాంటి గొప్ప దర్శకుడితో పని చేయాలనే ఉద్దేశంతోనే అని తెలిపారు. ఆ సినిమాలో సౌందర్య అద్భుతంగా నటించినప్పటికీ, విక్రమ్ అప్పుడు అంత పాపులర్ కాకపోయినా, అతని పాత్రలోని స్ట్రగుల్, నెగటివ్ షేడ్స్‌ను సమర్థవంతంగా చూపించిన తీరు చూసి, అతను భవిష్యత్తులో పెద్ద స్టార్ అవుతాడని తాను అప్పుడే అంచనా వేశానని పట్నాయక్ గుర్తుచేసుకున్నారు.

ఎక్కువమంది చదివినవి : Jabardasth Naresh: నెలకు 13 ఈవెంట్స్ చేస్తా.. ఒక్కో ఈవెంట్‏కు ఎంత తీసుకుంటానంటే.. జబర్దస్త్ నరేష్..