అప్పుడు నా సినిమాలో నటించాడు.. ఇప్పుడు స్టార్ హీరో.. అతను ఎంత మారిపోయాడంటే

సీనియర్ నటుడు వడ్డే నవీన్ ఇప్పుడు తిరిగి సినిమాల్లో రాణిస్తున్న విషయం తెలిసిందే. ఒకప్పుడు క్రేజీ హీరోగా రాణించిన ఆయన ఇప్పుడు సెకండ్ ఇన్నింగ్స్ మొదలు ప్రేక్షకులను ఆకట్టుకుంటున్నారు. ప్రస్తుతం వడ్డే నవీన్ నటించిన ట్రాన్స్‌ఫర్ త్రిమూర్తులు అనే సినిమాతో ప్రేక్షకుల ముందుకు రానున్నారు. ఈ సినిమా త్వరలోనే విడుదలకానుంది. కాగా ఈ సినిమా ప్రమోషన్స్ లో భాగంగా నవీన్ ఓ ఇంటర్వ్యూలో మాట్లాడుతూ పలు ఆసక్తికర విషయాలను పంచుకున్నారు.  తన కెరీర్‌లో అత్యంత ఇష్టమైన చిత్రాలను ప్రస్తావిస్తూ, స్నేహితులు, మనసిచ్చి చూడు, నా ఊపిరి వంటి చిత్రాలు తనకు ప్రత్యేకమని తెలిపారు. ముఖ్యంగా నా ఊపిరి సినిమా ఒక విభిన్నమైన జోనర్‌ చిత్రంగా ప్రేక్షకుల హృదయాల్లో చెరగని ముద్ర వేసిందని ఆయన పేర్కొన్నారు.

అలాగే హీరో రవితేజ అద్భుతమైన ఎదుగుదలపై వడ్డే నవీన్ ప్రశంసల వర్షం కురిపించారు. మనసిచ్చి చూడు చిత్రంలో రవితేజతో కలిసి నటించిన రోజులని గుర్తుచేసుకుంటూ, ఆయన అంచెలంచెలుగా ఎదిగిన తీరు తనను ఎంతగానో ఆశ్చర్యపరిచిందని అన్నారు. ” రవితేజ కష్టానికి తగిని గుర్తింపు లభించింది.. అందుకే స్టార్ హీరో అయ్యాడు.. అంత పైకి రావటం అనేది చిన్న విషయం కాదు. ఆయన ఎదుగుదల పట్ల నేను చాలా సంతోషంగా ఉన్నాను” అని నవీన్ వ్యాఖ్యానించారు. రవితేజను కలిసినప్పుడల్లా ఆయన ఎంతో ఆత్మీయంగా, స్నేహపూర్వకంగా ఉంటారని, అప్పటికీ ఇప్పటికీ ఎలాంటి మార్పూ లేకుండా అలాగే ఉంటారని వడ్డే నవీన్ అన్నారు. అదేవిధంగా పరిశ్రమలో అందరితో సానుకూల సంబంధాలను కొనసాగించడమనేది గొప్ప విషయమని ఆయన అభిప్రాయపడ్డారు. తన దృష్టిలో, ఎవరి పని వారు చేసుకుంటున్నారు కాబట్టి, పరిశ్రమలో ప్రతి ఒక్కరూ సానుకూలంగానే వ్యవహరిస్తారని తెలిపారు.

సినిమాలలో హీరోయిన్ల పాత్రల చిత్రీకరణపై ఇటీవల వస్తున్న విమర్శలపైనా వడ్డే నవీన్ తన అభిప్రాయం పంచుకున్నారు. క్రియేటివిటీకి నిర్దిష్టమైన నియమాలు ఉండవని, కొన్నిసార్లు హీరోయిన్ల పాత్రలను సరిగ్గా చిత్రిస్తున్నారని, మరికొన్నిసార్లు సరిగ్గా చూపించట్లేదని అన్నారు. తన దృష్టిలో, సినిమాల్లో ఏ పాత్ర అయినా, అది చిన్నదైనా పెద్దదైనా, దాన్ని సరిగ్గా ఉపయోగించుకోవాలని, వారి పాత్ర పరిధిని స్పష్టంగా చూపాలని, వారి నటనకు ప్రాధాన్యత ఇవ్వాలని నవీన్ తెలిపారు.

మరిన్ని సినిమా వార్తల కోసం ఇక్కడ క్లిక్ చేయండి