మందు, సిగరెట్ అలవాటు లేదు.. కానీ చిన్న వయసులోనే అతను చనిపోయాడు..!

నటుడు రామ్ జగన్ ఓ ఇంటర్వ్యూలో మాట్లాడుతూ.. దివంగత నటుడు అచ్యుత్ మరణం, సినీ పరిశ్రమలో తన ప్రయాణంపై పలు ఆసక్తికర వ్యాఖ్యలు చేశారు. అచ్యుత్ మరణవార్త తనకు తీరని షాక్‌ను మిగిల్చిందని రామ్ జగన్ వివరించారు. తిరుపతికి రైలులో వెళ్తుండగా ఈ విషాద వార్త తెలిసిందని, వెంటనే ప్రయాణం రద్దు చేసుకొని తిరిగి వచ్చేశామని ఆయన గుర్తుచేసుకున్నారు. అచ్యుత్‌కు తాను చాలా సన్నిహితుడినని, చాలా మంచి వ్యక్తి అని, అందరితో ప్రేమగా ఉండేవాడని రామ్ జగన్ అన్నారు. ధూమపానం, మద్యపానం వంటి ఎలాంటి చెడు అలవాట్లు లేని అచ్యుత్ చిన్న వయసులోనే మరణించడం నేటికీ చాలా మందికి ఒక అంతుచిక్కని ప్రశ్నగానే మిగిలిందని పేర్కొన్నారు. ఆయన మరణించినప్పుడు ఫిల్మ్ ఛాంబర్ వద్ద జన సందోహం ఆయన పట్ల ప్రజలకున్న అభిమానాన్ని తెలియజేసిందని వివరించారు.

అనారోగ్యకరమైన అలవాట్లు లేకపోయినా మరణాలు సంభవించడంపై రామ్ జగన్ తన అభిప్రాయాలను పంచుకున్నారు. ఈ సందర్భంగా కన్నడ నటుడు పునీత్ రాజ్‌కుమార్ ప్రస్తావన తెచ్చారు. పునీత్ ఎంతో ఫిట్‌గా ఉండి, నిరంతరం వ్యాయామాలు చేసేవారని, ఆయనకు కూడా చిన్న వయసులోనే గుండెపోటుతో మరణం సంభవించిందని గుర్తు చేశారు. అలాగే, నటుడు ఏవిఎస్ విషయాన్ని కూడా ప్రస్తావించారు. ఏవిఎస్‌కు ధూమపానం, మద్యపానం వంటి అలవాట్లు లేకపోయినప్పటికీ, ఆయనకు కాలేయ సంబంధిత సమస్యలు వచ్చి, చివరి దశలో కాలేయ మార్పిడి చేయించుకోవాల్సి వచ్చిందని తెలిపారు. ఇలాంటి సంఘటనలు చూసినప్పుడు జీవితం కర్మ సిద్ధాంతం ప్రకారమే నడుస్తుందని, ఏ వయసులో ఎవరు మరణిస్తారో అనేది ముందుగానే నిర్ణయించబడి ఉంటుందని తాను నమ్ముతానని రామ్ జగన్ అన్నారు. చెడు అలవాట్లు ఉన్నవారికే అనారోగ్య సమస్యలు వస్తాయన్నది ఒక అపోహ మాత్రమే అని ఆయన అభిప్రాయపడ్డారు.

తన కెరీర్ ప్రస్థానం గురించి మాట్లాడుతూ.. టీవీ పరిశ్రమలో తనకు నిరంతరంగా పని లభించడంతో పాటు, మంచి రెమ్యునరేషన్ కూడా లభించిందని, దీంతో టీవీ ప్రాజెక్టులపైనే ఎక్కువ దృష్టి సారించానని తెలిపారు. సినిమా పట్ల తనకు ఎప్పుడూ ప్రేమ ఉందని, తాను పుట్టిందే సినిమా పరిశ్రమలో అని అన్నారు. టీవీలో లభించిన గొప్ప పాత్రలు, సినిమాల్లో తనకు లభించని పాత్రల కన్నా మెరుగ్గా ఉన్నాయని ఆయన అంగీకరించారు. అయితే, దీనివల్ల సినిమాల్లో పెద్ద అవకాశాలను కోల్పోయి ఉండవచ్చని ఆయన అన్నారు. ఆడియన్స్ కూడా తనను సినిమాల్లో చూడాలని కోరుకుంటారని ఆయన పేర్కొన్నారు.

మరిన్ని సినిమా వార్తల కోసం ఇక్కడ క్లిక్ చేయండి.