‘పింక్’ కాదు.. అలాంటి స్టోరీ కావాలంటోన్న పవన్..?

సినిమాల్లోకి పవన్ కల్యాణ్ రీఎంట్రీపై ఇంకా సందిగ్ధత కొనసాగుతోంది. హిందీలో విజయం సాధించిన ‘పింక్’ రీమేక్‌లో ఆయన నటించబోతున్నారంటూ అధికారిక ప్రకటన వచ్చినప్పటికీ.. పవన్ వెర్షన్‌ మాత్రం మరోలా ఉంది. తాను యాక్ట్ చేస్తానో లేదో తెలీదు కానీ.. సినిమాలను ప్రొడ్యూస్ చేస్తానంటూ ఓ సందర్భంలో చెప్పుకొచ్చాడు పవన్. కానీ ఫిలింనగర్ వర్గాల సమాచారం ప్రకారం పవన్ రీఎంట్రీకి ప్రీ ప్రొడక్షన్ పనులు శరవేగంగా జరుగుతున్నాయని తెలుస్తోంది. వేణు శ్రీరామ్ దర్శకత్వంలో దిల్ రాజు, బోనీ కపూర్ ఈ మూవీని సంయుక్తంగా నిర్మిస్తుండగా.. వారు ప్రీ ప్రొడక్షన్ పనుల్లో బిజీగా ఉన్నారని తెలుస్తోంది. ఇలాంటి నేపథ్యంలో పవన్‌కు సంబంధించిన మరో వార్త టాలీవుడ్‌లో హల్‌చల్ చేస్తోంది.

అదేంటంటే పింక్ రీమేక్‌పై పవన్ అంతగా ఆసక్తిగా లేడన్నది విశ్వసనీయ వర్గాల సమాచారం. పింక్ ఓ మెసేజ్ ఓరియెంటెడ్ కథనే అయినప్పటికీ.. ఈ మూవీతో కాకుండా ఓ పొలిటికల్ థ్రిల్లర్‌లో నటించాలని పవన్ అనుకుంటున్నారట. ప్రభుత్వంపై పోరాటం చేసే ఓ ప్రతిపక్షనేత చివరకు రాష్ట్ర ముఖ్యమంత్రిగా అయ్యేందుకు సాగించిన పోరాటాన్ని హైలెట్ చేస్తూ సినిమా తీయాలన్న ఆలోచనలో పవన్ ఉన్నాడట. ఇక ఇలాంటి స్టోరీలో నటించడం. రాజకీయంగానూ తనకు కలిసి వచ్చే అవకాశాలు ఉన్నాయని పవన్ భావిస్తున్నారట. ఈ మేరకు ఇండస్ట్రీలో ఉన్న అత్యంత సన్నిహితుల వద్ద ప్రస్తావించినట్లు తెలుస్తోంది. ఇక ఈ నిర్ణయానికి వారు కూడా మెచ్చుకోవడం జరిగిందని టాక్. ఇదిలా ఉంటే పవన్ రీఎంట్రీ కోసం అభిమానులు వేయి కళ్లతో ఎదురుచూస్తున్నారు. ఇలాంటి సమయంలో పవన్ ఎప్పుడు రీ ఎంట్రీ ఇవ్వబోతున్నారు..? ఏ కథలో నటించబోతున్నాడు..? ఈ సినిమా ఎప్పుడు విడుదల కానుంది అనే విషయాలు తెలియాలంటే మాత్రం కొద్ది రోజులు ఆగాల్సిందే. కాగా ప్రస్తుతం రాజకీయాల్లో కొనసాగుతున్న పవన్ కల్యాణ్.. ప్రజా సమస్యల తరఫున పోరాటం చేస్తున్నారు. ముఖ్యంగా ఏపీలో వైసీపీ ప్రభుత్వంపై ఆయన విమర్శల పర్వం కొనసాగుతోంది.