చెర్రీ సలహా.. ఎన్టీఆర్ సొంత గ్యారేజ్..?

టాలీవుడ్‌ స్టార్ హీరోలు ఇప్పుడు తమ పంథాను మారుస్తున్నారు. తమ వలన మిగిలిన వాళ్లకు నష్టాలెందుకు అనుకుంటున్నారో..? లేకపోతే లాభాలను వెనకేసుకోవాలనుకుంటున్నారో..? తెలీదు గానీ ఇప్పుడు ప్రతి ఒక్కరు నిర్మాణం వైపు అడుగులు వేస్తున్నారు. ఈ లిస్ట్‌లో ఇప్పటికే మహేష్ బాబు, రామ్ చరణ్, కల్యాణ్ రామ్, నాని, విజయ్ దేవరకొండలు చేరగా.. తాజాగా ఎన్టీఆర్ కూడా చేరబోతున్నట్లు తెలుస్తోంది. అవును త్వరలోనే ఎన్టీఆర్ సొంత ప్రొడక్షన్‌ హౌస్‌ను నిర్మించాలనుకుంటున్నాడట.

ప్రస్తుతం ఎన్టీఆర్ ‘ఆర్ఆర్‌ఆర్’ మూవీ షూటింగ్‌లో బిజీగా ఉన్నాడు. ఈ మూవీ వచ్చే ఏడాది ప్రేక్షకుల ముందుకు రానుంది. ఇక ఈ ప్రాజెక్ట్‌ తరువాత సొంత ప్రొడక్షన్‌పై ఆయన ఓ ప్రకటన ఇవ్వనున్నట్లు తెలుస్తోంది. ఇక దీనికి తన తండ్రి, కుమారుడు పేర్లు కలిసివచ్చేలా ఓ పేరు పెట్టాలని సన్నిహితుల దగ్గర చెప్పినట్లు కూడా టాక్. అయితే ఈ విషయంలో ఎన్టీఆర్‌కు చెర్రీ సలహా ఇచ్చినట్లు తెలుస్తోంది. రామ్ చరణ్ ఇప్పటికే కొణిదెల ప్రొడక్షన్ హౌస్‌ను నిర్మించి.. తన తండ్రితో వరుస సినిమాలను తీస్తున్నాడు. త్వరలో యంగ్ హీరోలతో సినిమాలను నిర్మించేందుకు కూడా రెడీగా ఉన్నాడు. ఈ క్రమంలో సొంత ప్రొడక్షన్ హౌస్ ఉంటేనే మంచిదని చెర్రీ, తారక్‌కు చెప్పినట్లు టాక్. అందుకే ఎన్టీఆర్ ఈ నిర్ణయం తీసుకున్నట్లు సమాచారం. మరి ఇందులో నిజమెంతో తెలియాలంటే కొద్ది రోజులు ఆగాల్సిందే.