ముక్కుకు సర్జరీపై క్లారిటీ ఇచ్చిన నటి అలయ! ఫేస్‌లో మార్పు కామెంట్లపై మండిపాటు

సినిమా ఇండస్ట్రీలో హీరోయిన్ల లుక్స్ మీద సోషల్ మీడియాలో చర్చలు జరగడం సర్వసాధారణం. తాజాగా యువ నటి అలయ ఎఫ్ ఇలాంటి ఒక ఆసక్తికరమైన చర్చకు కేంద్రబిందువుగా మారారు. ముంబైలో జరిగిన ‘లాక్మే ఫ్యాషన్ వీక్’లో ఆమె ర్యాంప్ వాక్ చేసిన వీడియో వైరల్ కావడంతో, ఆమె ముక్కు మరియు పెదవులకు ప్లాస్టిక్ సర్జరీ చేయించుకున్నారంటూ నెటిజన్లు కామెంట్స్ చేయడం మొదలుపెట్టారు. ఈ వార్తలపై అలయ ఎఫ్ తనదైన శైలిలో స్పందిస్తూ క్లారిటీ ఇచ్చారు.

తను ఎలాంటి సర్జరీ చేయించుకోలేదని అలయ స్పష్టం చేశారు. “నా కామెంట్స్ సెక్షన్ లో చాలా మంది నేను సర్జరీ చేయించుకున్నానని అనుకుంటున్నారు. కానీ నేను మీకు ప్రామిస్ చేస్తున్నాను, నేను ఏమీ చేయించుకోలేదు. ఒకవేళ చేయించుకుంటే ఆ విషయాన్ని నేనే మీకు గర్వంగా చెప్పేదాన్ని. నేను ఇలాంటి విషయాలను దాచుకునే రకం కాదు” అని ఆమె పేర్కొన్నారు. ముఖంలో కనిపిస్తున్న మార్పుకు సరైన లైటింగ్, ముఖానికి మసాజ్ చేసుకోవడం, సరిపడా నీరు తాగడం, మంచి అలవాట్లు కారణం కావొచ్చు కానీ సర్జరీ కాదని ఆమె వివరించారు.

గతంలో ముక్కు సర్జరీ

అయితే, గతంలో ఒక టాక్ షోలో పాల్గొన్నప్పుడు ప్లాస్టిక్ సర్జరీ ఆలోచన గురించి అలయ ఆసక్తికర విషయాలు పంచుకున్నారు. తన ముక్కుకు ఎడమ వైపున ఒక చిన్న ‘బంప్’ (చిన్న గడ్డ లాంటి ఉబ్బెత్తు) ఉందని, దానిని సరి చేయించుకోవాలని ఒకప్పుడు అనుకున్నట్లు ఆమె అంగీకరించారు. కానీ అది చాలా చిన్న విషయమని, చాలా మందికి అది అసలు కనిపించదని గ్రహించిన తర్వాత సర్జరీ ఆలోచనను విరమించుకున్నారు. “అది చాలా చిన్న విషయం, దాని కోసం సర్జరీ చేయించుకోవడం అనవసరం” అని ఆమె అప్పట్లో తేల్చి చెప్పారు.

నేటి కాలంలో సెలబ్రిటీల సహజమైన అందం కంటే సర్జరీల మీదే ఎక్కువ చర్చ జరుగుతోంది. అలయ ఎఫ్ ఇచ్చిన ఈ వివరణతో ఆమె అభిమానులు ఊపిరి పీల్చుకున్నారు. టెక్నాలజీ మరియు మేకప్ మాయాజాలం వల్ల ముఖం ఎలా మారినా, అది సహజమైన అందమే అని ఆమె నిరూపించారు. నిజాయితీగా స్పందించిన అలయ తీరును పలువురు నెటిజన్లు మెచ్చుకుంటున్నారు.