Age is just a Number: 68 ఏళ్ల వయసులో పీజీ.. కాలేజీకెళ్లి సైకాలజీ చదువుతున్న మాజీ అధికారి!

68 Year Old Retired Officer Joins Ranchi University

సాధారణంగా చాలామంది ఉద్యోగ విరమణ తర్వాత విశ్రాంతి తీసుకోవాలని భావిస్తారు. కానీ కొందరు మాత్రం వయసుతో సంబంధం లేకుండా కొత్త విషయాలు నేర్చుకుంటూ ముందుకు సాగుతారు. అలాంటి వ్యక్తుల్లో ఒకరు అశోక్ కుమార్. కోల్ ఇండియా లిమిటెడ్‌లో జనరల్ మేనేజర్‌గా పనిచేసి పదవీ విరమణ చేసిన ఆయన.. ఇప్పుడు 68 ఏళ్ల వయసులో మళ్లీ విద్యార్థిగా మారారు. ఇంజినీరింగ్ రంగంలో విశేష అనుభవం సంపాదించిన ఆయన, ప్రస్తుతం రాంచీ యూనివర్సిటీలో సైకాలజీ (మనస్తత్వశాస్త్రం)లో పోస్టు గ్రాడ్యుయేషన్ చేస్తున్నారు. అశోక్ కుమార్.. 2018 సెప్టెంబర్ 30న కోల్ ఇండియా లిమిటెడ్ నుంచి పదవీ విరమణ చేశారు. అయితే, అక్కడితో ఆయన వృత్తి జీవితం ముగియలేదు. అనంతరం జేపీ గ్రూప్‌లో వైస్ ప్రెసిడెంట్‌గా చేరారు. ఆ తర్వాత సలహాదారుగా కూడా పనిచేశారు. 2025 అక్టోబర్ 23న ఆ సంస్థ నుంచి కూడా పదవీ విరమణ చేశారు.

సాధారణంగా ఇలాంటి దశలో చాలామంది విశ్రాంతి జీవితాన్ని ఎంచుకుంటారు. కానీ అశోక్ కుమార్ మాత్రం కొత్త విషయాలు నేర్చుకోవాలనే ఆసక్తిని కొనసాగించారు. తన విద్యాభ్యాసానికి మరో అధ్యాయాన్ని జోడిస్తూ సైకాలజీలో పీజీ చదవాలని నిర్ణయించుకున్నారు. అశోక్ కుమార్ విద్యా ప్రస్థానం మొదట ఇంజినీరింగ్‌తో ప్రారంభమైంది. ఆయన జైపూర్‌లోని నేషనల్ ఇన్‌స్టిట్యూట్ ఆఫ్ టెక్నాలజీ (NIT) నుంచి మెకానికల్ ఇంజినీరింగ్‌లో బీటెక్ పూర్తి చేశారు. అనంతరం ధన్‌బాద్‌లోని ఇండియన్ స్కూల్ ఆఫ్ మైన్స్‌లో ఇండస్ట్రియల్ ఇంజినీరింగ్ అండ్ మేనేజ్‌మెంట్‌లో ఎంటెక్ చేశారు. ఇంజినీరింగ్ రంగంలో పీహెచ్‌డీ కూడా సాధించారు. ఇన్నేళ్ల పాటు సాంకేతిక, నిర్వహణ విభాగాల్లో పనిచేసిన ఆయన.. ఇప్పుడు మనుషుల ఆలోచనలు, భావోద్వేగాలు, ప్రవర్తనను అర్థం చేసుకోవడానికి సైకాలజీని ఎంచుకున్నారు. ఇంజినీరింగ్ ద్వారా యంత్రాలను ఎలా అర్థం చేసుకోవాలో నేర్చుకున్నానని, ఇప్పుడు సైకాలజీ ద్వారా మనుషులను అర్థం చేసుకోవాలనుకుంటున్నానని అశోక్ కుమార్ పేర్కొన్నట్లు దైనిక్ జాగరణ్ తెలిపింది. నేర్చుకోవడం అనేది ఎప్పటికీ ముగిసిపోయే ప్రక్రియ కాదన్నది ఆయన అభిప్రాయం.

ఇంజినీరింగ్ నుంచి సైకాలజీ వైపు..

68 ఏళ్ల వయసులో యూనివర్సిటీలో చేరినప్పటికీ అశోక్ కుమార్ తన చదువును ఎంతో ఆసక్తిగా కొనసాగిస్తున్నారు. ఇతర విద్యార్థుల మాదిరిగానే తరగతులకు క్రమం తప్పకుండా హాజరవుతున్నారు. పాఠాలు వింటూ, సందేహాలు వచ్చినప్పుడు అధ్యాపకులను ప్రశ్నిస్తూ విషయాలను తెలుసుకుంటున్నారు. ఆయన ఆసక్తి, నేర్చుకోవాలనే తపన సైకాలజీ విభాగం అధ్యాపకులను కూడా ఆకట్టుకున్నాయి. ఇంతటి అనుభవం, విజయాలు సాధించిన తర్వాత కూడా మరింత చదవాలనే ఉత్సాహం చూపించే విద్యార్థిని అరుదుగా చూస్తామని రాంచీ యూనివర్సిటీ సైకాలజీ విభాగాధిపతి డాక్టర్ పర్వేజ్ హసన్ దైనిక్ జాగరణ్‌తో పేర్కొన్నారు. అశోక్ కుమార్ ప్రయాణం ఒక ముఖ్యమైన విషయాన్ని గుర్తుచేస్తుంది. విద్య అనేది ఉద్యోగం సంపాదించడానికి లేదా కెరీర్‌లో ఎదగడానికి మాత్రమే పరిమితం కాదు. మన ఆసక్తులను అనుసరించడానికి, కొత్త విషయాలను తెలుసుకోవడానికి, జీవితాన్ని మరో కోణంలో అర్థం చేసుకోవడానికి కూడా చదువు ఉపయోగపడుతుంది.

ఇంజినీరింగ్ విద్య, ఉన్నత ఉద్యోగాలు, రెండు సంస్థల్లో బాధ్యతాయుతమైన పదవులు.. ఇవన్నీ సాధించిన తర్వాత కూడా అశోక్ కుమార్ తనను తాను కొత్తగా తీర్చిదిద్దుకోవాలని నిర్ణయించుకున్నారు. ఇప్పుడు ఆయన కార్యాలయంలో అధికారి కాదు.. యూనివర్సిటీ తరగతి గదిలో మరోసారి విద్యార్థి. వయసు అనేది నేర్చుకోవడానికి అడ్డంకి కాదని, ఆసక్తి ఉంటే జీవితంలోని ఏ దశలోనైనా కొత్త ప్రయాణాన్ని ప్రారంభించవచ్చని అశోక్ కుమార్ నిరూపిస్తున్నారు. ఆయన కథ ఉద్యోగ విరమణ తర్వాత కొత్తగా ఏదైనా నేర్చుకోవాలనుకునే వారికి స్ఫూర్తినిస్తుంది.