AP DSC 2026 స్పెషల్ ఎడ్యుకేషన్‌ నోటిఫికేషన్ విడుదల.. 350 SA, SGT టీచర్ పోస్టులు

ఆంధ్రప్రదేశ్‌లో ప్రభుత్వ ఉపాధ్యాయ ఉద్యోగాల కోసం ఎదురుచూస్తున్న అభ్యర్థులకు శుభవార్త. ఆంధ్రప్రదేశ్ ప్రభుత్వం, పాఠశాల విద్యాశాఖ ఉపాధ్యాయ నియామక పరీక్ష (APTRT-2026) నోటిఫికేషన్‌ను విడుదల చేసింది. ఈ నోటిఫికేషన్ ద్వారా ప్రభుత్వ, జిల్లా పరిషత్, మండల పరిషత్, మున్సిపాలిటీ, మున్సిపల్ కార్పొరేషన్ పాఠశాలల్లో స్పెషల్ ఎడ్యుకేషన్ విభాగంలో ఖాళీగా ఉన్న 350 పోస్టులను భర్తీ చేయనున్నారు. అర్హత కలిగిన అభ్యర్థుల నుంచి ఆన్‌లైన్ దరఖాస్తులను ఆహ్వానిస్తున్నారు. నవంబర్ 11 నుంచి దరఖాస్తుల ప్రక్రియ ప్రారంభం కాగా, నవంబర్ 30, 2026 చివరి తేదీగా నిర్ణయించారు.

విభాగాల వారీగా ఖాళీలు

APTRT-2026 నోటిఫికేషన్ ద్వారా రెండు రకాల పోస్టులను భర్తీ చేయనున్నారు.

• స్కూల్ అసిస్టెంట్ (స్పెషల్ ఎడ్యుకేషన్): 150 పోస్టులు
• సెకండరీ గ్రేడ్ టీచర్ (స్పెషల్ ఎడ్యుకేషన్): 200 పోస్టులు

స్కూల్ అసిస్టెంట్ (స్పెషల్ ఎడ్యుకేషన్) పోస్టులకు దరఖాస్తు చేసుకునే అభ్యర్ధులు యూజీసీ గుర్తింపు పొందిన విశ్వవిద్యాలయం నుంచి కనీసం 50 శాతం మార్కులతో గ్రాడ్యుయేషన్ లేదా పోస్ట్ గ్రాడ్యుయేషన్ పూర్తి చేసి ఉండాలి. ఎస్సీ, ఎస్టీ, బీసీ, దివ్యాంగ అభ్యర్థులకు కనీస మార్కుల అర్హత 40 శాతంగా నిర్ణయించారు. వీటితో పాటు రిహాబిలిటేషన్ కౌన్సిల్ ఆఫ్ ఇండియా (RCI) గుర్తింపు పొందిన స్పెషల్ ఎడ్యుకేషన్‌లో బీఈడీ లేదా తత్సమాన కోర్సు పూర్తి చేసి ఉండాలి. అలాగే ఏపీ టెట్ పేపర్-II Bలో అర్హత సాధించి ఉండాలి. ఇక సెకండరీ గ్రేడ్ టీచర్ (స్పెషల్ ఎడ్యుకేషన్) దరఖాస్తు చేసుకునే అభ్యర్ధులు ఆంధ్రప్రదేశ్ బోర్డ్ ఆఫ్ ఇంటర్మీడియట్ ఎడ్యుకేషన్ నుంచి కనీసం 50 శాతం మార్కులతో ఇంటర్మీడియట్ లేదా తత్సమాన విద్యార్హత కలిగి ఉండాలి. ఎస్సీ, ఎస్టీ, బీసీ, దివ్యాంగ అభ్యర్థులకు 45 శాతం మార్కులు ఉంటే సరిపోతుంది.

ఇవి కూడా చదవండి

నో మొబైల్‌.. రోజుకు 10 గంటల చదువు.. UPSC టాపర్ సక్సెస్ స్టోరీ!

కాంక్రీట్ నేలపై పచ్చి గుడ్డును పగలకుండా ఎలా పడేయాలి? UPSC ప్రశ్న

నిన్ను చూసి నవ్వినవారే రేపు నిన్ను చూసి గర్వపడాలంటే.. ఈ కథ చదవండి

పిల్లలకు పట్టుదల విలువను తెలిపే నీతికథ.. కుందేలు, కోతి, తాబేలు కథ

అలాగే ఆర్‌సీఐ గుర్తింపు పొందిన స్పెషల్ ఎడ్యుకేషన్‌లో బీఈడీ, డిప్లొమా ఇన్ ఎలిమెంటరీ ఎడ్యుకేషన్ (D.El.Ed) లేదా తత్సమాన డిప్లొమా పూర్తి చేసి ఉండాలి. అభ్యర్థులు ఆర్‌సీఐ సీఆర్‌ఆర్ నంబర్ కలిగి ఉండటంతో పాటు ఏపీ టెట్ పేపర్-I Bలో ఉత్తీర్ణులై ఉండాలి. 2026 జూలై 1 నాటికి అభ్యర్థుల వయస్సు 18 నుంచి 44 సంవత్సరాల మధ్య ఉండాలి. రిజర్వేషన్ వర్గాలకు ప్రభుత్వం నిర్ణయించిన నిబంధనల ప్రకారం వయోసడలింపు వర్తిస్తుంది. ఎస్సీ, ఎస్టీ, బీసీ, ఈడబ్ల్యూఎస్ అభ్యర్థులకు గరిష్ఠ వయస్సు 49 సంవత్సరాలు. దివ్యాంగ అభ్యర్థులకు గరిష్ఠ వయస్సు 54 సంవత్సరాలు. మాజీ సైనికోద్యోగులకు సాయుధ బలగాల్లో పనిచేసిన కాలంతో పాటు అదనంగా మూడేళ్ల సడలింపు ఉంటుంది.

దరఖాస్తు చేసుకునే అభ్యర్ధులు ఆన్‌లైన్ విధానంలో నవంబర్ 30, 2026వ తేదీ వరకు దరఖాస్తు చేసుకోవచ్చు. ప్రతి పోస్టుకు దరఖాస్తు చేసుకునే అభ్యర్థులు రూ.1,000 ఫీజు చెల్లించాలి. ఒకటి కంటే ఎక్కువ పోస్టులకు దరఖాస్తు చేయాలనుకునే అభ్యర్థులు ప్రతి అదనపు పోస్టుకు విడిగా ఫీజు చెల్లించాల్సి ఉంటుంది. అభ్యర్థుల ఎంపిక కంప్యూటర్ ఆధారిత పరీక్ష (CBT), ఏపీ టెట్ స్కోరు ఆధారంగా జరుగుతుంది. మొత్తం 100 మార్కులకు గాను కంప్యూటర్ ఆధారిత పరీక్షకు 80 శాతం వెయిటేజీ (80 మార్కులు), ఏపీ టెట్ స్కోరుకు 20 శాతం వెయిటేజీ (20 మార్కులు) కేటాయించారు. అలాగే ఐఈఆర్టీఎస్ (IERTS), ఐఈడీఎస్ఎస్ (IEDSS), కేజీబీవీలలో పనిచేస్తున్న అర్హులైన ఉపాధ్యాయులకు ప్రతి పూర్తి సంవత్సరానికి 0.5 మార్కుల చొప్పున గరిష్ఠంగా 5 మార్కుల వరకు సేవా వెయిటేజీ కల్పిస్తారు. పరీక్షలో అర్హత సాధించేందుకు కేటగిరీల వారీగా కనీస మార్కులను నిర్ణయించారు. ఓసీ, ఈడబ్ల్యూఎస్ అభ్యర్థులు: 40 శాతం, బీసీ-ఏ, బీ, సీ, డీ, ఈ అభ్యర్థులు: 35 శాతం, ఎస్సీ, ఎస్టీ, దివ్యాంగ అభ్యర్థులు: 30 శాతం చొప్పున సాధించవల్సి ఉంటుంది.

ముఖ్యమైన తేదీలు

• నోటిఫికేషన్ తేదీ: నవంబర్ 11, 2026.
• ఆన్‌లైన్ దరఖాస్తుల ప్రారంభం: నవంబర్ 11,  2026.
• ఫీజు చెల్లింపు, దరఖాస్తుకు చివరి తేదీ: నవంబర్ 30, 2026.

స్పెషల్ ఎడ్యుకేషన్ విభాగంలో ఉపాధ్యాయ ఉద్యోగాలు పొందాలనుకునే అభ్యర్థులు ఈ అవకాశాన్ని సద్వినియోగం చేసుకోవాలి. దరఖాస్తు చేసే ముందు విద్యార్హతలు, ఏపీ టెట్ అర్హత, ఆర్‌సీఐ గుర్తింపు, వయోపరిమితి వంటి అంశాలను జాగ్రత్తగా పరిశీలించాలి. పూర్తి వివరాలు, దరఖాస్తు విధానం, ఇతర నిబంధనల కోసం ఏపీ పాఠశాల విద్యాశాఖ అధికారిక నోటిఫికేషన్‌ను పరిశీలించి గడువులోగా దరఖాస్తు చేసుకోవాలి.