Oil Reserves: ప్రపంచంలో అత్యధిక చమురు నిల్వలు ఉన్న దేశాలు.. టాప్-10లో భారత్‌ ఏ స్థానం?

Oil Reserves: మిడిల్ ఈస్ట్ ప్రాంతంలో పెరుగుతున్న ఉద్రిక్తతలు ప్రపంచ చమురు మార్కెట్‌లో ఆందోళనలను పెంచుతున్నాయి. ముఖ్యంగా ఇరాన్, అమెరికా, ఇజ్రాయెల్ దేశాల మధ్య పెరుగుతున్న సైనిక చలనం ప్రపంచ ఎనర్జీ సరఫరాపై ప్రభావం చూపే అవకాశాలు ఉన్నాయని నిపుణులు చెబుతున్నారు. ప్రస్తుతం ఎక్కువగా చర్చ జరుగుతున్న అంశం హార్ముజ్ సముద్ర సన్నని మార్గం (Strait of Hormuz). ఇది ప్రపంచంలో అత్యంత కీలకమైన సముద్ర చమురు మార్గాల్లో ఒకటిగా గుర్తించారు. గల్ఫ్ దేశాల నుంచి ఎగుమతి అయ్యే ముడి చమురు పెద్ద భాగం ఈ మార్గం ద్వారానే ప్రపంచంలోని వివిధ దేశాలకు చేరుతుంది. ప్రపంచ చమురు సరఫరాలో సుమారు 20 నుంచి 30 శాతం వరకు ఈ సముద్ర మార్గం ద్వారా రవాణా అవుతుందని అంచనా. ఈ పరిస్థితుల్లో ప్రపంచంలో ఏ దేశాల వద్ద అత్యధిక చమురు నిల్వలు ఉన్నాయనే ప్రశ్న మరింత ప్రాధాన్యం సంతరించుకుంది.

ప్రపంచంలో చమురు డిమాండ్ ఎంత?

ఓపెక్ నివేదిక ప్రకారం..2024లో ప్రపంచ చమురు సగటు డిమాండ్ రోజుకు 103.84 మిలియన్ బ్యారెళ్లకు చేరుకుంది. ఇది గత ఏడాదితో పోలిస్తే రోజుకు 1.49 మిలియన్ బ్యారెళ్ల (సుమారు 1.5%) పెరుగుదలను సూచిస్తుంది. అలాగే 2024 చివరి నాటికి ప్రపంచంలో మొత్తం 1,566,869 మిలియన్ బ్యారెళ్ల ప్రామాణిక ముడి చమురు నిల్వలు ఉన్నాయని నివేదిక పేర్కొంది. ఇది గత ఏడాదితో పోలిస్తే సుమారు 2,340 మిలియన్ బ్యారెళ్ల (0.1%) పెరుగుదలను చూపిస్తుంది.

ప్రపంచంలో అత్యధిక చమురు నిల్వలు ఉన్న దేశం:

ప్రపంచంలో అత్యధిక చమురు నిల్వలు కలిగిన దేశంగా వెనిజువేలా మొదటి స్థానంలో ఉంది. అక్కడ సుమారు 303,221 మిలియన్ బ్యారెళ్ల ప్రామాణిక చమురు నిల్వలు ఉన్నాయి. ఇది ప్రపంచ మొత్తం నిల్వల్లో దాదాపు ఐదవ వంతుగా భావిస్తున్నారు. ఇటీవలి సంవత్సరాల్లో వెనిజువేలా అంతర్జాతీయ రాజకీయాల్లో కూడా కీలకంగా మారింది. 2026 ప్రారంభంలో అక్కడి రాజకీయ పరిణామాలు ప్రపంచ దృష్టిని ఆకర్షించాయి. ఆ సమయంలో జరిగిన ఒక సైనిక చర్యలో అధ్యక్షుడు నికోలాస్ మడూరో అధికారాన్ని కోల్పోయారని వార్తలు వచ్చాయి. ఈ చర్య ద్వారా అమెరికా తన ప్రభావాన్ని బలోపేతం చేసుకోవడంతో పాటు వెనిజువేలాలోని భారీ చమురు వనరులపై ప్రాప్యత సాధించాలనే వ్యూహం ఉందని విశ్లేషకులు పేర్కొన్నారు.

ప్రపంచంలో చమురు నిల్వలు కలిగిన టాప్ 10 దేశాలు

ఈ జాబితాను పరిశీలిస్తే మిడిల్ ఈస్ట్ దేశాలు ప్రపంచ చమురు మార్కెట్‌లో ఇప్పటికీ కీలక పాత్ర పోషిస్తున్నాయి. ముఖ్యంగా సౌదీ అరేబియా, ఇరాన్, ఇరాక్, యూఏఈ, కువైట్ వంటి దేశాలు ప్రపంచ ఎనర్జీ సరఫరాలో ప్రధాన పాత్రలో కొనసాగుతున్నాయి. అదే సమయంలో రష్యా, అమెరికా కూడా ఈ టాప్-10 జాబితాలో చోటు సంపాదించాయి.

భారతదేశ స్థానం ఏమిటి?

చమురు నిల్వల విషయంలో భారత్ ప్రపంచంలోని ప్రధాన దేశాలతో పోలిస్తే చాలా వెనుకబడి ఉంది. ప్రపంచస్థాయిలో భారత్ 22వ స్థానంలో ఉంది. భారతదేశంలో మొత్తం 4,981 మిలియన్ బ్యారెళ్ల ముడి చమురు నిల్వలు ఉన్నట్లు సమాచారం. ఇది 2023తో పోలిస్తే 132 మిలియన్ బ్యారెళ్ల పెరుగుదల అయినప్పటికీ వెనిజువేలా, సౌదీ అరేబియా, ఇరాన్ వంటి దేశాలతో పోలిస్తే ఇది చాలా తక్కువ.