క్రెడిట్ కార్డులతో డబ్బు సంపాదించవచ్చు.. అందుకోసం మెలకువలు, తీసుకోవాల్సిన జాగ్రత్తలు

క్రెడిట్ కార్డులు కేవలం షాపింగ్, బిల్లుల చెల్లింపులకు మాత్రమే పరిమితం కాదని, వాటిని తెలివిగా, క్రమశిక్షణతో ఉపయోగిస్తే డబ్బు సంపాదించే సాధనంగా కూడా మార్చుకోవచ్చని ఆర్థిక నిపుణులు చెబుతున్నారు. అయితే, దీనికి కొన్ని ముఖ్యమైన నియమాలు, జాగ్రత్తలు పాటించడం తప్పనిసరి. క్రెడిట్ కార్డులు అందించే ప్రధాన ప్రయోజనాల్లో ఒకటి 30 నుంచి 45 రోజుల వడ్డీ రహిత కాలం. ఈ సమయంలో మీరు క్రెడిట్ కార్డుతో కొనుగోళ్లు చేయవచ్చు లేదా బిల్లులు చెల్లించవచ్చు. గడువు తేదీలోపు బిల్లును పూర్తిగా చెల్లిస్తే ఎలాంటి వడ్డీ కట్టాల్సిన అవసరం ఉండదు. బ్యాంకులు వ్యాపారుల నుంచి కమిషన్ రూపంలో లేదా బిల్లుల ఆలస్యంపై విధించే వడ్డీ ద్వారా ఆదాయం పొందుతాయి.

క్రెడిట్ కార్డు ద్వారా డబ్బు సంపాదించే మార్గాలు:

1.వడ్డీ రహిత కాలంలో పెట్టుబడి: మీకు జీతం వచ్చినప్పుడు, ఇంటి సరుకులు, కరెంట్ బిల్లు, వాటర్ బిల్లు, మొబైల్ బిల్లులు, రెస్టారెంట్ బిల్లులు వంటి ఖర్చులను క్రెడిట్ కార్డుతో చెల్లించండి. దీంతో మీ జీతం డబ్బు 40-50 రోజుల పాటు మీ వద్దే ఉంటుంది. ఈ మొత్తాన్ని తక్కువ కాలం పాటు బ్యాంకు ఫిక్స్‌డ్ డిపాజిట్‌లో పెట్టుబడిగా పెట్టి వడ్డీ పొందవచ్చు. అయితే, సురక్షితమైన పెట్టుబడి మార్గాలను ఎంచుకోవడం ముఖ్యం. షేర్ మార్కెట్ వంటి రిస్క్ ఉన్న మార్గాలకు దూరంగా ఉండాలి.

2. నో కాస్ట్ ఈఎంఐల ద్వారా లాభం:  చాలా క్రెడిట్ కార్డ్ కంపెనీలు నో కాస్ట్ ఈఎంఐ ఆఫర్‌లను అందిస్తాయి. ఉదాహరణకు, మీరు లక్ష రూపాయల ల్యాప్‌టాప్ కొనాలనుకుంటే, ఆ మొత్తాన్ని ఎఫ్‌డీలో ఉంచి నో కాస్ట్ ఈఎంఐ ద్వారా ల్యాప్‌టాప్ కొనుగోలు చేయవచ్చు. తద్వారా ఎఫ్‌డీపై వడ్డీ సంపాదించవచ్చు. అయితే, కొన్ని బ్యాంకులు ప్రాసెసింగ్ ఛార్జీలు వసూలు చేయవచ్చు కాబట్టి నిబంధనలు, షరతులు క్షుణ్ణంగా చదవాలి. ఈఎంఐలు సకాలంలో చెల్లించడం తప్పనిసరి.

3. రివార్డ్ పాయింట్లు, క్యాష్‌బ్యాక్: క్రెడిట్ కార్డు వినియోగంపై చాలా కంపెనీలు రివార్డ్ పాయింట్లు లేదా క్యాష్‌బ్యాక్ అందిస్తాయి. వీటిని రీడీమ్ చేసుకోవడం ద్వారా లేదా బిల్లు చెల్లింపులపై వచ్చే క్యాష్‌బ్యాక్‌లను సద్వినియోగం చేసుకోవడం ద్వారా కొంత డబ్బు ఆదా చేసుకోవచ్చు లేదా సంపాదించవచ్చు.

4. సిబిల్ స్కోర్ పెంపు: క్రెడిట్ కార్డు బిల్లులను సకాలంలో చెల్లించడం వల్ల మీ సిబిల్ స్కోర్ పెరుగుతుంది. మంచి సిబిల్ స్కోర్ భవిష్యత్తులో గృహ రుణాలు లేదా ఇతర రుణాలను తక్కువ వడ్డీకే పొందడానికి సహాయపడుతుంది.

జాగ్రత్తలు, నష్టాలు:

క్రెడిట్ కార్డులను క్రమశిక్షణ లేకుండా ఉపయోగిస్తే తీవ్ర ఆర్థిక నష్టాలు ఎదురవుతాయి.

పూర్తి బిల్లు చెల్లింపు: డ్యూ డేట్ లోగా మొత్తం బిల్లును చెల్లించడం తప్పనిసరి. “కనీస చెల్లింపు” (Minimum Due) వైపు అస్సలు వెళ్లవద్దు, ఇది అధిక వడ్డీలకు దారితీసి రుణ భారాన్ని పెంచుతుంది.

ఆర్థిక స్థోమత:  క్రెడిట్ కార్డుతో ఖర్చు పెట్టినంత డబ్బు ముందే మీ వద్ద ఉన్నప్పుడు మాత్రమే పై సంపాదన మార్గాలు సాధ్యమవుతాయి. అనవసరమైన ఖర్చులకు దూరంగా ఉండాలి.

నిబంధనలు, షరతులు:

నో కాస్ట్ ఈఎంఐ, ఇతర ఆఫర్ల నిబంధనలు, షరతులను జాగ్రత్తగా చదవండి. దాచిన ఛార్జీలు ఏమైనా ఉన్నాయో లేదో తెలుసుకోండి.

వార్షిక రుసుములు:

క్రెడిట్ కార్డు వార్షిక రుసుములను గమనిస్తూ ఉండండి. కార్డు అప్‌గ్రేడ్ పేరుతో కంపెనీలు ఫీజులు పెంచాయేమో చూసుకోవాలి. క్రెడిట్ కార్డులు ఆర్థిక సాధనాలు మాత్రమే. వాటిని ఎలా ఉపయోగించాలి అనేది వినియోగదారుడి క్రమశిక్షణపై ఆధారపడి ఉంటుంది. వీటిని తెలివిగా ఉపయోగిస్తే ఆర్థికంగా లాభపడవచ్చు. లేకపోతే నష్టాల బారిన పడే అవకాశం ఉంది.