PPF: నెలకు రూ.12,500 పెట్టుబడితో చేతికి రూ. 66 లక్షలు.. ఎలాగో తెలుసుకోండి!

PPF Investment Strategy: ప్రతి ఉద్యోగి కల రిటైర్మెంట్ తర్వాత ఆర్థిక ఇబ్బందులు లేకుండా ప్రశాంతంగా గడపాలని. ఖర్చుల కోసం ఎవరిపై ఆధారపడకుండా, ప్రతి నెలా చేతికి డబ్బు అందాలని అందరూ కోరుకుంటారు. అయితే, ఇంత పెద్ద మొత్తంలో డబ్బును ఎలా కూడబెట్టాలన్నదే ప్రశ్న. దీనికి పబ్లిక్ ప్రావిడెంట్ ఫండ్ (PPF) ఒక అద్భుతమైన మార్గం.

నెలకు రూ.12,500 పెట్టుబడి

ఒక వ్యక్తి ఏడాదికి రూ.1.5 లక్షలు PPFలో పెట్టుబడి పెడితే, 20 ఏళ్లలో అతని ఫండ్ రూ.66 లక్షల కంటే ఎక్కువగా ఉంటుంది. అంటే మీరు నెలకు దాదాపు రూ.12,500 పొదుపు చేయాలి. ఈ పథకం ప్రత్యేకత ఏమిటంటే మీరు పొందే లాభంపై ఎటువంటి పన్ను (Tax) చెల్లించాల్సిన అవసరం లేదు. అందుకే రిటైర్మెంట్ ప్లానింగ్ కోసం ఇది నమ్మదగిన ఎంపిక.

పెద్ద మొత్తంలో ఫండ్ ఎలా తయారవుతుంది?

ప్రస్తుతం పీపీఎఫ్‌పై ఏడాదికి 7.1% వడ్డీ లభిస్తోంది. మీరు ప్రతి ఆర్థిక సంవత్సరం ప్రారంభంలో (ఏప్రిల్ 1 నుండి 5 మధ్య) రూ.1.5 లక్షలు జమ చేస్తే ఆ ఏడాది మొత్తంపై వడ్డీ లభిస్తుంది. ఇలా 20 ఏళ్ల పాటు పెట్టుబడి పెట్టడం వల్ల ‘కాంపౌండింగ్’ (చక్రవడ్డీ) ప్రభావంతో మీ డబ్బు వేగంగా పెరుగుతుంది.

20 ఏళ్లలో వచ్చే లాభాల లెక్కలివే (అంచనా):

• వార్షిక పెట్టుబడి: రూ.1,50,000 (నెలకు రూ.12,500 లేదా రోజుకు రూ.417)
• పెట్టుబడి కాలం: 20 ఏళ్లు
• వడ్డీ రేటు: 7.1% (ప్రస్తుత రేటు ప్రకారం)
• మొత్తం పెట్టుబడి: రూ.30,00,000
• పొందే మొత్తం వడ్డీ: రూ.36,58,288
• మెచ్యూరిటీ మొత్తం: రూ.66,58,288

అంటే మీరు కేవలం రూ.30 లక్షలు పెట్టుబడి పెట్టి, రూ.66.5 లక్షల పన్ను రహిత ఆదాయాన్ని పొందవచ్చు.

పీపీఎఫ్‌ మెచ్యూరిటీ నియమాలు:

• పీపీఎఫ్‌ ఖాతా కాలపరిమితి సాధారణంగా 15 ఏళ్లు.
• దీనిని కావాలనుకుంటే 5 ఏళ్ల చొప్పున ఎన్నిసార్లయినా పొడిగించుకోవచ్చు.
• ఒకవేళ కొత్తగా డబ్బు జమ చేయకుండా ఖాతాను కొనసాగించాలనుకుంటే, కేవలం ఒకసారి మాత్రమే 5 ఏళ్ల పొడిగింపునకు అవకాశం ఉంటుంది.

పన్ను ప్రయోజనాలు:

పాత పన్ను విధానం ప్రకారం, సెక్షన్ 80C కింద ఏడాదికి రూ.1.5 లక్షల వరకు పన్ను మినహాయింపు పొందవచ్చు. అంతేకాకుండా, దీనిపై వచ్చే వడ్డీ, మెచ్యూరిటీ సమయంలో వచ్చే మొత్తంపై కూడా ఎలాంటి పన్ను ఉండదు.

ఎంత పెట్టుబడి పెట్టవచ్చు?

• కనీస పెట్టుబడి: ఏడాదికి రూ.500
• గరిష్ట పెట్టుబడి: ఏడాదికి రూ.1.5 లక్షలు

ఆధార్ తప్పనిసరా?

ఇప్పుడు పీపీఎఫ్‌ ఖాతా తెరవడానికి ఆధార్ (Aadhaar) తప్పనిసరి. ఒకవేళ ఆధార్ లేకపోతే, ఎన్‌రోల్‌మెంట్ స్లిప్ ఇచ్చి ఖాతా తెరవవచ్చు. అయితే, 6 నెలల లోపు ఆధార్ నంబర్‌ను లింక్ చేయాలి. లేదంటే ఖాతా తాత్కాలికంగా నిలిచిపోతుంది.

ఉద్యోగులకు పీపీఎఫ్‌ ఎందుకు ఇష్టం?

మార్కెట్ ఒడిదుడుకులతో సంబంధం లేకుండా, సురక్షితమైన, స్థిరమైన లాభాలను ఇచ్చే పథకం కాబట్టి పీపీఎఫ్‌కి ఆదరణ ఎక్కువ. తక్కువ రిస్క్‌తో రిటైర్మెంట్ కోసం పెద్ద మొత్తాన్ని పన్ను లేకుండా పోగు చేసుకోవడానికి ఇది ఉత్తమ మార్గం.

మరిన్ని బిజినెస్ వార్తల కోసం ఇక్కడ క్లిక్ చేయండి