బ్యాంక్ లాకర్ కీ పోతే.. దాన్ని ఎలా తెరవాలి? రూల్స్ ఏం చెబుతున్నాయంటే..?
బ్యాంక్ లాకర్ కీ పోతే ఆందోళన చెందకండి. కీ పోయిన వెంటనే బ్యాంకుకు లిఖితపూర్వకంగా తెలియజేయండి. బ్యాంక్ అధికారులు RBI మార్గదర్శకాల ప్రకారం మీ సమక్షంలో లాకర్ను తెరిచి, లాక్ మార్చి కొత్త కీని జారీ చేస్తారు. మీ వస్తువుల భద్రతకు ఎలాంటి ప్రమాదం ఉండదు.
Updated on: Mar 05, 2026 | 3:27 AM
ఈ రోజుల్లో ముఖ్యమైన పత్రాలు, నగలు, విలువైన వస్తువులను భద్రపరచడానికి చాలా మంది బ్యాంక్ లాకర్లను ఉపయోగిస్తున్నారు. సాధారణంగా ఇవి అత్యంత సురక్షితంగా భావించబడతాయి. అయితే లాకర్ కీ పోయితే సహజంగానే ఆందోళన కలుగుతుంది. కానీ బ్యాంకులు, RBI మార్గదర్శకాల ప్రకారం అటువంటి పరిస్థితులకు స్పష్టమైన విధానం ఉంది. బ్యాంక్ లాకర్ వ్యవస్థలో రెండు కీలు ఉంటాయి. ఒకటి కస్టమర్ వద్ద, మరొకటి బ్యాంక్ వద్ద ఉండే మాస్టర్ కీ. ఈ రెండు లేకుండా లాకర్ తెరుచుకోదు. ముఖ్యంగా బ్యాంక్ వద్ద కస్టమర్ కీకి డూప్లికేట్ ఉండదు. అందువల్ల కీ పోయితే కొత్త కీని నేరుగా ఇవ్వడం సాధ్యం కాదు.
మీ లాకర్ కీ పోయిందని గుర్తించిన వెంటనే, ఆలస్యం చేయకుండా మీ బ్యాంక్ శాఖకు లిఖితపూర్వకంగా సమాచారం ఇవ్వాలి. సాధారణంగా బ్యాంక్ మీ నుండి అప్లికేషన్, హామీ పత్రం తీసుకుంటుంది. కొన్ని సందర్భాల్లో భద్రత కారణాల వల్ల FIR కాపీని కూడా అడగవచ్చు. బ్యాంకుకు సమాచారం ఇచ్చిన తర్వాత వారు తమ అంతర్గత విధానాన్ని ప్రారంభిస్తారు. సాధారణంగా అధికారం కలిగిన టెక్నీషియన్ను పిలిచి లాకర్ను మీ సమక్షంలో, బ్యాంకు అధికారుల పర్యవేక్షణలో తెరుస్తారు. అనంతరం లాక్ మార్చి కొత్త కీ జారీ చేస్తారు. ఈ ప్రక్రియకు అయ్యే ఖర్చును కస్టమర్ భరించాలి. బ్యాంక్ను బట్టి ఇది సాధారణంగా కొన్ని వేల రూపాయల వరకు ఉండొచ్చు. మొత్తం ప్రక్రియ పూర్తి కావడానికి సుమారు 10–15 రోజులు పట్టే అవకాశం ఉంది.
రెండు కీలు లేకుండా లాకర్ తెరవడం సాధ్యం కాదు. మొత్తం ప్రక్రియ బ్యాంకు పర్యవేక్షణలోనే జరుగుతుంది. కాబట్టి కీ పోయినా మీ లాకర్లోని విలువైన వస్తువుల భద్రతకు సాధారణంగా ఎలాంటి ప్రమాదం ఉండదు. మొత్తంగా లాకర్ కీ పోవడం అసౌకర్యమే కానీ సరైన విధానం పాటిస్తే మీ ఆస్తులు సురక్షితంగానే ఉంటాయి.
మరిన్ని బిజినెస్ వార్తల కోసం ఇక్కడ క్లిక్ చేయండి
