విమానం ఎక్కాలన్న మీ కల ఫ్రీగా తీర్చుకోండి! 20,000 ఉచిత టిక్కెట్లు ఇస్తున్న ఇండిగో
ఇండిగో 20వ వార్షికోత్సవం సందర్భంగా ప్రయాణికులకు భారీ ఆఫర్ ప్రకటించింది. ఆగస్టు 4 నుంచి 6, 2026 మధ్య అధికారిక ఛానెళ్ల లో దేశీయ విమాన టిక్కెట్లు బుక్ చేస్తే, 20,000 మంది వరకు ఉచిత టిక్కెట్లు గెలుచుకునే అవకాశం ఉంది.
Updated on: Aug 04, 2026 | 2:08 PM
దేశంలోని ప్రముఖ విమానయాన సంస్థ ఇండిగో తన 20వ వార్షికోత్సవాన్ని పురస్కరించుకుని ప్రయాణికుల కోసం ప్రత్యేక ఆఫర్ను ప్రకటించింది. హ్యాపీ ఇండిగో డే.. ఇండిగోఫ్రీ పేరుతో తీసుకొచ్చిన ఈ ఆఫర్లో భాగంగా మొత్తం 20,000 ఉచిత విమాన టిక్కెట్లను అందించనున్నట్లు కంపెనీ వెల్లడించింది. ఒక్కో పీఎన్ఆర్కు గరిష్ఠంగా రూ.10,000 వరకు బుకింగ్ మొత్తాన్ని తిరిగి చెల్లించే అవకాశం ఈ ఆఫర్లో ఉంది.
ఎప్పుడు బుక్ చేస్తే ఆఫర్ వర్తిస్తుంది?
ఈ ప్రత్యేక ఆఫర్ 2026 ఆగస్టు 4 నుంచి ఆగస్టు 6 వరకు చేసిన దేశీయ విమాన బుకింగ్లకు మాత్రమే వర్తిస్తుంది. ప్రయాణికులు ఇండిగో అధికారిక వెబ్సైట్, మొబైల్ యాప్ లేదా 6Eskai AI వర్చువల్ అసిస్టెంట్ ద్వారా నేరుగా టిక్కెట్లు బుక్ చేసుకోవాలి. ఇతర థర్డ్-పార్టీ బుకింగ్ ప్లాట్ఫారమ్ల ద్వారా చేసిన బుకింగ్లకు ఈ ఆఫర్ వర్తించదు.
ఫ్రీ టిక్కెట్ ఎవరికి ఇస్తారు?
ఆఫర్ వ్యవధిలో చేసిన అర్హత కలిగిన బుకింగ్ల నుంచి కంపెనీ ర్యాండమ్గా ప్రయాణికులను ఎంపిక చేస్తుంది. ఎంపికైన వారికి ఇండిగో నుంచి ఈమెయిల్, వాట్సాప్ ద్వారా ఒక సందేశం వస్తుంది. అందులో ఒక సులభమైన ప్రశ్న అడుగుతారు. ఆ ప్రశ్నకు సరైన సమాధానం ఇవ్వడానికి ప్రయాణికులకు మూడు అవకాశాలు ఉంటాయి.
రిఫండ్ ఎలా లభిస్తుంది?
ప్రశ్నకు సరైన సమాధానం ఇచ్చిన అర్హులైన ప్రయాణికులకు వారి బుకింగ్ చార్జీలను ఒక్కో పీఎన్ఆర్కు గరిష్ఠంగా రూ.10,000 వరకు తిరిగి చెల్లిస్తారు. ఈ రిఫండ్ సాధారణంగా 3 నుంచి 5 పని దినాల్లో వారి చెల్లింపు విధానానికే జమ అవుతుందని ఇండిగో తెలిపింది.
ఏ బుకింగ్లకు వర్తిస్తుంది?
ఈ ఆఫర్ వన్-వే, రిటర్న్ ప్రయాణాలకు రెండింటికీ వర్తిస్తుంది. అలాగే అన్ని దేశీయ ఎకానమీ క్లాస్, ఇండిగోస్ట్రెచ్ బుకింగ్లు కూడా ఈ ఆఫర్ పరిధిలోకి వస్తాయి. అయితే అర్హత, ఎంపిక విధానం, ఇతర నిబంధనలు కంపెనీ ప్రకటించిన షరతుల ప్రకారం అమలులో ఉంటాయి.
20 ఏళ్ల ప్రయాణానికి గుర్తుగా ప్రత్యేక కానుక
భారతదేశంలో అతిపెద్ద విమానయాన సంస్థల్లో ఒకటిగా ఎదిగిన ఇండిగో, 20 ఏళ్ల విజయవంతమైన ప్రయాణాన్ని వినియోగదారులతో కలిసి జరుపుకోవడానికి ఈ ప్రత్యేక ఆఫర్ను తీసుకొచ్చింది. దేశీయ ప్రయాణికులకు అదనపు ప్రయోజనం కల్పించడమే కాకుండా, సంస్థపై వినియోగదారుల విశ్వాసానికి కృతజ్ఞతగా ఈ కార్యక్రమాన్ని చేపట్టినట్లు ఇండిగో తెలిపింది. ఈ నేపథ్యంలో ఆగస్టు 4 నుంచి 6 మధ్య ఇండిగో అధికారిక ఛానెళ్ల ద్వారా టిక్కెట్లు బుక్ చేసుకునే ప్రయాణికులకు ఉచిత టిక్కెట్లు గెలుచుకునే అవకాశం లభించనుంది.
మరిన్ని బిజినెస్ వార్తల కోసం ఇక్కడ క్లిక్ చేయండి
